ନୂଆଦିଲ୍ଲୀ: ଚଳିତ ଆର୍ଥତ୍କ ବର୍ଷରେ କରୋନା ମହାମାରୀ ପ୍ରଭାବ ଯୋଗୁ ଭାରତର ମୋଟ ଘରୋଇ ଉତ୍ପାଦ(ଜିଡିପି) ଲଗାତର ଖସିଚାଲିଛି। ଏହାକୁ ନେଇ ଚିନ୍ତା ପ୍ରକଟ କରାଯାଉଛି। ଏଭଳି ସ୍ଥିତିରେ ଦେଶର ଜିଡିପିକୁ ନେଇ ନୀତି ଆୟୋଗର ଉପାଧ୍ୟକ୍ଷ ରାଜୀବ କୁମାର ଭରସା ଦେଇଛନ୍ତି। ସେ କହିଛନ୍ତି, ଚଳିତ ଆର୍ଥତ୍କ ବର୍ଷ ଦ୍ୱିତୀୟାର୍ଦ୍ଧରେ ଦେଶର ଆର୍ଥତ୍କ ଅଭିବୃଦ୍ଧି ହାରରେ ଉନ୍ନତି ପରିଲକ୍ଷିତ ହେବ। ୨୦୨୧-୨୨ରେ ଭାରତର ଅଭିବୃଦ୍ଧି ପ୍ରଦର୍ଶନ ବିଶ୍ୱର ଅନ୍ୟ ଦେଶ ତୁଳନାରେ ବେଶ୍ ଉନ୍ନତ ରହିବ। କରୋନା ଭାଇରସ୍ ଯୋଗୁ ବଜାର ବିଗିଡିଯାଇଥିବାରୁ ଏହାକୁ ନେଇ ସେ ଚିନ୍ତା ପ୍ରକଟ କରିଛନ୍ତି। ମହାମାରୀଠାରୁ ଚାପରୁ ଅର୍ଥ ବ୍ୟବସ୍ଥା ଯେତେ ଶୀଘ୍ର ବାହାରିବାକୁ ସକ୍ଷମ ହେବ ସେତେ ଶୀଘ୍ର ବଜାରରେ ଉନ୍ନତି ସମ୍ଭବ ବୋଲି ସେ ଆଶା ପ୍ରକଟ କରିଛନ୍ତି। ସେ ପୁଣି କହିଛନ୍ତି, ବର୍ତ୍ତମାନ ଅର୍ଥ ବ୍ୟବସ୍ଥା ସମ୍ପୂର୍ଣ୍ଣ ଭାବେ କରୋନା ପଞ୍ଝାରୁ ବାହାରିବାକୁ ସକ୍ଷମ ହୋଇନାହିଁ। ମାତ୍ର କିଛି କ୍ଷେତ୍ରରେ ଉନ୍ନତ ସ୍ଥିତି ଦେଖାଗଲାଣି। ଏହା ମଧ୍ୟରେ ମାଲ ପରିବହନ, ବିଜୁଳି ଚାହିଦା, କୃଷି ଉତ୍ପାଦନ ବୃଦ୍ଧି ଭଳି ଅନ୍ୟ କ୍ଷେତ୍ର ସାମିଲ ରହିଛି।
ଜୁଲାଇ-ସେପ୍ଟେମ୍ବର ତ୍ରୈମାସରେ ଜିଡିପିରେ ହ୍ରାସ ପରିଲକ୍ଷିତ ହେବ। ମାତ୍ର ପୂର୍ବ ତୁଳନାରେ ଏହାର ପ୍ରଭାବ ଏତେ ମାତ୍ରାରେ ରହିବ ନାହିଁ। ମାତ୍ର ଚଳିତ ଆର୍ଥତ୍କ ବର୍ଷ ଦ୍ୱିତୀୟ ତ୍ରୈମାସରେ ଅଭିବୃଦ୍ଧି ହାର ସକାରାତ୍ମକ ରହିବ। ସରକାରଙ୍କ ଯୋଜନା ଉପରେ ମତ ରଖି ସେ କହିଛନ୍ତି, ଗତ ୬ରୁ ୭ ମାସ ମଧ୍ୟରେ ସରକାର ବିଭିନ୍ନ ପଦକ୍ଷେପ ହାତକୁ ନେଇଛନ୍ତି। ଏଫ୍ଡିଆଇ, ଶ୍ରମ ଆଇନ ଏବଂ କୃଷି ଭଳି ବିଭିନ୍ନ କ୍ଷେତ୍ରର ସଂସ୍କାର ଏହା ମଧ୍ୟରେ ସାମିଲ ରହିଛି। ବିଭିନ୍ନ ଢାଞ୍ଚାଗତ ସୁଧାର ଉପରେ ସରକାର ଫୋକସ କରୁଥିବାରୁ ଏହାର ଲାଭ ଅର୍ଥ ବ୍ୟବସ୍ଥାକୁ ମିଳିବ। ଜିଡିପିରେ ଯେଉଁ ହ୍ରାସ ପରିଲକ୍ଷିତ ହେଉଛି ତାକୁ ନେଇ ହତାଶ ନ ହେବାକୁ ସେ ପରାମର୍ଶ ଦେଇଛନ୍ତି। ସରକାର ବିଭିନ୍ନ ଉପାୟରେ ସମସ୍ୟା ବିରୋଧରେ ଲଢିବାକୁ ଯୋଜନା ରଖିଛନ୍ତି। ସରକାର ନୂଆ ପ୍ୟାକେଜ ଆଣିବା ଦିଗରେ ପଦକ୍ଷେପ ନେବା ନେଇ ସମ୍ଭାବନା ରହିଛି। ଭାରତ ନିଜର ଉଦ୍ୟମ ଲାଗି ସମାନ ଅବସର ଲାଭ କରିବା ଆବଶ୍ୟକତା ରହିଛି। ଏହାଦ୍ୱାରା ରପ୍ତାନି ବୃଦ୍ଧି ଦିଗରେ ସହାୟତା ମିଳିବ ବୋଲି ସେ ମତବ୍ୟକ୍ତ କରିଛନ୍ତି।