ଅଲ୍ ରାୟାନ (କାତାର), ୭।୧୨: ଚଳିତ ଫିଫା ବିଶ୍ୱକପରେ ସବୁଠାରୁ ବଡ଼ ବିସ୍ମୟ ସୃଷ୍ଟି କରିଛି ମରକ୍କୋ। ୨୦୧୦ର ଚାମ୍ପିୟନ ସ୍ପେନ୍କୁ ପେନାଲ୍ଟି ଶୁଟ୍ ଆଉଟ୍ ୩-୦ ଗୋଲରେ ହରାଇ ଇତିହାସ ସୃଷ୍ଟି କରିଛି। ପ୍ରଥମଥରପାଇଁ ଫୁଟବଲ ବିଶ୍ୱକପର କ୍ୱାର୍ଟର ଫାଇନାଲରେ ପ୍ରବେଶ କରିଛି ଏହି ଆଫ୍ରିକୀୟ ଦଳ। ଅନ୍ୟପକ୍ଷରେ ମ୍ୟାଚର ନିର୍ଦ୍ଧାରିତ ୯୦ ଓ ଅତିରିକ୍ତ ୩୦ ମିନିଟର ଖେଳରେ ଦୃଢ଼ତା ଦେଖାଇଥିବା ସ୍ପେନ୍ ପେନାଲ୍ଟି ଶୁଟ୍ ଆଉଟ ପର୍ଯ୍ୟାୟରେ ଲଜ୍ଜାଜନକ ପ୍ରଦର୍ଶନ କରି ବିଦାୟ ନେଇଛି। ମରକ୍କୋର ୩ ଜଣ ଖେଳାଳି ଗୋଲ ସ୍କୋର କରିଥିବାବେଳେ ସ୍ପେନ୍ର ଜଣେ ହେଲେ ଖେଳାଳି ପ୍ରତିପକ୍ଷ ଗୋଲକିପରଙ୍କୁ ଚକ୍ମା ଦେବାରେ ସକ୍ଷମ ହୋଇ ନ ଥିଲେ। ଫଳରେ ରାଉଣ୍ଡ ଅଫ୍ ୧୬ରୁ ସ୍ପେନ୍ର ଅଭିଯାନ ଶେଷ ହୋଇଛି। ଶୁଟ୍ ଆଉଟ ପର୍ଯ୍ୟାୟରେ ସ୍ପେନ୍ର ପାବ୍ଲୋ ସରବିଅ, କାର୍ଲୋସ ସୋଲେର ଓ ସର୍ଗିଓ ବସ୍କ୍ୱେଟ୍ସ ଗୋଲ କରିବାରେ ଅସମର୍ଥ ରହିଥିଲେ। ମରକ୍କୋ ଗୋଲକିପର ୟାସାଇନେ ବୌନେଉଙ୍କ ପ୍ରଦର୍ଶନ ଅତି ଚମତ୍କାର ରହିଥିଲା। ମରକ୍କୋର ଏହି ମ୍ୟାଚରେ ସେ ହିରୋ ସାବ୍ୟସ୍ତ ହୋଇଥିଲେ। ଅନ୍ୟପକ୍ଷରେ ମରକ୍କୋ ପକ୍ଷରୁ ଅବଦେଲାମିଦ ସାବିରି, ହାକିମ ଜିୟେଚ ଓ ଅଚରଫ ହାକିମି ଗୋଲ ଦେଇଥିବାବେଳେ କେବଳ ବଦର ବେନୋଉନ୍ ମିସ୍ କରିଥିଲେ।
ୟୁରୋପ ଓ ଦକ୍ଷିଣ ଆମେରିକା ବାହାରେ ଏକମାତ୍ର ଦଳଭାବେ ମରକ୍କୋ ଚଳିତ ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ପ୍ରବେଶ କରିଛି। ଏହା ପୂର୍ବରୁ ଦଳ ଥରେ ମାତ୍ର ୧୯୮୬ ମେକ୍ସିକୋରେ ପ୍ରି-କ୍ୱାର୍ଟର ଫାଇନାଲରେ ପ୍ରବେଶ କରିଥିଲା। କାତାରରେ ଗୋଟିଏ ପାଦ ଆଗକୁ ବଢ଼ି ଏହାର ଫୁଟବଲ ଇତିହାସକୁ ରୁଦ୍ଧିମନ୍ତ କରିଛି ମରକ୍କୋ। ପୂର୍ବ ବିଶ୍ୱକପ ୨୦୧୮ରେ ମଧ୍ୟ ସ୍ପେନ୍ ପେନାଲ୍ଟି ଶୁଟ୍ ଆଉଟରେ ରୁଷିଆଠାରୁ ହାରି ବିଦାୟ ନେଇଥିଲା। ଗତବର୍ଷର ୟୁରୋପିଆନ ଚାମ୍ପିୟନଶିପ୍ର ସେମିଫାଇନାଲରେ ମଧ୍ୟ ଇଟାଲୀ ବିପକ୍ଷରେ ଅନୁରୂପ ଦଶା ଭୋଗିଥିଲା। ଏହାକୁ ମିଶାଇ ସ୍ପେନ୍ କ୍ରମାଗତ ୫ ଥର ବଡ଼ ଟୁର୍ନାମେଣ୍ଟର ନକ୍ଆଉଟ ମ୍ୟାଚ ଅତିରିକ୍ତ ସମୟ ପର୍ଯ୍ୟନ୍ତ ଖେଳିଥିଲା। ପୂର୍ବ ବିଶ୍ୱକପରେ ରୁଷିଆ ବିପକ୍ଷରେ ଦଳ ୧୨୦ ମିନିଟ ଖେଳିଥିବାବେଳେ ୨୦୨୦ ୟୁରୋ କପ୍ରେ ଏହାର ଅନ୍ୟ ୩ଟି ନକ୍ଆଉଟ ଗେମ୍ ଅତିରିକ୍ତ ସମୟ ପର୍ଯ୍ୟନ୍ତ ଯାଇଥିଲା। ଏଜୁକେଶନ ସିଟି ଷ୍ଟାଡିୟମରେ ସ୍ପେନ୍ ଦର୍ଶକଙ୍କ ଅପେକ୍ଷା ମରକ୍କୋ ସମର୍ଥକ ଅଧିକ ପରିମାଣରେ ଉପସ୍ଥିତ ଥିଲେ। ସେମାନଙ୍କ କୋଳାହଳ ଖେଳାଳିଙ୍କୁ ଉତ୍ସାହିତ କରିଥିଲା। ଏହା ପୂର୍ବରୁ ମରମ୍ମୋ ଗ୍ରୁପ୍ ପର୍ଯ୍ୟାୟରେ କ୍ରୋଏସିଆ ସହିତ ମ୍ୟାଚ ଡ୍ର ରଖିଥିବାବେଳେ ବେଲଜିୟମକୁ ୨-୦ ଗୋଲରେ ହରାଇ ବିପର୍ଯ୍ୟୟ ସୃଷ୍ଟି କରିଥିଲା। ଶେଷ ମ୍ୟାଚରେ କାନାଡ଼ାକୁ ୨-୧ ଗୋଲରେ ହରାଇ କେବଳ ଯେ ଅପରାଜେୟ ରହିଥିଲା ତା’ ନୁହେଁ, ଗ୍ରୁପ୍ ଚାମ୍ପିୟନଭାବେ ନକ୍ଆଉଟରେ ପ୍ରବେଶ କରିଥିଲା। ବେଲଜିୟମକୁ ଗ୍ରୁପ୍ ପର୍ଯ୍ୟାୟରୁ ବିଦା କରିବାରେ ଏହି ଦଳର ବଡ଼ ଭୂମିକା ରହିଥିଲା। ଏବେ ବିଶ୍ୱକପର କ୍ୱାର୍ଟର ଫାଇନାଲରେ ପ୍ରବେଶ କରିଥିବାରୁ ମରକ୍କୋ ଫୁଟବଲ ଏକ ଭିନ୍ନ ସୋପାନରେ ପହଞ୍ଚତ୍ ଯାଇଛି।