ଭୁବନେଶ୍ୱର, ୨୪।୯ (ବ୍ୟୁରୋ):ନନ୍ଦନକାନନ ପ୍ରାଣୀ ଉଦ୍ୟାନର ବାୟୋଲୋଜିଷ୍ଟ ଡ. ରାଜେଶ କୁମାର ମହାପାତ୍ରଙ୍କୁ ୨୦୨୦ ମସିହାର ସମ୍ମାନଜନକ ‘ପ୍ରାଣୀମିତ୍ର ଆୱାର୍ଡ’ ମିଳିବ। କେନ୍ଦ୍ରୀୟ ଚିଡିଆଖାନା ପ୍ରାଧିକରଣ ତରଫରୁ ଅକ୍ଟୋବର ୫ରେ ଅନୁଷ୍ଠିତ ଭର୍ଚୁଆଲ କାର୍ଯ୍ୟକ୍ରମରେ ରାଜେଶଙ୍କ ନାମ ଏହି ସମ୍ମାନ ପ୍ରଦାନ କରାଯିବ। ଏଥିପାଇଁ ଦେଶରୁ ୧୫୦ଜଣ ମନୋନୀତ ହୋଇଥିବାବେଳେ ଓଡ଼ିଶାର କେବଳ ଡ. ରାଜେଶଙ୍କୁ ଏହି ସମ୍ମାନ ପାଇଁ ଘୋଷଣା କରାଯାଇଛି। ଏନେଇ ବୁଧବାର କେନ୍ଦ୍ରୀୟ ଚିଡିଆଖାନା ପ୍ରାଧିକରଣର ଡିଆଇଜି ଡ. ସୋନାଲି ଘୋଷ ପତ୍ର ମାଧ୍ୟମରେ ନନ୍ଦନକାନନ ନିର୍ଦ୍ଦେଶକ ଓ ରାଜ୍ୟ ମୁଖ୍ୟ ବନ୍ୟପ୍ରାଣୀ ତତ୍ତ୍ୱାବଧାରକଙ୍କୁ ଜଣାଇଛନ୍ତି। ସୂଚନାଯୋଗ୍ୟ, ବନ୍ୟପ୍ରାଣୀ ଗବେଷଣା କ୍ଷେତ୍ରରେ ଡ. ମହାପାତ୍ର ବେଶ୍ ଚର୍ଚ୍ଚିତ। ବଜ୍ରକାପ୍ତା ବିଶେଷଜ୍ଞ ଭାବେ ରାଜେଶଙ୍କୁ ଆନ୍ତର୍ଜାତିକ ମାନ୍ୟତା ମିଳିଛି। ତାଙ୍କର ଅନେକ ଗବେଷଣାତ୍ମକ ନିବନ୍ଧ ପ୍ରତିଷ୍ଠିତ ଆନ୍ତର୍ଜାତିକ ଜର୍ନାଲରେ ମଧ୍ୟ ପ୍ରକାଶ ପାଇଛି।