Rajya Sabha Elections 2024: ରାଜ୍ୟ ସଭା ଏମପିଙ୍କୁ ମିଳେ ଏତେ ଦରମା, ସେମାନଙ୍କ ପାଇଁ ରହିଛି ଏହିସବୁ ସୁବିଧା

ନୂଆଦିଲ୍ଲୀ,୨୮।୨: ରାଜ୍ୟ ସଭା ପାଇଁ ୧୫ ଟି ରାଜ୍ୟେରେ ୫୬ଟି ଆସନ ପାଇଁ ନିର୍ବାଚନ ଅନୁଷ୍ଠିତ ହେଉଛି। ଏପ୍ରିଲରେ, ସମସ୍ତ ରାଜ୍ୟରେ ସମୁଦାୟ ୫୬ ରାଜ୍ୟ ସଭା ଏମପିଙ୍କ କାର୍ଯ୍ୟକାଳ ଶେଷ ହେଉଛି। ଏହି କାରଣରୁ ଫେବୃଆରୀରୁ ନିର୍ବାଚନ ଆରମ୍ଭ ହୋଇଛି। ମଙ୍ଗଳବାର କର୍ନାଟକ, ଉତ୍ତର ପ୍ରଦେଶ ଓ ହିମାଚଳ ପ୍ରଦେଶରେ ନିର୍ବାଚନ ଅନୁଷ୍ଠିତ ହୋଇଯାଇଛି। ରାଜ୍ୟ ସଭା ଏମପିଙ୍କ ନିର୍ବାଚନ ଲୋକସଭା ଏମପିଙ୍କ ଠାରୁ ସମ୍ପୂର୍ଣ୍ଣ ଭିନ୍ନ। ସଂସଦର ଉଚ୍ଚ ଗୃହ କୁହାଯାଉଥିବା ରାଜ୍ୟ ସଭା ଏମପିଙ୍କ କାର୍ଯ୍ୟକାଳ ୬ବର୍ଷ ହୋଇଥାଏ। ପ୍ରତି ଦୁଇ ବର୍ଷରେ ଥରେ ରାଜ୍ୟ ସଭା ନିର୍ବାଚନ ଅନୁଷ୍ଠିତ ହୋଇଥାଏ। ସଂସଦର ସ୍ଥାୟୀ ଗୃହ ହୋଇଥିବା କାରଣରୁ ରାଜ୍ୟ ସଭାକୁ କେବେ ବି ଭଙ୍ଗ କରାଯାଇ ପାରିବ ନାହିଁ। ଏସବୁ ବ୍ୟତୀତ ସେମାନଙ୍କର କାର୍ଯ୍ୟକାଳ ଏବଂ ସୁବିଧା ମଧ୍ୟ ଭିନ୍ନ ଅଟେ। ତେବେ ରାଜ୍ୟ ସଭା ଏମପିଙ୍କ ଦରମା, କାର୍ଯ୍ୟକାଳ ଏବଂ ସେମାନେ କ’ଣ କ’ଣ ସୁବିଧା ପାଆନ୍ତି ଆସନ୍ତୁ ଜାଣିବା।

ଲୋକ ସଭା ଏମପିଙ୍କ କାର୍ଯ୍ୟକାଳ ୫ ବର୍ଷ ହୋଇଥିବାବେଳେ ରାଜ୍ୟ ସଭା ଏମପିଙ୍କ କାର୍ଯ୍ୟକାଳ ୬ବର୍ଷ ହୋଇଥାଏ। ଲୋକ ସଭା ଏମପିଙ୍କୁ ଜନତା ପ୍ରତ୍ୟକ୍ଷ ଭାବରେ ନିର୍ବାଚିତ କରୁଥିବାବେଳେ ରାଜ୍ୟ ସଭା ଏମପିମାନେ ବିଧାୟକଙ୍କ ଦ୍ୱାରା ନିର୍ବାଚିତ ହୁଅନ୍ତି। ରାଜ୍ୟରେ ବିଧାୟକଙ୍କ ସଂଖ୍ୟା ଏବଂ ଖାଲିଥିବା ରାଜ୍ୟସଭା ଆସନକୁ ଆଧାର କରି ରାଜ୍ୟ ସଭା ଏମପି ପ୍ରାର୍ଥୀ କେତେ ସିଟରେ ଜିତିବେ ତାହା ସ୍ଥିର ହୋଇଥାଏ।
ରାଜ୍ୟ ସଭା ଏମପିଙ୍କ ମାସିକ ୨ ଲକ୍ଷ ୧୦ ହଜାର ଟଙ୍କା ଦରମା ମିଳିଥାଏ। ଏଥିମଧ୍ୟରୁ ୨୦ ହଜାର ଟଙ୍କା ଅଫିସ ଖର୍ଚ୍ଚ ପାଇଁ ମିଳିଥାଏ। କିନ୍ତୁ ମୂଳ ଦରମା ହେଉଛି ୧ ଲକ୍ଷ ୯୦ ହଜାର ଟଙ୍କା। ଏହି ଟଙ୍କାରେ ସେମାନଙ୍କର ସମସ୍ତ ଭତ୍ତା ମଧ୍ୟ ଅନ୍ତର୍ଭୁକ୍ତ ରହିଥାଏ।
ରାଜ୍ୟ ସଭା ଏମପିମାନେ ପ୍ରତିମାସରେ କେବଳ ୧୬ହଜାର ଟଙ୍କା ଦରମା ପାଇଥା’ନ୍ତି। କିନ୍ତୁ ଯେଉଁଦିନ ସଂସଦରେ ଗୃହ ଚାଲିଥାଏ ସେମାନଙ୍କୁ ଦିନକ ପିଛା ୧୦୦୦ଟଙ୍କା ମିଳିିଥାଏ। ଏହା ବ୍ୟତୀତ ୨୦ ହଜାର ଟଙ୍କା ସାମ୍ବିଧାନିକ ଭତ୍ତା, ୨୦ହଜାର ଟଙ୍କା ଅଫିସ ଭତ୍ତା ମିଳିଥାଏ। କିଲୋମିଟର ପିଛା ୩୪ ଟଙ୍କା ଯାତ୍ରା ଭତ୍ତା ମଧ୍ୟ ମିଳିଥାଏ। ଏଥିସହ ସେମାନଙ୍କୁ ଅନ୍ୟାନ୍ୟ ଭତ୍ତା ମିଳିଥାଏ। ଏହିସବୁ ମିଶି ତାଙ୍କର ମୋଟ ଦରମା ଲକ୍ଷେ ଉପରେ ପହଞ୍ଚି ଯାଇଥାଏ।

