ପାଟନା,୧୧।୯: କରୋନା ସଙ୍କଟ ମଧ୍ୟରେ ବିହାରରେ ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ ହୋଇଛି। ସମସ୍ତ ରାଜନୈତିକ ଦଳ ନିଜ ନିଜ ପ୍ରସ୍ତୁତିରେ ଲାଗିପଡିଲେଣି। ସେପଟେ କେନ୍ଦ୍ର ମନ୍ତ୍ରୀ ତଥା ଲୋକ ଜନତା ପାର୍ଟି ନେତା ରାମବିଲାସ ପାଶୱାନ ଶୁକ୍ରବାର ଏକ ଟୁଇଟ୍ କରିଛନ୍ତି। ଅସୁସ୍ଥତା ହେତୁ ସେ ଡାକ୍ତରଖାନାରେ ଅଛି, ଏଭଳି ପରିସ୍ଥିତିରେ ପୁଅ ଚିରାଗ ପାଶୱାନ ତାଙ୍କ ସହ ଅଛନ୍ତି। ସେ ଦଳ ବିଷୟରେ ନିଷ୍ପତ୍ତି ନେଉଛନ୍ତି ବୋଲି ପାଶୱାନ ସୂଚନା ଦେଇଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, କରୋନା ସଙ୍କଟ ସମୟରେ ସେ ଖାଦ୍ୟ ମନ୍ତ୍ରୀ ଭାବରେ ଦେଶର ସେବା ଜାରି ରଖିଛନ୍ତି। ସମସ୍ତଙ୍କ ପାଖରେ ଖାଦ୍ୟ ସାମଗ୍ରୀ ପହଞ୍ଚିବା ପାଇଁ ସମସ୍ତ ପ୍ରକାର ଉଦ୍ୟମ କରିଛି। ଏହି ସମୟ ମଧ୍ୟରେ ସ୍ବାସ୍ଥ୍ୟ ଖରାପ ହୋଇଥିଲା। କିନ୍ତୁ କାମ ଯେମିତି ବ୍ୟାହତ ନ ହେବ ସେଥିପାଇଁ ଡାକ୍ତରଖାନାକୁ ଯାଇ ନ ଥିଲି। ଯେତେବେଳେ ଚିରାଗ ମୋର ଅସୁସ୍ଥତା ଅନୁଭବ କଲେ, ତାଙ୍କ ନିର୍ଦ୍ଦେଶରେ ମୁଁ ଡାକ୍ତରଖାନା ଯାଇ ମୋର ଚିକିତ୍ସା ଆରମ୍ଭ କଲି। ମୁଁ ଖୁସି ଯେ ମୋ ପୁଅ ଚିରାଗ ଏହି ସମୟରେ ମୋ ସହିତ ଅଛନ୍ତି ଏବଂ ମୋର ସମସ୍ତ ସେବା କରୁଛନ୍ତି। ମୋର ଯତ୍ନ ନେବା ବ୍ୟତୀତ ଦଳ ପ୍ରତି ମୋର ଦାୟିତ୍ୱ ମଧ୍ୟ ପୂରଣ କରୁଛି। ପାଶୱାନ ବିହାର ନିର୍ବାଚନ ବିଷୟରେ ଆହୁରି କହିଛନ୍ତିି ଯେ, ମୁଁ ନିଶ୍ଚିତ ଯେ ଚିରାଗଙ୍କ ଯୁବ ଚିନ୍ତାଧାରା ଦଳ ଏବଂ ବିହାରକୁ ନୂତନ ଦିଶା ଦେବ । ମୁଁ ପୁଅର ପ୍ରତ୍ୟେକ ନିଷ୍ପତ୍ତି ସହିତ ଦୃଢ ଭାବରେ ଠିଆ ହେଇଛି। ମୁଁ ଆଶା କରେ ଯେ ମୁଁ ଭଲ ହେବି ଏବଂ ଶୀଘ୍ର ମୋର ପ୍ରିୟଜନଙ୍କ ପାଖକୁ ଆସିବି।
ସୂଚନାଯୋଗ୍ୟ, ବିହାର ନିର୍ବାଚନକୁ ନେଇ ଚିରାଗ ପାଶୱାନ କହିଛନ୍ତି, ନୀତିଶ କୁମାରଙ୍କୁ ତାଙ୍କ ଦଳ କ୍ରମାଗତ ଭାବରେ ବିରୋଧ କରୁଛି। ସେ ଜେଡିୟୁ ସହ ନୁହେଁ ବରଂ ଭାଜପା ସହ ମେଣ୍ଟ କରୁଛନ୍ତି। କେବଳ ଏତିକି ନୁହେଁ, ନିକଟରେ ହୋଇଥିବା ଦଳ ବୈଠକରେ ୧୪୩ଟି ଆସନରେ ନିର୍ବାଚନ ଲଢିବାକୁ ପ୍ରସ୍ତୁତ ହେବା ବିଷୟରେ ମଧ୍ୟ ଆଲୋଚନା କରାଯାଇଥିଲା।
