ଗଞ୍ଜାମ,୫ା୧୨(ବିଦ୍ୟାଧର ସାହୁ): ବର୍ତ୍ତମାନ ଅପରାଧୀଙ୍କ ଚରାଭୂଇଁ ପାଲଟିଛି ରମ୍ଭା ଅଞ୍ଚଳ। ହୁମା ଫାଣ୍ଡି ଓ ରମ୍ଭା ଥାନା ପୋଲିସକୁ ଚ୍ୟାଲେଞ୍ଜ କରି ଗୋଟିଏ ଗୋଟିଏ ପରେ ଲୁଟ୍ କରି ଚାଲିଛନ୍ତି ଲୁଟେରା ଦଳ। ଏହାକୁ ନିତିଦିନିଆ ଭାବେ ଅଭ୍ୟାସରେ ପରିଣୟ କରିଲେଣି ଦୁର୍ବୃତ୍ତ। ପ୍ରଥମେ ଲୁଟେରା ଦଳ ରମ୍ଭା ଓ ହୁମା ଫାଣ୍ଡି ଅଧୀନରେ ଥିବା ଶିବମନ୍ଦିରଗୁଡ଼ିକୁ ଟାର୍ଗେଟ କରି ସଫଳ ହେବା ପରେ ଜାତୀୟ ରାଜପଥରେ ଗୁଳି ଫୁଟାଇ ଲୁଟ୍ କରିବା ଆରମ୍ଭ କଲେଣି। ଦୁଇ ମାସ ମଧ୍ୟରେ ଏଭଳି ବାରମ୍ବାର ଲୁଟ୍ ହେଉଥିବା ବେଳେ ପୋଲିସ ଗୋଟିଏ ବି ଘଟଣାର ଟେର୍ ପାଇ ନ ପାରିବା ପୋଲିସର କାର୍ଯ୍ୟଦକ୍ଷତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି। ବିଳମ୍ବିତ ରାତିରେ ଦଷ୍ଟିଙ୍ଗ ଓ ହୁମା ନିକଟସ୍ଥ ୧୬ ନମ୍ବର ଜାତୀୟ ରାଜପଥଠାରେ କିଛି ଦୁର୍ବୃତ୍ତ ଏକ କାର୍ ଉପରକୁ ଗୁଳି ଫୁଟାଇ କାଜୁ ଫ୍ୟାକ୍ଟ୍ରି ମାଲିକ ଗୌରବ ସେଠୀଙ୍କ ଠାରୁ ଲୁଟ୍ କରିନେଇଛନ୍ତି ଲୁଟେରା। ତେବେ ଅଳ୍ପକେ ଗୌରବ ବର୍ତ୍ତି ଯାଇଛନ୍ତି। ଏନେଇ ସେ ପୋଲିସରେ ଅଭିଯୋଗ କରିଛନ୍ତି। ଖବର ପାଇ ହୁମା ପୋଲିସ ଘଟଣାସ୍ଥଳରୁ ଦୁଇଟି ଖୋକା ଗୁଳି ଜବତ କରିଥିବା ଜଣାପଡ଼ିଛି l ଉକ୍ତ ଘଟଣାର ତଦନ୍ତ ଚାଲିଥିବା ହୁମା ଫାଣ୍ଡି ଅଧିକାରୀ ଶୁଭ୍ରଜିତ୍ ସାମନ୍ତରାୟ ସୂଚନା ଦେଇଛନ୍ତି।
