କୋଲକାତା,୧୩।୭ : ପଞ୍ଚାୟତ ନିର୍ବାଚନ ସମୟରେ ପଶ୍ଚିମବଙ୍ଗରେ ଘଟିଥିବା ଭୟଙ୍କର ହିଂସା ଏବଂ ରକ୍ତପାତ ପାଇଁ ପଶ୍ଚିମବଙ୍ଗର ସିଏମ ମମତା ବାନାର୍ଜୀ ’ରାମ, ଶ୍ୟାମ ଏବଂ ବାମ’ କୁ ଦାୟୀ କରିଛନ୍ତି। ସେ ’ରାମ, ଶ୍ୟାମ ଏବଂ ବାମପନ୍ଥୀ’ ମାଧ୍ୟମରେ ଭାଜପା, କଂଗ୍ରେସ ଏବଂ ବାମ ଦଳଙ୍କୁ ଟାର୍ଗେଟ କରିଛନ୍ତି।
ସିଏମ ବାନାର୍ଜୀ କହିଛନ୍ତି, ଯଦି ମୁଁ କୌଣସି ଅପରାଧ କରିଛି, ତେବେ ଜନସାଧାରଣ ମୋତେ ଦଣ୍ଡ ଦେଇ ପାରିବେ। କିନ୍ତୁ ମୁଁ କହିବାକୁ ଚାହେଁ ଜନସାଧାରଣ ମୋତେ ଆଶୀର୍ବାଦ ଦେଇଛନ୍ତି। ଆମେ ମହାତ୍ମା ଗାନ୍ଧୀ, ସୁଭାଷ ଚନ୍ଦ୍ର ବୋଷ ଏବଂ ସ୍ବାମୀ ବିବେକାନନ୍ଦଙ୍କ ଅନୁଗାମୀ।
ସେ ଆହୁରି ମଧ୍ୟ କହିଛନ୍ତି, ’ମୁଁ ହିଂସାକୁ ସମର୍ଥନ କରେ ନାହିଁ କିମ୍ବା ଘୃଣା ଓ ହିଂସା ରାଜନୀତିକୁ ସମର୍ଥନ କରେ ନାହିଁ। ଏହା ମୋତେ କଷ୍ଟ ଦେଉଛି ନିର୍ବାଚନରେ ବାଧା ଦେବା ପାଇଁ ରାମ, ଶ୍ୟାମ ଏବଂ ବାମ ଏକାଠି ହିଂସା କରିଥିଲେ। ଏହି ହିଂସା ରାଜ୍ୟର ଅଳ୍ପ କିଛି ଅଞ୍ଚଳରେ ଘଟିଛି। ୭୦,୦୦୦ବୁଥ ମଧ୍ୟରୁ କେବଳ ୬୦ ଟି ବୁଥରେ ହିଂସା ଦେଖିବାକୁ ମିଳିଥିଲା।
ଏହି ହିଂସା ପାଇଁ ଭାଜପାକୁ ଦାୟୀ କରି ସେ କହିଛନ୍ତି ଏହି ବିଭାଜନକାରୀ ଦଳ ରାଜନୀତି ଛାଡିଦେବା ଉଚିତ। ଯେଉଁମାନେ ଗଣତନ୍ତ୍ରକୁ ହତ୍ୟା କରନ୍ତି, ସେମାନଙ୍କର ରାଜନୀତିରେ ରହିବାର ଅଧିକାର ନାହିଁ। ମୁଁ ଦୀର୍ଘ ସମୟ ପର୍ଯ୍ୟନ୍ତ ଚୁପ ରହିଲି, କିନ୍ତୁ ମୋର ଧୈର୍ଯ୍ୟର ମଧ୍ୟ ସୀମା ଅଛି। ମିଥ୍ୟା ପ୍ରଚାର ପ୍ରସାର କରିବାରେ ଶାସକ ଭାଜପା ସବୁ ପ୍ରକାର ପଦକ୍ଷେପ ନେଇଛି।