ମୁମ୍ବାଇ: ବଲିଉଡ୍ ନିର୍ଦ୍ଦେଶକ ହଂସଲ ମେହେତାଙ୍କ ନିର୍ଦ୍ଦେଶିତ ଫିଲ୍ମ ଓମେର୍ଟାକୁ ଥିଏଟର ପରେ ଏବେ ଡିଜିଟାଲ ପ୍ଲାଟଫର୍ମରେ ରିଲିଜ୍ କରାଯିବାକୁ ନିଷ୍ପତ୍ତି ନିଆଯାଇଛି। ଜୁଲାଇ ୨୫ରେ ଜି୫ରେ ଏହାକୁ ରିଲିଜ୍ କରାଯିବ ବୋଲି ବୁଧବାର ସୂଚନା ମିଳିଛି। ନିର୍ଦ୍ଦେଶକ ହଂସଲ ମେହେତା ଓ ରାଜକୁମାର ଓମେର୍ଟାର ଡିଜିଟାଲ ରିଲିଜ୍ରେ ବେଶ୍ ଖୁସି ଥିବା ଜଣାପଡ଼ିଛି। ଏହି ଚଳଚ୍ଚିତ୍ରଟି ବ୍ରିଟିଶ ବୋର୍ନ ପାକିସ୍ତାନୀ ଆତଙ୍କବାଦୀ ଓମାର ଶାହିଦ ଶେଖଙ୍କ ଉପରେ ଆଧାରିତ ହୋଇଛି। ଏଥିରେ ରାଜକୁମାର ରାଓ ଆତଙ୍କବାଦୀ ଓମାରଙ୍କ ଚରିତ୍ରରେ ଅଭିନୟ କରିଛନ୍ତି। ଏହି ଚରିତ୍ରରେ ନିଜକୁ ଢ଼ାଳିବାକୁ ରାଜକୁମାରଙ୍କ ପାଇଁ ସହଜ ହୋଇ ନ ଥିବା ବେଳେ ଏହା ତାଙ୍କ ପାଇଁ ଏକ ଚ୍ୟାଲେଞ୍ଜିଂ ପାଲଟିଥିଲା। ସୂଚନାଯୋଗ୍ୟ, ୨୦୧୭ରେ ଟରୋଣ୍ଟୋ ଫିଲ୍ମ ଫେଷ୍ଟିଭାଲରେ ଓମେର୍ଟାର ବିଶ୍ୱ ପ୍ରିମିୟର ହୋଇଥିଲା। ଏତଦ୍ବ୍ୟତୀତ ଏହି ଫିଲ୍ମଟିକୁ ଅନେକ ଇଣ୍ଟରନ୍ୟାସନାଲ ଫିଲ୍ମ ଫେଷ୍ଟିଭାଲରେ ମଧ୍ୟ ପ୍ରଦର୍ଶିତ କରାଯାଇସାରିଛି। କିନ୍ତୁ ଭାରତ ଥିଏଟରରେ ଓମେର୍ଟା ୨୦୧୮ ମେ ୪ରେ ରିଲିଜ୍ ହୋଇଥିଲା। ଏହି ଚଳଚ୍ଚିତ୍ରରେ ରାଜକୁମାର ରାଓଙ୍କ ଅଭିନୟକୁ ବେଶ୍ ପ୍ରଶଂସା କରାଯାଇଥିଲା। ଯଦିଓ ଏହି ଫିଲ୍ମ ଭାରତୀୟ ବକ୍ସ ଅଫିସରେ ଏତେଟା ସଫଳତା ହାସଲ କରି ନ ଥିଲା କିନ୍ତୁ ଏହାକୁ ୫୦୦ ପରଦାରେ ରିଲିଜ୍ କରାଯାଇଥିଲା।