ଭୁବନେଶ୍ୱର, ୧୯।୧(କ୍ରୀଡ଼ା ପ୍ରତିନିଧି)-ଚଳିତ ଇଣ୍ଡିଆନ ସୁପରଲିଗ୍ (ଆଇଏସ୍ଏଲ୍)ରେ ସଂଘର୍ଷ କରୁଥିବା ଓଡ଼ିଶା ଏଫ୍ସି ନର୍ଥଇଷ୍ଟ ୟୁନାଇଟେଡ ଡିଫେଣ୍ଡର ରାକେଶ ପ୍ରଧାନଙ୍କୁ ଲୋନ୍ରେ ଆଣିଛି। ପୂର୍ବରୁ ଶିଲଂ ଲାଜଂ ପକ୍ଷରୁ ଖେଳିବାର ଅଭିଜ୍ଞତା ରଖିଥିବା ରାକେଶଙ୍କ ସହିତ ଚଳିତ ସିଜନ ଶେଷ ପର୍ଯ୍ୟନ୍ତ ଚୁକ୍ତି କରିଛି ଭୁବନେଶ୍ୱରଭିତ୍ତିକ ଏହି ଦଳ। ୨୦୧୭-୧୮ ସିଜନରେ ଶିଲଂ ଲାଜଂ ଦଳରେ ଖେଳି କ୍ୟାରିୟର ଆରମ୍ଭ କରିଥିବା ରାକେଶ ଆଇଏସ୍ଏଲ୍ର ୬ଷ୍ଠ ସଂସ୍କରଣରେ ନର୍ଥଇଷ୍ଟ ସହିତ ଚୁକ୍ତିବଦ୍ଧ ହୋଇ ୧୫ଟି ମ୍ୟାଚ ଖେଳିଥିଲେ। ଏବେ ସେ ଓଡ଼ିଶା ଏଫ୍ସି ପକ୍ଷରୁ ଖେଳିବେ। ରାକେଶଙ୍କୁ ସ୍ବାଗତ କରିଛନ୍ତି କୋଚ୍ ଷ୍ଟୁଆର୍ଟ ବକ୍ସଟର। ସ୍ବାଭାବିକ ଭାବେ ବାମ ପଟ (ଲେଫ୍ଟ ଫୁଟ୍)ରେ ଖେଳୁଥିବା ରାକେଶଙ୍କ ଅଭିଜ୍ଞତା ଓଡ଼ିଶା ଦଳ ପାଇଁ ବିଶେଷ ସହାୟକ ହେବ ବୋଲି ସେ ଆଶାପ୍ରକାଶ କରିଛନ୍ତି। ରାକେଶ ମଧ୍ୟ ଓଡ଼ିଶା ଏଫ୍ସିରେ ଯୋଗଦେବାରେ ଖୁସି ଜାହିର କରିଛନ୍ତି। ଦଳର ଅବଶିଷ୍ଟ ମ୍ୟାଚଗୁଡ଼ିକରେ ଶ୍ରେଷ୍ଠ ପ୍ରଦର୍ଶନ ଦେବାକୁ ସେ ଚେଷ୍ଟା କରିବେ ବୋଲି ପ୍ରକାଶ କରିଛନ୍ତି।
