ମୁମ୍ବାଇ,୨୫ ।୭: ସାଉଥ ସୁପରଷ୍ଟାର ରଜନୀକାନ୍ତ ନିୟମିତ ଭାବେ ଆୟକର ପଇଠ କରିଥିବାରୁ ମୁମ୍ବାଇ ଇନକମ ଟ୍ୟାକ୍ସ ଡିପାର୍ଟମେଣ୍ଟ ତାଙ୍କୁ ସମ୍ମାନୀତ କରିଛି । ତାଙ୍କ ଝିଅ ଐଶ୍ୱଯ୍ୟା ରଜନୀକାନ୍ତ ଇନଷ୍ଟାଗ୍ରାମ ଜରିଆରେ ଏହି ସୂଚନା ଦେଇଛନ୍ତି । ଏହି ସମ୍ମାନ କେବଳ ତାଙ୍କ ପରିବାର ପାଇଁ ନୁହେଁ ବରଂ ତାଙ୍କ ପ୍ରଶଂସକଙ୍କ ପାଇଁ ବି ଗୁରୁତ୍ୱ ରଖେ ।
ଦକ୍ଷିଣ ଭାରତରେ ଲୋକେ ରଜନୀକାନ୍ତଙ୍କୁ ‘ଭଗବାନ’ ବୋଲି ମାନନ୍ତି । ତେଣୁ ତାଙ୍କ ସହ ଜଡିତ ଛୋଟ ଛୋଟ କଥା କେତେ ଗୁରୁତ୍ୱ ରଖେ ତାହା ସହଜରେ ଅନୁମାନ କରାଯାଇପାରେ । ଏହା ତ ଏକ ବଡ ସମ୍ମାନ । ତେଣୁ ସୋସିଆଲ ମିଡିଆରେ ପ୍ରଶଂସକ ତାଙ୍କୁ ଶୁଭେଚ୍ଛା ଜଣାଉଛନ୍ତି ।
ଗତ ରବିବାର ଚେନ୍ନାଇରେ ଇନକମ ଟ୍ୟାକ୍ସ ଡେ ପାଳନ କରାଯାଇଥିଲା । ଏହି ଅବସରରେ ରଜନୀକାନ୍ତ ସମୟ ଅନୁଯାୟୀ ନିମିତ ଭାବେ ଟ୍ୟାକ୍ସ ଭରଣା କରିଥିବାରୁ ଇନକମ ଟ୍ୟାକ୍ସ ଡିପାର୍ଟମେଣ୍ଟ ତାଙ୍କୁ ସମ୍ମାନିତ କରିଛି । ପିତା ରଜନୀକାନ୍ତଙ୍କ ପକ୍ଷରୁ ଝିଅ ଐଶ୍ୱର୍ଯ୍ୟା ଏହି ସମ୍ମ୍ାନ ଗ୍ରହଣ କରିଛନ୍ତି । ଏହି ଆୱାର୍ଡ ତେଲେଙ୍ଗାନାର ରାଜ୍ୟପାଳ ତମିଲିସାଇ ସୁନ୍ଦରରାଜନ ପ୍ରଦାନ କରିଛନ୍ତି ।
ପିତା ରଜନୀକାନ୍ତଙ୍କୁ ଏହି ସମ୍ମାନ ମିଳିବା ଅବସରରେ ଝିଅ ଐଶ୍ୱର୍ଯ୍ୟା ଇନଷ୍ଟାଗ୍ରାମରେ ତାଙ୍କର କିଛି ଫଟୋ ଶେୟାର କରିଛନ୍ତି । ଏହାସହ କ୍ୟାପଶନରେ ଲେଖିଛନ୍ତି, ସବୁଠାରୁ ଅଧିକ ଓ ନିୟମିତ ଟ୍ୟାକ୍ସ ଦଉଥିବା ପିତାଙ୍କର ଜଣେ ଗର୍ବିତ ଝିଅ । ଇନକମ ଟ୍ୟାକ୍ସ ଡେ’ ୨୦୨୨ ଅବସରରେ ବାପାଙ୍କୁ ସମ୍ମାନିତ କରିଥିବାରୁ, ତାମିଲନାଡୁ ଓ ପୁଡୁଚେରୀର ଇନକମ ଟ୍ୟାକ୍ସ ଡିପାର୍ଟମେଣ୍ଟକୁ ଧନ୍ୟବାଦ ଦେଇଛନ୍ତି ।
ଐଶ୍ୱର୍ଯ୍ୟାଙ୍କ ଏହି ପୋଷ୍ଟରେ ପ୍ରଶଂସକ ଖୁବ୍ କମେଣ୍ଟ କରୁଛନ୍ତି । ଜଣେ ଲେଖିଛନ୍ତି ‘ଥାଲାଇବା’ ଷ୍ଟାରଙ୍କର ଏକ ସଚେତନ ନାଗରିକ ହୋଇଥିବାରୁ ଗର୍ବ କରୁଛୁ । ଅନ୍ୟ ଜଣେ ଲେଖିଛନ୍ତି ରଜନୀକାଙ୍କ, ପ୍ରଶଂସକ ହୋଇଥିବାରୁ ଗର୍ବ ଅନୁଭବ କରୁଛି ।
