ନୂଆଦିଲ୍ଲୀ, ୮ା୭ (ପି.ଟି.)-ଭାରତୀୟ ସିନିୟର ମହିଳା ହକି ଦଳର ଅଧିନାୟିକା ରାଣୀ ତାଙ୍କ ପାଇଁ ପ୍ରେରଣାର ଉତ୍ସ ବୋଲି କହିଛନ୍ତି ଯୁବା ଷ୍ଟ୍ରାଇକର ରାଜଓ୍ବିନ୍ଦର କୌର। ରାଣୀଙ୍କ ପ୍ରାରମ୍ଭିକ ଜୀବନ ସଂଘର୍ଷପୂର୍ଣ୍ଣ ଥିଲା। କ୍ରୀଡ଼ାରେ ସଫଳତା ହାସଲ ଦ୍ୱାରା ସେ ନିଜ ପରିବାରକୁ ଦାରିଦ୍ର୍ୟ କବଳରୁ ମୁକୁଳାଇପାରିଥିଲେ। ରାଜଓ୍ବିନ୍ଦରଙ୍କ ଜନ୍ମସ୍ଥାନ ପଞ୍ଜାବର ଏକ ଛୋଟିଆ ଗ୍ରାମରେ। ତାଙ୍କ ପିତା ହେଉଛନ୍ତି ଜଣେ ଅଟୋରିକ୍ସା ଚାଳକ ଓ ମା ଜଣେ ଗୃହିଣୀ। ପରିବାର ଚଳଣି ସେତେଟା ଭଲ ନ ଥିଲା। ରାଜଓ୍ବିନ୍ଦର କହିଛନ୍ତି ଶ୍ରୀ ଗୁରୁ ଅର୍ଜୁନ ଦେବ ପବ୍ଲିକ୍ ସ୍କୁଲରେ ଅଧ୍ୟୟନ କରୁଥିବା ସମୟରେ ମୁଁ ଜଣେ ଆଥଲେଟ୍ ହେବାକୁ ଚାହୁଁଥିଲି। ୯ମ ଷ୍ଟାଣ୍ଡାର୍ଡରେ ପାଠ ପଢୁଥିବାବେଳେ ମୋର ଭଲ ସ୍ପିଡ୍ ଥିଲା। ମୋ ସିନିୟରମାନେ ମୋତେ କିନ୍ତୁ ହକି ଖେଳିବା ପାଇଁ ପ୍ରବର୍ତ୍ତାଇଥିଲେ। ମୁଁ ଏହାର ସୁଯୋଗ ନେଇଥିଲି। ବର୍ତ୍ତମାନ ମୁଁ ଜାତୀୟ ସିନିୟର ମହିଳା ହକିଦଳର ସମ୍ଭାବ୍ୟ କୋର୍ ଗ୍ରୁପ୍ରେ ସ୍ଥାନ ପାଇପାରିଛି ବୋଲି ୨୧ ବର୍ଷୀୟା ରାଜଓ୍ବିନ୍ଦର ପ୍ରକାଶ କରିଛନ୍ତି। ଜଣେ ଷ୍ଟ୍ରାଇମର ଭାବେ ତାଙ୍କ ସ୍ପିଡ୍ ଏବଂ ସ୍ବଭାବ ସୁଲଭ ଫ୍ଲେୟାର କଟ୍ ଯୋଗୁ ୨୦୧୫ ଘରୋଇ ଟୁର୍ନାମେଣ୍ଟଗୁଡ଼ିକରେ ସେ ଜାତୀୟ ଚୟନକର୍ତ୍ତାମାନଙ୍କ ଦୃଷ୍ଟିଆକର୍ଷଣ କରିପାରିଥିଲେ। ରାଜଓ୍ବିନ୍ଦର ଶୀଘ୍ର ଜାତୀୟ ଜୁନିୟର କ୍ୟାମ୍ପ ପାଇଁ ମନୋନୀତ ହୋଇଥିଲେ। ୨୦୧୬ରେ ଭାରତ ତରଫରୁ ମାଲେସିଆରେ ୧୮ବର୍ଷରୁ କମ୍ ଏସିଆ କପ୍ ଖେଳିବା ଲାଗି ସୁଯୋଗ ପାଇଥିଲେ। ପଞ୍ଜାବର ତର୍ନ ତରନ ତରାନ ନିକଟବର୍ତ୍ତୀ ମୁଗଲ ଚାକ୍ ନାମକ ଗ୍ରାମରେ ଜନ୍ମଗ୍ରହଣ କରିଥିବା ରାଜଓ୍ବିନ୍ଦର କହିଛନ୍ତି ୨୦୧୭ରେ ଜାତୀୟ ସିନିୟର କ୍ୟାମ୍ପ ପାଇଁ ଡାକରା ପାଇବାବେଳେ ମୋତେ ବହୁ ସିନିୟର ଖେଳାଳିଙ୍କ ସହ ବାର୍ତ୍ତାଳାପ ସୁଯୋଗ ମିଳିଥିଲା। ସେମାନଙ୍କ ମଧ୍ୟରୁ ଅଧିକାଂଶଙ୍କର ପୃଷ୍ଠଭୂମି କଠିନ ଥିଲା। ପ୍ରତ୍ୟେକଙ୍କ ପଛରେ ଭିନ୍ନ ଭିନ୍ନ କାହାଣୀ ରହିଥିଲା। ହେଲେ ରାଣୀଙ୍କ ପୃଷ୍ଠଭୂମି ମୋ ପୃଷ୍ଠଭୂମି ସହ ମେଳ ଖାଉଥିଲା। ତାଙ୍କୁ ମୁଁ ଆଦର୍ଶ ଭାବେ ଗ୍ରହଣ କରିଥିଲି। ହକିରେ ଚମତ୍କାରିତା ଦେଖାଇ ପାରିଲେ ମୁଁ ମୋ ପରିବାରକୁ ଦାରିଦ୍ର୍ୟରୁ ମୁକ୍ତି କରିପାରିବି ବୋଲି ମୋ ମନରେ ଧାରଣା ସୃଷ୍ଟି ହୋଇଥିଲା। ରାଣୀଙ୍କ ପିତା ଜଣେ କାର୍ଟ-ପୁଲର ଥିଲେ। ଏଥିପାଇଁ ରାଣୀଙ୍କୁ ପ୍ରଥମାବସ୍ଥାରେ ଖୁବ୍ ସଂଘର୍ଷ କରିବାକୁ ପଡ଼ିଥିଲା। ମାତ୍ର ୧୫ ବର୍ଷ ବୟସରେ ସେ ସର୍ବକନିଷ୍ଠ ଖେଳାଳି ହିସାବରେ ଜାତୀୟ ଦଳରେ ସ୍ଥାନ ପାଇଥିଲେ। ୨୦୧୦ବିଶ୍ୱକପ୍ରେ ସେ ଖେଳିବା ସୁଯୋଗ ପାଇଥିଲେ। ପରେ ସେ ଦଳର ଅଧିନାୟିକା ହୋଇ ପାରିଛନ୍ତି।