ରାଜନଗର,୧୯ା୧ (ଭାସ୍କର ରାଉତରାୟ): ରାଜନଗର ବ୍ଲକ କୋଇଲିପୁର ପଞ୍ଚାୟତ ବଡ଼ପଲ୍ଲୀ ପ୍ରାଥମିକ ବିଦ୍ୟାଳୟରୁ ସବ୍ଷ୍ଟେଶନ ସ୍କୋୟାର ରୋଡ ଯାଇଛି। ଏହି ରାସ୍ତା ସବ୍ଷ୍ଟେଶନ ନିକଟରେ ତନ୍ତିଆପାଳ-ବଡ଼ପଲ୍ଲୀ ରାସ୍ତାକୁ ସଂଯୋଗ କରିଛି। ଏହି ରାସ୍ତା ଅବସ୍ଥା ଶୋଚନୀୟ ଯୋଗୁ ଛାତ୍ରୀଛାତ୍ରମାନେ ହଇରାଣ ହେଉଛନ୍ତି। ଅବସ୍ଥା ଶୋଚନୀୟ ଯୋଗୁ ଲୋକେ ରାସ୍ତାରେ ଯାଇ ପାରୁ ନ ଥିବା ବେଳେ ସରକାରୀ ରେକର୍ଡରେ କିନ୍ତୁ ରାସ୍ତା ଚକାଚକ ରହିଛି। ରାସ୍ତା ଚକାଚକ କରାଯାଇଥିବା ଦର୍ଶାଇ ବର୍ଷେ ଭିତରେ ତିନି ତିନିଟି ଯୋଜନାରେ ୭ ଲକ୍ଷ ୭୮ ହଜାର ୭୮୮ ଟଙ୍କା ଉଠାଇ ନିଆଯାଇଥିବା ବେଳେ ୫ବର୍ଷରେ ଏହି ୨୫୦ ମିଟର ରାସ୍ତାକୁ ୯ ଥର ନିର୍ମାଣ ଓ ମରାମତି କରାଯାଇଥିବା ଦର୍ଶାଇ ୧୮ ଲକ୍ଷ ୯୯ ହଜାର ୭୬୫ ଟଙ୍କା ଉଠାଇ ନିଆଯାଇଛି। ଏ ନେଇ ଖବର ପ୍ରକାଶ ପାଇବା ପରେ ବ୍ଲକ ପ୍ରଶାସନ ତଦନ୍ତ କରି କାର୍ଯ୍ୟାନୁଷ୍ଠାନ ନେବା ବଦଳରେ ହାତ ବାନ୍ଧି ବସିଥିଲା। ଗୁରୁବାର କେନ୍ଦ୍ରାପଡା ଭିଜିଲାନ୍ସ ବିଭାଗ ଦୁର୍ନୀତିକୁ ନେଇ ନିଜ ଆଡୁ ତଦନ୍ତ ଆରମ୍ଭ କରିବା ପରେ ବ୍ଲକ ପ୍ରଶାସନ ଓ କର୍ମଚାରୀଙ୍କ ମହଲରେ କୋକୁଆ ଭୟ ସୃଷ୍ଟି ହୋଇଛି। କେନ୍ଦ୍ରାପଡା ଭିଜିଲାନ୍ସ ଟିମ୍ ରାଜନଗର ବ୍ଲକ କାର୍ଯ୍ୟାଳୟରେ ପହଞ୍ଚତ୍ ଏହି ରାସ୍ତାରେ କେତେ ଟଙ୍କା ଖର୍ଚ୍ଚ ହୋଇଛି, କେଉଁ କେଉଁ ଯୋଜନାରେ ଖର୍ଚ୍ଚ ହୋଇଛି, ସମସ୍ତ ଫାଇଲ ଓ ଏମ୍ବି ଜବତ କରି ନେଇ ଯାଇଛନ୍ତି।
ସରକାରୀ ତଥ୍ୟ ଅନୁଯାୟୀ, ବଡ଼ପଲ୍ଲୀ ପ୍ରାଥମିକ ବିଦ୍ୟାଳୟରୁ ସବ୍ଷ୍ଟେଶନ ରାସ୍ତାକୁ ସିମେଂଟ କଂକ୍ରିଟ ରୋଡ ଯୋଜନାରେ ନିର୍ମାଣ କରାଯାଇଥିବା ଦର୍ଶାଇ ୨୦ ଜୁଲାଇ ୨୦୧୮ରେ ୧ ଲକ୍ଷ ୮୩ ହଜାର ୪୯୬ ଟଙ୍କା, ଷ୍ଟେଟ ଫାଇନାନ୍ସ କମିଶନ ଅର୍ଥରେ ୪ ଅକ୍ଟୋବର ୨୦୧୯ରେ ୩ ଲକ୍ଷ ୫୫ ହଜାର ୬୬୭ ଟଙ୍କା, ବିପର୍ଯ୍ୟୟ ରିଲିଫ୍ ପାଣ୍ଠିରୁ ଏହି ରାସ୍ତାର ମରାମତି ଓ ପୁନଃନିର୍ମାଣ ନାଁରେ ୨୪ ଫେବୃଆରୀ ୨୦୨୧ରେ ୧ ଲକ୍ଷ ୮୩ ହଜାର ୮୮୭ ଟଙ୍କା, ୧୨ ଅକ୍ଟୋବର ୨୦୨୧ରେ ବିପର୍ଯ୍ୟୟ ରିଲିଫ ପାଣ୍ଠିରେ ଏହି ରାସ୍ତାର ମରାମତି ନାଁରେ ୫୫ ହଜାର ୯୭୫ ଟଙ୍କା, ୨୦ ନଭେମ୍ବର ୨୦୨୧ରେ ଷ୍ଟେଟ ଫାଇନାନ୍ସ କମିଶନ ଅର୍ଥରେ ଏହି ରାସ୍ତା ନିର୍ମାଣ ନାଁରେ ୨ ଲକ୍ଷ ୮୦ ହଜାର ୧୪୪ ଟଙ୍କା, ୨୭ ଡିସେମ୍ବର ୨୦୨୧ରେ ବିପର୍ଯ୍ୟୟ ରିଲିଫ ପାଣ୍ଠିରୁ ଏହି ରାସ୍ତା ମରାମତି ନାଁରେ ୬୧ ହଜାର ୮୦୮ ଟଙ୍କା, ଷ୍ଟେଟ ଫାଇନାନ୍ସ କମିଶନ ଅର୍ଥରେ ରାସ୍ତା ପୁନଃନିର୍ମାଣ ନାଁରେ ୨୨ ଡିସେମ୍ବର ୨୦୨୨ରେ ୧ ଲକ୍ଷ ୯୧ ହଜାର ୫୦୬ ଟଙ୍କା, ୩ ମାର୍ଚ୍ଚ୨୦୨୩ରେ ସାଂସଦ ପାଣ୍ଠିରୁ ରାସ୍ତା ପୁନଃ ନିର୍ମାଣ ନାଁରେ ୪ ଲକ୍ଷ ୮୦ ହଜାର ୬୩୨ ଟଙ୍କା ଓ ଏମ୍ଜିଏନ୍ଆର୍ଇଜିଏସରେ ଏହି ରାସ୍ତାର ଦୁଇପାର୍ଶ୍ୱରେ ମାଟି ଫିଲିଂ ନାଁରେ ୬ ଜୁନ ୨୦୨୩ରୁ ୨୦ ଜୁନ ୨୦୨୩ ମଧ୍ୟରେ ଶ୍ରମିକ ମଜୁରୀ ବାବଦକୁ ୧ ଲକ୍ଷ ୬ ହଜାର ୬୫୦ ଟଙ୍କା ଉଠାଇ ନିଆଯାଇଛି। ୨୦୧୮ରେ ଏହି ରାସ୍ତାକୁ କଂକ୍ରିଟ କରଣ କରାଯାଇଥିବା ବେଳେ ୨୦୧୯ରେ ରାସ୍ତାକୁ ପୂର୍ଣ୍ଣାଙ୍ଗ କରାଯାଇଥିବା ଦର୍ଶାଯାଇଛି। ୨୦୨୧ରେ ରାସ୍ତା ପୁନଃନିର୍ମାଣ ପାଇଁ ଦୁଇଟି ଯୋଜନାରେ ୪ଥର ବିଲ କରାଯାଇଛି। ପରେ ୭ ଜାନୁଆରୀ ୨୦୨୨ରେ ରାସ୍ତା ଉଦ୍ଘାଟନ କରାଯାଇଛି। ରାସ୍ତା ଉଦଘାଟନ ପରେ ରାସ୍ତାର କିଛି ଅଂଶ ଏବେ ଯାଏଁ ଭୁଷୁଡି ପଡ଼ି ରହିଛି। ରାସ୍ତା ଯିବା ଆସିବା କରି ହେଉନାହିଁ। ମାତ୍ର ଡିସେମ୍ବର ୨୦୨୨ରୁ ଜୁନ୍ ୨୦୨୩ ମଧ୍ୟରେ ତିନି ତିନିଟି ଯୋଜନାରେ ରାସ୍ତା ପୁନଃନିର୍ମାଣ ନାଁରେ ସରକାରୀ ଅର୍ଥ ଉଠାଇ ନିଆଯାଇଥିବା ବେଳେ ରାସ୍ତା ନିର୍ମାଣ ନହେବା ଘଟଣା ସବୁ ମହଲକୁ ଆଶ୍ଚର୍ଯ୍ୟ ଚକିତ କରିଛି।