ରାଜ୍ୟ ସଭା ଏମପିଙ୍କୁ ଟ୍ରେନରେ ଯାତ୍ରା ପାଇଁ ପ୍ରତି ମାସରେ ଗୋଟିଏ ପ୍ରଥମ ଶ୍ରେଣୀ ଏସି ଏବଂ ଗୋଟିଏ ଦ୍ୱିତୀୟ ଶ୍ରେଣୀ ଏସି ପାସ ମଧ୍ୟ ମିଳିଥାଏ। ବିମାନ ଯାତ୍ରା ସମୟରେ ସେମାନେ କେବଳ ୨୫ ପ୍ରତିଶତ ଭଡା ଦେଇଥା’ନ୍ତି। ସବୁଠାରୁ ବଡକଥା ହେଉଛି, ଏହି ଏମପିମାନେ ପ୍ରତିବର୍ଷ, ଜଣେ ବ୍ୟକ୍ତିଙ୍କ ସହିତ ମାଗଣାରେ ୩୪ଟି ବିମାନ ଯାତ୍ରା କରିପାରିବାର ସୁବିଧା ପାଇଛନ୍ତି। ଏହା ବ୍ୟତୀତ, ସେମାନଙ୍କର କୌଣସି ସମ୍ପର୍କୀୟ ଗୋଟିଏ ବର୍ଷରେ ଆଠଟି ବିମାନ ଯାତ୍ରା ମାଗଣାରେ ମଧ୍ୟ କରିପାରିବାର ସୁବିଧା ରହିଛି।

ରାଜ୍ୟ ସଭା ଏମପିଙ୍କୁ ସରକାରଙ୍କ ପକ୍ଷରୁ ଦୁଇଟି ମୋବାଇଲ ମିଳିଛି। ଏହି ଫୋନ୍‌ ମାଧ୍ୟମରେ ସେମାନେ ପ୍ରତିବର୍ଷ ୫୦ହଜାର ଲୋକାଲ କଲ କରିପାରିବେ। ସବୁ ଏମପିଙ୍କ ପାଇଁ ଏହି ମୋବାଇଲେରେ ଫ୍ରି ଇଣ୍ଟନେଟ୍‌ ସେବା ମଧ୍ୟ ରହିଛି। ସରକାର ଏହାର ସମ୍ପୂର୍ଣ୍ଣ ଖର୍ଚ୍ଚ ବର୍ଷସାରା ବହନ କରୁଛନ୍ତି। ରାଜ୍ୟ ସଭା ଏମପିମାନେ ରହିବାକୁ ସରକାରୀ ଆବାସ ପାଇଛନ୍ତି। ଏହାର ଭଡା ମଧ୍ୟ ସରକାରଙ୍କଠାରୁ ପ୍ରାପ୍ତ ଭତ୍ତାରେ ଅନ୍ତର୍ଭୁକ୍ତ କରାଯାଇଛି। ପ୍ରତିବର୍ଷ ସେମାନଙ୍କୁ ୪ହଜାର କିଲୋ ଲିଟର ପାଣି, ୫୦ ହଜାର ୟୁନିଟ ବିଦ୍ୟୁତ, ଆସବାବପତ୍ର, ଏବଂ ସ୍ବାସ୍ଥ୍ୟ ସମ୍ବନ୍ଧୀୟ ସମସ୍ତ ସୁବିଧା ମାଗଣାରେ ମିଳିଥାଏ।