ରାଜଭରଙ୍କ ଦାବି: ୨୦୨୪ ଲୋକସଭା ନିର୍ବାଚନ ପୂର୍ବରୁ ଭାଜପାରେ ଯୋଗଦେବେ ଶିବପାଲ ଯାଦବ

ଲକ୍ଷ୍ନୌ,୩।୯: ବିବାଦୀୟ ବିବୃତ୍ତି ପାଇଁ ସର୍ବଦା ଚର୍ଚ୍ଚାରେ ରହିଆସୁଥିବା ଏସ୍‌ବିଏସ୍‌ପି ମୁଖ୍ୟ ଓମ ପ୍ରକାଶ ରାଜଭର ପୁଣିଥରେ ଏକ ରୋଚକ ମନ୍ତବ୍ୟ ଦେଇଛନ୍ତି। ତାଙ୍କ ମନ୍ତବ୍ୟ ଯୋଗୁ ୟୁପି ରାଜନୀତି ସରଗରମ ହୋଇଛି। ୨୦୨୪ ଲୋକସଭା ନିର୍ବାଚନ ପୂର୍ବରୁ ଶିବପାଲ ସିଂ ଯାଦବ ସମାଜବାଦୀ ପାର୍ଟି ଛାଡି ଭାଜପାରେ ଯୋଗଦେବେ ବୋଲି ଓପି ରାଜଭର ଦାବି କରିଛନ୍ତି।
ଓପି ରାଜଭର କହିଛନ୍ତି, ବିଧାନସଭାରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସମୟରେ ସେ ଶିବପାଲ ଯାଦବଙ୍କୁ ୨ ଘଣ୍ଟା ୧୨ ମିନିଟରେ ୨୭ ଥର କହିଥିଲେ ଯେ ଏପର୍ଯ୍ୟନ୍ତ ସମୟ ଅଛି, ଏହାକୁ ନଷ୍ଟ କରନ୍ତୁ ନାହିଁ, ଏଠାକୁ ଆସନ୍ତୁ। ନଚେତ୍‌ ଆପଣ ବହୁତ ପରେ ଅନୁତାପ କରିବେ। ଏଭଳି ପରିସ୍ଥିତିରେ ଶିବପାଲ ଯାଦବ ମୋ ଆଡକୁ ସୂଚାଇ କହିଥିଲେ ଯେ ସେ ଶୀଘ୍ର ଆସିବେ। ସେ ମଧ୍ୟ ଏହାକୁ ଗ୍ରହଣ କରିଥିଲେ।
ସମାଜବାଦୀ ପାର୍ଟିର ରାଷ୍ଟ୍ରୀୟ ସାଧାରଣ ସମ୍ପାଦକ ଶିବପାଲ ଯାଦବ ନିକଟରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସହ ତାଙ୍କର ବ୍ୟକ୍ତିଗତ ସମ୍ପର୍କ ବିଷୟରେ ଆଲୋଚନା କରିବାବେଳେ ସେ କହିଥିଲେ ଯେ, ସେ ଯେତେବେଳେ ଚାହିଁବେ ଫୋନରେ ସିଏମ ଯୋଗୀଙ୍କ ସହ କଥା ହୋଇପାରିବେ।