ନୂଆଦିଲ୍ଲୀ,୧୫।୧୦ : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଶନିବାର ଅନ୍ତର୍ଜାତୀୟ ସାମୁଦ୍ରିକ କ୍ଷେତ୍ରରେ ଚାଇନାର ବୃଦ୍ଧି ପାଉଥିବା ଅନୈତିକ କାର୍ଯ୍ୟ ନେଇ ଏକ ପରୋକ୍ଷ ଚେତାବନୀ ଦେଇଛନ୍ତି। ଏସୀୟ କୋଷ୍ଟଗାର୍ଡ ଏଜେନ୍ସିଗୁଡିକର ଏକ ବୈଠକକୁ ସମ୍ବୋଧିତ କରି ସେ କହିଛନ୍ତି ଯେ ଆମେ ଭାରତ-ପ୍ରଶାନ୍ତ ମହାସାଗରରେ ଖୋଲା ନିୟମ ଭିତ୍ତିକ ସାମୁଦ୍ରିକ ସୀମା ସପକ୍ଷରେ ଅଛୁ। କୌଣସି ଦେଶ, ଯେତେ ବଡ଼ ହେଉନା କାହିଁକି, ବିଶ୍ୱର ମାର୍ଗରେ ବାଧା ଦେବାକୁ କିମ୍ବା ଅନ୍ୟମାନଙ୍କୁ ଏହାର ଉଚିତ ବ୍ୟବହାରରୁ ବଞ୍ଚିତ କରିବାକୁ ଅନୁମତି ଦିଆଯାଇପାରିବ ନାହିଁ ।
ରାଜନାଥ ସିଂ ଏହା ମଧ୍ୟ କହିଛନ୍ତି ଯେ ସାମୁଦ୍ରିକ ସୁରକ୍ଷା ସମ୍ବନ୍ଧରେ ଅନ୍ତର୍ଜାତୀୟ ନିୟମ ଲାଗୁ କରିବାକୁ ଭାରତ ପ୍ରତିବଦ୍ଧ। ସାମୁଦ୍ରିକ ସୁରକ୍ଷା ପାଇଁ ଆଇନ ପ୍ରସ୍ତୁତ କରିବା, ଏହାର କାର୍ଯ୍ୟକାରିତା ପାଇଁ ବିଭିନ୍ନ ଦେଶ ସହିତ ସହଯୋଗ ସ୍ଥାପନ ଏବଂ ସାମୁଦ୍ରିକ ଆଇନ ପ୍ରଣୟନକାରୀ ସଂସ୍ଥାଗୁଡ଼ିକର ଦକ୍ଷତା ବୃଦ୍ଧି କରିବାକୁ ଆମକୁ ପ୍ରଭାବଶାଳୀ ପ୍ରଣାଳୀ ଗ୍ରହଣ କରିବାକୁ ପଡିବ ବୋଲି ସେ କହିଛନ୍ତି।
ସମୁଦ୍ରରେ ଡକାୟତି ଘଟଣାରେ ବିରୋଧରେ ଆଞ୍ଚଳିକ ସହଯୋଗ ଚୁକ୍ତି ନେଇ ଭାରତ ଉତ୍ସାହିତ ଅଛି। ସମୁଦ୍ରରେ ନିରାପତ୍ତା ସୁନିଶ୍ଚିତ କରିବା ପାଇଁ ଆମେ ପାରସ୍ପରିକ ସହଯୋଗକୁ ସବୁଠାରୁ ପ୍ରଭାବଶାଳୀ ଉପାୟ ଭାବରେ ବିବେଚନା କରୁଛୁ ବୋଲି ରାଜନାଥ କହିଛନ୍ତି।