ଇସ୍ଲାମାବାଦ୍, ୨।୩: ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ୍ ବିଶ୍ୱର ଶିଖ୍ ତୀର୍ଥଯାତ୍ରୀମାନଙ୍କୁ ଆକର୍ଷିତ କରିବା ପାଇଁ କର୍ତାରପୁର କରିଡର ଆମ୍ବାସାଡର ଭାବେ ସର୍ଦ୍ଦାର ରମେଶ ସିଂ ଅରୋରାଙ୍କୁ ନିଯୁକ୍ତି ଦେଇଛନ୍ତି। ବରିଷ୍ଠ ଶିଖ୍ ନେତା ରମେଶ ଅବୈତନିକ ଭାବେ କାର୍ଯ୍ୟ କରିବେ ବୋଲି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଜାରି ଏକ ବିବୃତିରେ କୁହାଯାଇଛି। ନରୋଓ୍ବାଲସ୍ଥିତ କର୍ତାରପୁର ବାସିନ୍ଦା ରମେଶ ପାକିସ୍ତାନ ମୁସ୍ଲିମ୍ ଲିଗ୍ (ଏନ୍) ସଂଖ୍ୟାଲଘୁ ଶାଖାର ସାଧାରଣ ସମ୍ପାଦକ ଅଛନ୍ତି।
କରତାରପୁର କରିଡର ଗୁରୁଦ୍ୱାରା ଦରବାର ସାହିବ୍ରେ ତାଙ୍କ ପରିବାର ସେବା ପ୍ରଦାନ କରିଆସୁଛି। ପ୍ରକାଶ ଯେ, ୨୦୧୯ ନଭେମ୍ବରରେ ପାକିସ୍ତାନର ତତ୍କାଳୀନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଗୁରୁ ନାନକଙ୍କ ୫୫୦ତମ ଜୟନ୍ତୀ ଅବସରରେ ଏହି କରିଡର ଉଦ୍ଘାଟନ କରିଥିଲେ। ୪ କି.ମି. ଲମ୍ବ ବିଶିଷ୍ଟ କର୍ତାରପୁର କରିଡରକୁ ଭାରତୀୟ ଶିଖ୍ ଶ୍ରଦ୍ଧାଳୁ ବିନା ଭିଜାରେ ଯାଇଥାନ୍ତି।
