ନୂଆଦିଲ୍ଲୀ,୧୦ ।୬: କିଣା ବିକା ବା ଘୋଡା ବେପାର ଭଳି ଅଭିଯୋଗ ମଧ୍ୟରେ ଶୁକ୍ରବାର ୧୬ ରାଜ୍ୟ ସଭା ଆସନ ପାଇଁ ହେବାକୁ ଯାଉଛି ନିର୍ବାଚନ । ଏହାକୁ ଦୃଷ୍ଟିରେ ରଖି କଂଗ୍ରେସ ଓ ଭାରତୀୟ ଜନତା ପାର୍ଟି(ଭାଜପା) ନିଜ ନିଜର ବିଧାୟକମାନଙ୍କୁ ହୋଟେଲ ଓ ରିସୋର୍ଟରେ ରଖିଛନ୍ତି । ଏହି ନିର୍ବାଚନରେ ଯେଉଁମାନଙ୍କ ଭାଗ୍ୟ ନିଦ୍ଧାରଣ କରାଯିବ ସେମାନଙ୍କ ମଧ୍ୟରେ କେନ୍ଦ୍ରମନ୍ତ୍ରୀ ନିର୍ମଳା ସିତାରାମଣ ଓ ପିୟୁଷ ଗୋୟଲ, କଂଗ୍ରେସର ରଣଦୀପ ସୁରଜେୱାଲା, ଜୟରାମ ରମେଶ ଓ ମୁକୁଲ ବାସନିକ, ଶିବସେନା ନେତା ସଞ୍ଜୟ ରାଉତ ମୁଖ୍ୟ ବୋଲି କୁହାଯାଉଛି । ଏହି ରାଜନେତାମାନେ ବିନା କୌଣସି ବାଧାରେ ବିଜୟ ଲାଭ କରିବେ ବୋଲି ଆଶା କରାଯାଉଛି ।
ସୂଚନାଯୋଗ୍ୟ, ନିକଟରେ ରାଜ୍ୟ ସଭାର ୫୭ଟି ଆସନ ପାଇଁ ଦ୍ୱିବାର୍ଷିକ ନିର୍ବାଚନର ଘୋଷଣା କରାଯାଇଥିଲା । ଉତ୍ତର ପ୍ରଦେଶ, ତାମିଲନାଡୁ, ବିହାର, ଆନ୍ଧ୍ରପ୍ରଦେଶ, ମଧ୍ୟପ୍ରଦେଶ, ଓଡ଼ିଶା, ଛତିଶଗଡ, ପଞ୍ଜାବ, ତେଲେଙ୍ଗାନା, ଝାଡଖଣ୍ଡ ଓ ଉତ୍ତରାଖଣ୍ଡର ସମସ୍ତ ୪୧ ପ୍ରାର୍ଥୀ ଗତ ଶୁକ୍ରବାର ନିର୍ଦ୍ଦୋନ୍ଦ୍ୱରେ ନିର୍ବାଚିତ ହୋଇଥିଲେ । ତେବେ ହରିୟାଣ. ରାଜସ୍ଥାନ, ମହାରାଷ୍ଟ୍ର ଓ କର୍ନାଟକର ୧୬ ଆସନ ଲାଗି ଶୁକ୍ରବାର ନିର୍ବାଚନ ହେବାକୁ ଯାଉଛି । କାରଣ ଏସବୁ ରାଜ୍ୟରେ ଆସନ ଅପେକ୍ଷା ପ୍ରାର୍ଥୀଙ୍କ ସଂଖ୍ୟା ଅଧିକ ରହିଛି ।