ବମ୍ବେ: ଫଟ୍ରୋଗ୍ରାଫର ରୋହନ ଶ୍ରେଷ୍ଠାଙ୍କ ସହ ସମ୍ପର୍କକୁ ନେଇ ଚର୍ଚ୍ଚାରେ ବଲିଉଡ୍ ଅଭିନେତ୍ରୀ ଶ୍ରଦ୍ଧା କପୁର। ମୁହଁ ଖୋଲି କହୁ ନ ଥିଲେ ହେଁ ଉଭୟଙ୍କ ସମ୍ପର୍କ ଏବେ ଦାଣ୍ଡରେ ପଡ଼ି ହାଟରେ ଗଡ଼ିଲାଣି। ନିକଟରେ ମାଳଦ୍ୱୀପରେ ପ୍ରେମିକଙ୍କ ସହ ପ୍ରିୟାଙ୍କ ଶର୍ମାଙ୍କ ବିବାହରେ ସେ ଯୋଗଦେଇଥିଲେ। ଉଭୟ ବେଶ୍ ଖୁସି ଥିବା ନଜର ଆସିଥିଲା। ଯଦି ସବୁକିଛି ଠିକ୍ ଥାଏ ତେବେ ପ୍ରଶଂସକ ଖୁସି ଖବର ଶୀଘ୍ର ଶୁଣିବେ ବୋଲି ଏବେ ଆଲୋଚନା ହେଉଛି। ଏସବୁ ମଧ୍ୟରେ ଶ୍ରଦ୍ଧା-ରୋହନଙ୍କ ବିବାହକୁ ନେଇ ମନକଥା କହିଛନ୍ତି ଭାବିଶ୍ୱଶୁର ରାକେଶ ଶ୍ରେଷ୍ଠା।
ରାକେଶ କହିଛନ୍ତି, ଉଭୟ କଲେଜ ବେଳର ବନ୍ଧୁ। ଏହାଛଡ଼ା ସେମାନଙ୍କର ଅନେକ ବନ୍ଧୁ ଜୁହୁରେ ରହୁଛନ୍ତି। ନିଜ ନିଜ କର୍ମ ଜୀବନରେ ସେମାନେ ଭଲ କରୁଛନ୍ତି। ଯଦି ସେମାନେ ଆଗକୁ ବିବାହ କରିବାକୁ ନିଷ୍ପତ୍ତି ନିଅନ୍ତି ତେବେ ଖୁସିରେ ସବୁକିଛି କରିବାକୁ ମୁଁ ପ୍ରସ୍ତୁତ ଅଛି। ଏଥିରେ ଆପତ୍ତି କରିବାର ପ୍ରଶ୍ନ ଉଠୁନାହିଁ।
ପୂର୍ବରୁ ଶ୍ରଦ୍ଧାଙ୍କ ବାପା ଅଭିନେତା ଶକ୍ତି କପୁର ଝିଅଙ୍କ ବିବାହକୁ ସବୁଜ ସଙ୍କେତ ଦେଖାଇ ସାରିଛନ୍ତି। ସେ ଯାହା ବି କରନ୍ତୁ ସର୍ବଦା ସାଙ୍ଗରେ ଛିଡ଼ା ହେବେ ବୋଲି ଶକ୍ତି କହିଥିଲେ।