ବ୍ରହ୍ମପୁର ଅଫିସ,୧୩ା୩: ଶତାଧିକ ବର୍ଷ ତଳେ ବ୍ରିଟିଶ୍ ଶାସନରେ ହୋଇଥିବା ରଙ୍ଗେଇଲୁଣ୍ଡା ଏୟାରଷ୍ଟ୍ରିପ୍ (ବିମାନ ପଡ଼ିଆ) ଗଞ୍ଜାମ ଜିଲାର ବିଶିଷ୍ଟ ସ୍ବାଧୀନତା ସଂଗ୍ରାମୀ, ଉତ୍ତରପ୍ରଦେଶର ପ୍ରାକ୍ତନ ରାଜ୍ୟପାଳ ଏବଂ ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ବିଶ୍ୱନାଥ ଦାସଙ୍କ ନାଁରେ ନାମିତ କରିବାକୁ ପୂର୍ବତନ ବାଚସ୍ପତି ଚିନ୍ତାମଣି ଦ୍ୟାନ ସାମନ୍ତରା ପ୍ରସ୍ତାବ ଦେଇଛନ୍ତି। ଏହି ମର୍ମରେ ସେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିବା ସୂଚାଇଛନ୍ତି।
ସେ ଆହୁରି କହିଛନ୍ତି, ଦୀର୍ଘ ବର୍ଷରୁ ଅବହେଳିତ ଅବସ୍ଥାରେ ଥିବା ଏୟାରଷ୍ଟ୍ରିପ୍କୁ ସରକାର ପୁନରୁଦ୍ଧାର କରିବା ସହ କ୍ଷୁଦ୍ର ବିମାନ ଉଡ଼ାଣ ଆରମ୍ଭ କରିଥିବାରୁ ସରକାର ସ୍ବାଗତଯୋଗ୍ୟ ପଦକ୍ଷେପ ନେଇଛନ୍ତି। ଆଗାମୀ ଦିନରେ ରନୱେକୁ ସମ୍ପ୍ରସାରଣ କରି ଅଧିକ ସଂଖ୍ୟକ ଯାତ୍ରୀ ବସିବା ଭଳି ବଡ଼ ବିମାନ ଉଡ଼ାଣ ବ୍ୟବସ୍ଥା କରାଯିବାକୁ ଗୁରୁତ୍ୱ ଦେଇଛନ୍ତି।
ଦ୍ୟାନ ସାମନ୍ତରାଙ୍କ କହିବାନୁସାରେ, ଜିଲାର ପ୍ରମୁଖ ସହର ବ୍ରହ୍ମପୁରରେ କେତେକ ସଂଗ୍ରାମୀ ଏବଂ ବିଭିନ୍ନ କ୍ଷେତ୍ରର ବିଶିଷ୍ଟ ବ୍ୟକ୍ତିଙ୍କ ସ୍ମୃତି ରହିଛି। ସ୍ବର୍ଗତ ରାଷ୍ଟ୍ରପତି ଭି.ଭି. ଗିରିଙ୍କ ନାମରେ ଏକ ମୁଖ୍ୟ ରାସ୍ତାକୁ ନାମିତ ସହ ପୁରାତନ ବାଳିକା ହାଇସ୍କୁଲ ମଧ୍ୟ ତାଙ୍କ ସ୍ମୃତିରେ ନାମିତ ହୋଇଛି। ସ୍ବାଧୀନତା ସଂଗ୍ରାମୀ ଶଶିଭୂଷଣ ରଥଙ୍କ ନାଁରେ ସରକାରୀ ମହିଳା ବିଦ୍ୟାଳୟ ଅଛି। ବିଶିଷ୍ଟ ସଂଗ୍ରାମୀ ଦିବାକର ପଟ୍ଟନାୟକଙ୍କ ସ୍ମୃତିରେ ସରକାରୀ ବିଏଡ୍ କଲେଜ ରହିଛି। ସରକାରୀ ଇଞ୍ଜିନିୟରିଂ ସ୍କୁଲକୁ ସଂଗ୍ରାମୀ ତଥା ବିଶିଷ୍ଟ ପାର୍ଲାମେଣ୍ଟାରିଆନ ଉମାଚରଣ ପଟ୍ଟନାୟକଙ୍କ ନାମରେ ନାମିତ ହୋଇଛି। ରେଶମ ସହରର ଆଉ ଏକ ସରକାରୀ କଲେଜ ବିଶିଷ୍ଟ ଶିକ୍ଷାବିତ୍ ତଥା ପୂର୍ବତନ ମୁଖ୍ୟମନ୍ତ୍ରୀ ବିନାୟକ ଆଚାର୍ଯ୍ୟଙ୍କ ନାଁରେ ନାମିତ କରାଯାଇଛି।
ବିଡ଼ମ୍ବନାର ବିଷୟ, ବିଶ୍ୱନାଥ ଦାସଙ୍କ ନାମରେ କୌଣସି ଅନୁଷ୍ଠାନ ନାମିତ ହୋଇନାହିଁ। ବର୍ତ୍ତମାନର ଏମ୍ପି ଚନ୍ଦ୍ରଶେଖର ସାହୁ ଅତୀତରେ ପୌର ସଂସ୍ଥାର ନଗରପାଳ ଥିବା ବେଳେ ମ୍ୟୁନିସିପାଲିଟି ଗେଷ୍ଟ ହାଉସ ପରିସରରେ ସ୍ବର୍ଗତ ଦାସଙ୍କ ଏକ ପୂର୍ଣ୍ଣାଙ୍ଗ ପ୍ରତିମୂର୍ତ୍ତି ସ୍ଥାପନ କରାଯାଇଛି। ବିଶ୍ୱନାଥ ରାଜନେତାରେ ଖ୍ୟାତି ଅର୍ଜନ କରିବା ସହ ସେ ନିର୍ଭୀକ ଓ ସ୍ପଷ୍ଟବାଦୀ ଥିଲେ। ତେଣୁ ତାଙ୍କ ସ୍ମୃତିରେ ରଙ୍ଗେଇଲୁଣ୍ଡା ବିମାନ ପଡ଼ିଆକୁ ନାମିତ କରାଗଲେ ରାଜ୍ୟ ସରକାର ଓ ବିଶେଷକରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମ୍ମାନ ବଢ଼ିବ ବୋଲି ଦ୍ୟାନ ସାମନ୍ତରାୟ ଦର୍ଶାଇଛନ୍ତି।