ନୂଆଦିଲ୍ଲୀ,୧୩।୧୨: ଅରୁଣାଚଳ ପ୍ରଦେଶର ତୱାଙ୍ଗରେ ଭାରତ-ଚାଇନା ସୈନଙ୍କ ମଧ୍ୟରେ ହୋଇଥିବା ସଂଘର୍ଷକୁ ନେଇ ପାର୍ଲାମେଣ୍ଟରେ ବିରୋଧୀମାନେ ସରକାରଙ୍କୁ ଘେରି ରହିଛନ୍ତି। ଏହି ପ୍ରସଙ୍ଗରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା କଂଗ୍ରେସ ଉପରେ ବର୍ଷିଛନ୍ତି। ମଙ୍ଗଳବାର ଗୃହରେ ଅମିତ ଶାହା ରାଜୀବ ଗାନ୍ଧୀ ଫାଉଣ୍ଡେସନର ବୈଦେଶିକ ଯୋଗଦାନ ନିୟମାବଳୀ (ଏଫସିଆରଏ) ଲାଇସେନ୍ସ ବାତିଲକୁ ନେଇ କହିଛନ୍ତି, କଂଗ୍ରେସ ବ୍ୟକ୍ତିଗତ ସମ୍ପର୍କ ଗଢିବା ପାଇଁ ସୁରକ୍ଷା ପରିଷଦର ସଦସ୍ୟତା ଉପହାର ଦେଇଛି। ରାଜୀବ ଗାନ୍ଧୀ ଫାଉଣ୍ଡେସନ ୨୦୦୫-୦୮ ମଧ୍ୟରେ ଚାଇନା ଦୂତାବାସଠାରୁ ୧.୩୫ କୋଟି ଟଙ୍କା ଅନୁଦାନ ପାଇଥିଲା। କଂଗ୍ରେସ ଶାସନ ସମୟରେ ୧୮ କିଲୋମିଟର ଜମି ଜବରଦଖଲ କରାଯାଇଥିଲା, କିନ୍ତୁ ଭାଜପା ଶାସନ ଅଧୀନରେ ଏହା ହୋଇପାରିବ ନାହିଁ। ଭାରତର ଇଞ୍ଚ ଜମି କେହି ଦଖଲ କରିପାରିବେ ନାହିଁ। ଆମ ସୈନ୍ୟଙ୍କ ଦ୍ୱାରା ଡିସେମ୍ବର ୮ ରାତିରେ ଏବଂ ୯ ସକାଳରେ ଦେଖାଯାଇଥିବା ସାହସିକତାକୁ ନିହାତି ପ୍ରଶଂସନୀୟ। ସେନା ସମସ୍ତ ଅନୁପ୍ରବେଶକାରୀଙ୍କୁ ଘଉଡାଇ ଆମ ଦେଶକୁ ସୁରକ୍ଷା ଦେଇଥିଲା।
ସୂଚନାଯୋଗ୍ୟ, ଅରୁଣାଚଳ ପ୍ରଦେଶର ତୱାଙ୍ଗ ଠାରେ ଭାରତ ଏବଂ ଚାଇନା ମଧ୍ୟରେ ପୁଣି ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି। ଏଥିରେ ୬ ଜଣ ଭାରତୀୟ ସେନା ଆହତ ହୋଇଥିବା ବେଳେ ଚାଇନାର ୧୨ରୁ ଅଧିକ ସେନା ଆହତ ହୋଇଛନ୍ତି।