ଚେନ୍ନାଇ,୧୫।୧୧ : ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ହତ୍ୟାରେ ଦୋଷୀ ସାବ୍ୟସ୍ତ ହୋଇଥିବା ରବର୍ଟ ପାୟସ ଏବଂ ଜୟକୁମାର ସ୍ବତନ୍ତ୍ର କ୍ୟାମ୍ପରୁ ଖଲାସ ହେବା ପାଇଁ ହାଇକୋର୍ଟରେ ଆବେଦନ କରିଛନ୍ତି। ରବର୍ଟ ପାୟସ ଏବଂ ଜୟକୁମାର ବର୍ତ୍ତମାନ ତ୍ରିଚିରେ ଅବସ୍ଥିତ ସ୍ବତନ୍ତ୍ର କ୍ୟାମ୍ପରେ ରହିଛନ୍ତି। ଉଭୟଙ୍କୁ ଗତ ବର୍ଷ ମୁରୁଗାନର ପୁଜାଲ ସେଣ୍ଟ୍ରାଲ ଜେଲରୁ ତ୍ରିଚିର ସ୍ବତନ୍ତ୍ର କ୍ୟାମ୍ପକୁ ସ୍ଥାନାନ୍ତର କରାଯାଇଥିଲା। ଏବେ ଦୁହେଁ ମାଡ୍ରାସ ହାଇକୋର୍ଟର ମଦୁରାଇ ବେଞ୍ଚରେ ଖଲାସ ପାଇଁ ଆବେଦନ କରିଛନ୍ତି।
ରବର୍ଟ ପାୟସ ଏବଂ ଜୟକୁମାର ଗୋଟିଏ କୋଠରୀରେ ବନ୍ଦ ରହିଛନ୍ତି। ଅନ୍ୟ ଏକ କୋଠରୀରେ, ଏମଟି ସନ୍ଥନ ଏବଂ ମୁରୁଗାନ ବନ୍ଦ ଅଛନ୍ତି। ରାଜୀବ ଗାନ୍ଧୀଙ୍କ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇଥିବା ଏମ.ଟି ସନ୍ଥନ ମଧ୍ୟ ସ୍ପେଶାଲ କ୍ୟାମ୍ପରୁ ଖଲାସ ହେବାକୁ ଦାବି କରିଛନ୍ତି। ସନ୍ଥନ ଅଭିଯୋଗ କରିଛନ୍ତି ସ୍ବତନ୍ତ୍ର କ୍ୟାମ୍ପ ରୁମରେ ଥିବା ଝରକା ମଧ୍ୟ ବନ୍ଦ ରହୁଛି। ତାଙ୍କର ଅନ୍ୟ ଲୋକଙ୍କୁ ଭେଟିବାର ସ୍ବାଧୀନତା ନାହିଁ। ଏହି କ୍ୟାମ୍ପ ଅପେକ୍ଷା ଜେଲ ତାଙ୍କ ପାଇଁ ଭଲ ବୋଲି ସେ କହିଛନ୍ତି।
ଗତ ବର୍ଷ ନଭେମ୍ବରରେ ରାଜୀବ ଗାନ୍ଧୀଙ୍କ ହତ୍ୟା ମାମଲାରେ ଅଭିଯୁକ୍ତଙ୍କୁ ମୁକ୍ତ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ଯାହା ପରେ ଏହି ଦୋଷୀମାନଙ୍କୁ ଏକ ସ୍ବତନ୍ତ୍ର କ୍ୟାମ୍ପରେ ରଖାଯାଇଥିଲା। ୧୯୧୯ ରେ ତାମିଲନାଡୁର ଶ୍ରୀପେରୁମ୍ବୁଦୁରରେ ଆତ୍ମଘାତୀ ଆକ୍ରମଣରେ ରାଜୀବ ଗାନ୍ଧୀଙ୍କୁ ହତ୍ୟା କରାଯାଇଥିଲା। ପୂର୍ବତନ ପ୍ରଧାନମନ୍ତ୍ରୀଙ୍କ ହତ୍ୟା ମାମଲାରେ ମୁରୁଗାନ, ନଳିନି, ଏଜି ପେରିଭାଲାନ, ସନ୍ଥନ, ଜୟକୁମାର, ରବର୍ଟ ପାୟସ ଏବଂ ପି ରବିଚନ୍ଦ୍ରନଙ୍କ ସମେତ ୭ ଜଣ ଦୋଷୀ ସାବ୍ୟସ୍ତ ହୋଇଥିଲେ। ସମସ୍ତଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା। ଯାହା ପରେ ଆଜୀବନ କାରାଦଣ୍ଡରେ ପରିଣତ ହୋଇଥିଲା। ମେ ୨୦୨୨ ରେ ଏଜି ପେରିଭାଲାନ ଜେଲରୁ ମୁକ୍ତ ହୋଇଥିଲେ।