କଳିଙ୍ଗନଗର,୨୩ା୨(ଡି.ଏନ.ଏ.): କଳିଙ୍ଗନଗର ଶିଳ୍ପାଞ୍ଚଳରେ ନବେ ଦଶକରୁ କୃଷି ଧୂଳିସାତ ହୋଇସାରିଛି। ଅନ୍ୟପକ୍ଷରେ ଏହି ଶିଳ୍ପାଞ୍ଚଳରେ ନିଯୁକ୍ତି ନ ପାଇ ଯୁବଗୋଷ୍ଠୀ ହତାଶ ହେଉଥିବାବେଳେ ନିଜ ନାଆରେ ନିଜେ ନାଉରୀ ପାଲଟିଛନ୍ତି ଏଠାକାର ଜଣେ ଉଦ୍ୟମୀ ଚାଷୀ ରାଜେନ୍ଦ୍ର ଘଡ଼ାଇ। ନିଜର ୨ ଏକର ଜମି ମଧ୍ୟରୁ ୧ ଏକର ଜମିରେ ସେ କଶ୍ମୀର କୋଳି ଚାଷ କରିଛନ୍ତି। ଏହି ଚାଷରେ ସେ କେବଳ ନିଜେ ସ୍ବାବଲମ୍ବୀ ହୋଇଛନ୍ତି ତାହା ନୁହେଁ, ଅନ୍ୟ ଦୁଇ ଜଣଙ୍କୁ ରୋଜଗାର ମଧ୍ୟ ଯୋଗାଇ ଦେଇଛନ୍ତି।
ଦାନଗଦି ବ୍ଲକ୍ ମାନତୀରା ପଞ୍ଚାୟତ କେନ୍ଦୁଢିପି ଗ୍ରାମର ଚାଷୀ ରାଜେନ୍ଦ୍ର ଅନ୍ୟମାନଙ୍କ ପରି ଶିଳ୍ପରେ ଶ୍ରମିକ ଭାବେ ୧୨ ଘଣ୍ଟା ଖଟିବାକୁ ଆଦୌ ପସନ୍ଦ କରନ୍ତି ନାହିଁ। ଯୁକ୍ତ ୩ ପଢ଼ିଥିଲେ ମଧ୍ୟ ସେ ନିଜ ପୈତୃକ ଜମିରେ ପାରମ୍ପରିକ ଧାନ ଚାଷ କରୁଥିଲେ। ଗତ ବର୍ଷ ୟୁ-ଟ୍ୟୁବରେ ବିଦେଶୀ କୋଳି ଚାଷ ଓ ତାର ସଫଳତା ଦେଖି ଏଥିପ୍ରତି ସେ ମନ ବଳାଇଥିଲେ। ନିଜର ୧ ଏକର ଜମିରେ ବିଦେଶୀ କୋଳିର ପ୍ରାୟ ୪୦୦ ଚାରା ସେ ଲଗାଇଲେ। ମାତ୍ର ବର୍ଷକ ମଧ୍ୟରେ ସେହି ଗଛରେ ଏବେ ଅନେକ କୋଳି ଫଳିଛି। ଏଠାରେ ୪ ପ୍ରକାର ଗଛ ଲାଗିଛି। ଚାଷୀ ରାଜେନ୍ଦ୍ର ଅଦ୍ୟାବଧି ଖର୍ଚ୍ଚ କରିଥିବା ମୋଟ ୪୦ ହଜାର ଟଙ୍କା ଚଳିତ ବର୍ଷ ଆୟ ହୋଇଯିବା ପରେ ଆଗାମୀ ଫଳରେ ନିଶ୍ଚୟ ଅଧିକ ଲାଭ ମିଳିବ ବୋଲି ଆଶାବ୍ୟକ୍ତ ଅଛନ୍ତି। ଶିଳ୍ପାଞ୍ଚଳର ପ୍ରଦୂଷିତ ପରିବେଶ ମଧ୍ୟରେ ତାଙ୍କର ନିଆରା ପ୍ରୟାସ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି।