ଭୁବନେଶ୍ୱର,(ସତ୍ୟଜିତ୍ ରାଉତ)/ ଜୟପୁର,୨୨ା୮(ପବନ ପାଣିଗ୍ରାହୀ):୩୪ଲକ୍ଷ ଟଙ୍କାର ସରକାରୀ ଅର୍ଥ ହଡ଼ପ କରିବା ସହ ୭ଟି ଦୁର୍ନୀତି ମାମଲାରେ ସମ୍ପୃକ୍ତ ଥାଇ ଫେରାର ଥିବା କୋରାପୁଟ ଜିଲା ନାରାୟଣପାଟଣା ବ୍ଲକର ପୂର୍ବତନ ବିଡିଓ ରମେଶ ଚନ୍ଦ୍ର ସାହୁ (୬୫) ୮ବର୍ଷ ପରେ ଧରାପଡ଼ିଛନ୍ତି। ଅଭିଯୁକ୍ତ ରମେଶଙ୍କୁ ଭିଜିଲାନ୍ସ ଟିମ୍ ସୋମବାର ଦିଲ୍ଲୀରୁ ଗିରଫ କରିଛି। ଏହାପରେ ତାଙ୍କୁ ନୂଆଦିଲ୍ଲୀ ମେଟ୍ରୋପଲିଟାନ୍ ମାଜିଷ୍ଟ୍ରେଟ୍ଙ୍କ କୋର୍ଟକୁ ଚାଲାଣ କରାଯାଇଥିଲା। କୋର୍ଟଙ୍କ ଅନୁମତିକ୍ରମେ ସେଠାରୁ ଭିଜିଲାନ୍ସ ଅଧିକାରୀମାନେ ରମେଶଙ୍କୁ ଟ୍ରାଞ୍ଜିଟ୍ ରିମାଣ୍ଡରେ ଓଡ଼ିଶା ଆଣିଛି। ତାଙ୍କୁ ଜୟପୁର ସ୍ବତନ୍ତ୍ର ଭିଜିଲାନ୍ସ କୋର୍ଟକୁ ଚାଲାଣ କରାଯିବ ବୋଲି ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି। ରମେଶ ଫେରାର ହେବା ପରେ ଗତ ୮ବର୍ଷ ହେଲା ଦିଲ୍ଲୀ ଓ ଏହାର ଆଖାପାଖ ଅଞ୍ଚଳରେ ଲୁଚି ବୁଲୁଥିଲେ। ଏପରିକି ଗିରଫ ଭୟରେ ସେ ଆସାମ ଜୋରହାଟ ପଳାଇଯାଇଥିଲେ। ନିକଟରେ ସେ ପୁଣି ଦିଲ୍ଲୀକୁ ଫେରିଥିଲେ। ଏନେଇ ସୂଚନା ମିଳିବା ପରେ ଭିଜିଲାନ୍ସ ଟିମ୍ ତାଙ୍କ ଲୋକସେନ୍କୁ ଟ୍ରାପ୍ କରି କାବୁ କରିଥିଲା।
ରମେଶ ନାରାୟଣପାଟଣା ବିଡିଓ ଥିବାବେଳେ ଅନ୍ୟମାନଙ୍କ ସହ ମିଶି ବ୍ଲକ୍ର ବିଭିନ୍ନ ଉନ୍ନୟନମୂଳକ କାର୍ଯ୍ୟରେ ଦୁର୍ନୀତି କରିଥିଲେ। ସରକାରଙ୍କ ଏତଲାକ୍ରମେ ତାଙ୍କ ନାମରେ କୋରାପୁଟ ଭିଜିଲାନ୍ସ ଥାନାରେ ୨୦୧୫ରେ ୭ଟି ମାମଲା ରୁଜୁ ହୋଇଥିଲା। ସେଗୁଡ଼ିକ ହେଲା ମାମଲା ନଂ.୧୬, ୧୭, ୧୮, ୧୯, ୨୦, ୨୧ ଓ ୩୮/୨୦୧୫। ଏହାପରେ ୨୦୧୫ ଫେବୃୟାରୀ ୨୩ରେ ରାଜ୍ୟ ସରକାର ତାଙ୍କୁ ନିଲମ୍ବିତ କରିଥିଲେ। ତେବେ ଗିରଫ ଭୟରେ ସେବେଠୁ ରମେଶ ଫେରାର ହୋଇଯାଇଥିଲେ। ଏପରିକି ବହୁଥର ତାଙ୍କୁ ଗିରଫ କରିବାକୁ ଚେଷ୍ଟା କରାଯାଇଥିବା ବେଳେ ପ୍ରତିଥର ସେ ଭିଜିଲାନ୍ସ ଟିମ୍କୁ ଚକ୍ମା ଦେଉଥିଲେ। ତେବେ ବିଭିନ୍ନ ଦୁର୍ନୀତି କରି ଫେରାର ଥିବା ସରକାରୀ କର୍ମଚାରୀଙ୍କୁ ଧରିବାକୁ ଆରମ୍ଭ ହୋଇଥିବା ସ୍ବତନ୍ତ୍ର ଅଭିଯାନ ଜାରି ରହିଥିବା ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି।