ଭୁବନେଶ୍ୱର,୧୬।୬(ଅଭିଜିତ ଦାସ): ଜଳବାୟୁ ପରିବର୍ତ୍ତନ ଓ ପରିବେଶ ପ୍ରଦୂଷଣ ଏବେ ବିଶ୍ୱ ସମସ୍ୟା ପାଲଟିଛି। ଏଥିପାଇଁ ଗୋଟିକ ପରେ ଗୋଟିଏ ପ୍ରାକୃତିକ ବିପର୍ଯ୍ୟୟ ମାଡ଼ି ଆସୁଛି। ଏହି ବିପଦରୁ ରକ୍ଷା ପାଇବା ପାଇଁ ‘ପ୍ରଦୂଷଣମୁକ୍ତ ବିଶ୍ୱ ଓ ଜୀବନ ରକ୍ଷା’ ବାର୍ତ୍ତା ନେଇ ସାଇକେଲରେ ଦେଶ ଦେଶ ବୁଲି ସଚେତନ କରୁଛନ୍ତି ପଶ୍ଚିମବଙ୍ଗର ୪୫ବର୍ଷୀୟ ରାମପ୍ରସାଦ ନାସ୍କର। ପଶ୍ଚିମବଙ୍ଗରୁ ୨୫ଦିନର ସାଇକେଲ ଯାତ୍ରା ପରେ ଗୁରୁବାର ଭୁବନେଶ୍ୱରରେ ପହଞ୍ଚତ୍ଛନ୍ତି। ୩ ଦେଶ ବୁଲିସାରିଥିବା ରାମ ପ୍ରସାଦ ପେଶାରେ ସରକାରୀ ସ୍କୁଲର ଭୂଗୋଳ ଶିକ୍ଷକ। ବିଦ୍ୟାଳୟରେ ପାଠପଢ଼ାଇବା ସମୟରେ ପୃଥିବୀର ଭୌଗୋଳିକ ପରିବର୍ତ୍ତନକୁ ନେଇ ପିଲାଙ୍କୁ ଜଣାଇବା ସହ ପରିବେଶ ସନ୍ତୁଳନ ରକ୍ଷା ପାଇଁ ଉତ୍ସାହିତ କରିଥାନ୍ତି। ଏଥିସହ ସମୟ ମିଳିଲେ ଲୋକଙ୍କୁ ସଚେତନ କରିଥାନ୍ତି। ନିଜ ଭଳି ସାଇକେଲ ଚଲାଇବାକୁ ଅନ୍ୟମାନଙ୍କୁ ମଧ୍ୟ ପ୍ରବର୍ତ୍ତାଇଥାନ୍ତି। ୨୦୧୩ରେ ପ୍ରଥମେ ସାଇକେଲ ଚଳାଇ ଭାରତର ସମସ୍ତ ରାଜ୍ୟରେ ପରିବେଶ ସୁରକ୍ଷା ସଚେତନତା ବାର୍ତ୍ତା ଦେଇଥିଲେ। ୬ ମାସରେ ଭାରତ ଭ୍ରମଣ ପରେ ୨୦୧୭ ରେ ସେ ବାଂଲାଦେଶ ଯାତ୍ରା କରିଥିଲେ। ୨୦୨୧ରେ ୮୦ ଦିନ ଧରି ନେପାଳରେ ସଚେତନତା ବାର୍ତ୍ତା ବାଣ୍ଟି ପଶ୍ଚିମବଙ୍ଗ ଫେରିଥିଲେ। ଦିନକୁ ସେ ୧୩୦ କିମି ଯାତ୍ରା କରନ୍ତି। ସକାଳ ୬ଟାରୁ ସନ୍ଧ୍ୟା ୬ ଟା ଯାଏ ସାଇକେଲ ଚଲାନ୍ତି। ରାମ ପ୍ରସାଦଙ୍କ କହିବା ଅନୁଯାୟୀ, ବର୍ତ୍ତମାନ ପୃଥିବୀରେ ଜଳବାୟୁ ପରିବର୍ତ୍ତନ ସହ ଦିନକୁ ଦିନ ଭୂତଳ ଜଳ ସ୍ତର କମିବାରେ ଲାଗିଛି। ବାରମ୍ବାର ପ୍ଲାଷ୍ଟିକ୍ ବ୍ୟବହାର ଉପରେ କଟକଣା ଲଗାଯାଉଥିଲେ ମଧ୍ୟ ଲୋକେ ସଚେତନ ହେଉନାହାନ୍ତି। ସୌର ଶକ୍ତି ଥିବା ସତ୍ତ୍ୱେ ମଧ୍ୟ ବ୍ୟବହାର କରିବାକୁ ରାଜି ନାହାନ୍ତି। ତେବେ ଗାଡିମୋଟର ବ୍ୟବହାର କମାଇବାକୁ ସେ ସାଇକେଲ ଧରି ଲୋକଙ୍କ ମଧ୍ୟରେ ଏପରି ପରିବେଶ ସୁରକ୍ଷାର ବାର୍ତ୍ତା ଜାରି ରଖିବେ ବୋଲି ସେ କହିଛନ୍ତି।