ଭୁବନେଶ୍ୱର, ୨୯।୫(ବ୍ୟୁରୋ): ଚକରା ଗ୍ୟାଙ୍ଗରେ ସାମିଲ ହୋଇ ରାଜଧାନୀର ବିଭିନ୍ନ ସ୍ଥାନରୁ ବନ୍ଧୁକ ମୁନରେ ଆତଙ୍କ ଖେଳାଇ ଲୁଟ୍ପାଟ, ରାହାଜାନି, ଡକାୟତି ଭଳି ଅପରାଧରେ ଜଡ଼ିତ ୨ଅଭିଯୁକ୍ତ ରାଜେଶ ମହାପାତ୍ର ଓ ରବିନ ଶତପଥୀଙ୍କୁ ୫ ଦିନିଆ ରିମାଣ୍ଡରେ ଆଣିଛି ଖଣ୍ଡଗିରି ଥାନା ପୋଲିସ। ଅଭିଯୁକ୍ତଦ୍ୱୟଙ୍କୁ ୧୦ଦିନିଆ ରିମାଣ୍ଡରେ ନେବା ପାଇଁ ଖଣ୍ଡଗିରି ଥାନା ପୋଲିସ ଭୁବନେଶ୍ୱର ଏସ୍ଡିଜିଏମ୍ କୋର୍ଟରେ ଆବେଦନ କରିଥିଲା।
ସୂଚନାନୁଯାୟୀ ୧୯ ବର୍ଷରେ ଅପରାଧ ଜଗତରେ ପାଦ ଥାପିଥିବା ରାଜେଶ ପ୍ରଥମେ ଏକ ଛୋଟ ଗ୍ୟାଙ୍ଗ କରି ଲୁଟ ଓ ଡକାୟତି କରୁଥିଲେ। ପରେ ସେ ଚକରା ଗ୍ୟାଙ୍ଗରେ ସାମିଲ ହୋଇ ଭୁବନେଶ୍ୱରରେ ଲୋକଙ୍କୁ ମାରଣାସ୍ତ୍ର ଦେଖାଇ ଗହଣା, ମୋବାଇଲ, ପର୍ସ ଓ ଟଙ୍କା ଝାମ୍ପି ନେଉଥିଲେ। ଏପରିକି ବ୍ୟବସାୟୀଙ୍କୁ ଟାର୍ଗେଟ କରି ଟଙ୍କା ଲୁଟ୍ କରି ଫେରାର ହୋଇଯାଉଥିଲେ, ଯାହାକି କମିଶନରେଟ ପୋଲିସ ପାଇଁ ମୁଣ୍ଡବିନ୍ଧାର କାରଣ ସାଜିଥିଲେ। ଗତ ୧୩ରେ ବରମୁଣ୍ଡାରେ ବଡ଼ ଧରଣର ଡକାୟତି ଯୋଜନା ହୋଇଥିବା ବିଶେଷ ସୂତ୍ରରୁ ଖବର ପାଇ ପୋଲିସ ଚଢାଉ କରି ଧରିବା ପାଇଁ ଚେଷ୍ଟା କରିଥିଲା। ଏହି ସମୟରେ ଚକରା ପୋଲିସ ଉପରକୁ ଗୁଳି ଚଳାଇ ଫେରାର ହେବାକୁ ଉଦ୍ୟମ କରୁଥିବା ବେଳେ ପୋଲିସ ଏନ୍କାଉଣ୍ଟର କରିବାରୁ ଚକରା ଗୋଡ଼ରେ ଗୁଳି ବାଜିବାରୁ ସେ ତଳେ ପଡ଼ିଯାଇଥିଲେ। ଫଳରେ ତାକୁ ଧରିବାରେ ସହଜ ହୋଇଥିଲା। ତେବେ ଚକରାଙ୍କୁ ଏନକାଉଣ୍ଟର ପରେ ରାଜେଶ ଭୟରେ ଗତ ୨୬ତାରିଖରେ କୋର୍ଟରେ ଆତ୍ମସମର୍ପଣ କରିଥିଲେ। ଏବେ ରାଜେଶଙ୍କୁ ରିମାଣ୍ଡରେ ନେଇ ଏହି ଗ୍ୟାଙ୍ଗର ପୂରା ସୁରାକ ଖୋଜିବ ପୋଲିସ। ଏଯାବତ ଚକରା ଗ୍ୟାଙ୍ଗରେ ରାଜେଶଙ୍କ ମା’ଙ୍କୁ ମିଶାଇ ମୋଟ ୮ ଜଣ ଗିରଫ ହୋଇଛନ୍ତି ।