ନୂଆଦିଲ୍ଲୀ, ୨୨ା୬ (ପି.ଟି.)-ଜୁଲାଇ ୨୩ରୁ ଅଗଷ୍ଟ ୮ ପର୍ଯ୍ୟନ୍ତ ହେବାକୁଥିବା ଟୋକିଓ ଅଲିମ୍ପିକ୍ସ ପାଇଁ ସୋମବାର ଷ୍ଟ୍ରାଇକର ହରିୟାଣାର ରାଣୀ ରାମପାଲ ଅଧିନାୟିକା ଏବଂ ଓଡ଼ିଶାର ଦୀପ୍ଗ୍ରେସ୍ ଏକ୍କା ଓ ହରିୟାଣାର ସବିତା ପୁନିଆଙ୍କୁ ଉପଅଧିନାୟିକା ଭାବେ ମନୋନୀତ କରାଯାଇଛି। ଟୋକିଓ ଗେମ୍ସ ପାଇଁ ଗତ ସପ୍ତାହରେ ଏକ ୧୬ ଜଣିଆ ଦଳ ଘୋଷଣା କରାଯାଇଥିଲା। ରାଣୀ ଦଳର ନେତୃତ୍ୱ ନେବେ ବୋଲି ଯଦିଓ ନିଶ୍ଚିତ ଥିଲା,କିନ୍ତୁ ବିଧିବଦ୍ଧ ଭାବେ ଘୋଷଣା କରାଯାଇ ନ ଥିଲା। ରାଣୀଙ୍କ ବଳିଷ୍ଠ ନେତୃତ୍ୱରେ ଭାରତୀୟ ମହିଳା ହକି ଦଳ ଗତ କିଛିବର୍ଷ ହେଲା ଉଲ୍ଲେଖନୀୟ ସଫଳତା ହାସଲ କରି ଆସୁଛି। ତନ୍ମଧ୍ୟରେ ୨୦୧୭ରେ ଏସିଆ କପ୍ ହାସଲ ଅନ୍ୟତମ। ତାଙ୍କ ଅଧିନାୟକତ୍ୱରେ ଭାରତ ୨୦୧୮ ଏସିଆନ ଗେମ୍ସ ଓ ୨୦୧୮ ଏସିଆନ ଚାମ୍ପିୟନ୍ସ ଟ୍ରଫିରେ ରୌପ୍ୟ ଜିତିପାରିଛି। ୨୦୧୯ରେ ଏଫ୍ଆଇଏଚ୍ ସିରିଜ୍ ଫାଇନାଲ ମଧ୍ୟ ଜିତିପାରିଛି। ଭାରତ ଆହୁରି ମଧ୍ୟ ରାଣୀଙ୍କ ନେତୃତ୍ୱରେ ଲଣ୍ଡନରେ ଅନୁଷ୍ଠିତ ୨୦୧୮ ଏଫ୍ଆଇଏଚ୍ ମହିଳା ବିଶ୍ୱକପ୍ରେ ପ୍ରଥମ ଥର କ୍ୱାର୍ଟରଫାଇନାଲରେ ପ୍ରବେଶ କରିପାରିଥିଲା। ଅଲିମ୍ପିକ ଗେମ୍ ପାଇଁ ରାଣୀଙ୍କୁ ଅଧିନାୟକ ଭାବେ ମନୋନୀତ କରାଯାଇଥିବାରୁ ମୁଖ୍ୟ କୋଚ୍ ଜୋର୍ଡ ମାରିଜନେ ତାଙ୍କୁ ଶୁଭେଚ୍ଛା ଜଣାଇଛନ୍ତି। ଦୀପ୍ଗ୍ରେସ୍ ଏକ୍କା ଓ ସବିତାଙ୍କୁ ମଧ୍ୟ ସେ ଶୁଭେଚ୍ଛା ଜଣାଇଛନ୍ତି। ଏହି ୩ଜଣ ଦୀର୍ଘଦିନ ଧରି ଲିଡରଶିପ୍ ଗ୍ରୁପ୍ର ଅଂଶବିଶେଷ ରହି ଆସିଛନ୍ତି। ନିଜ ଦାୟିତ୍ୱ ତୁଲାଇବା ସହ କୋର୍ ଗ୍ରୁପ୍ରେ ବହୁ ୟଙ୍ଗଷ୍ଟାରଙ୍କୁ ଦିଗ୍ଦର୍ଶନ ଦେଇ ଆସିଛନ୍ତି। ଦୁଇଜଣଙ୍କୁ ଉପଅଧିନାୟକ କରାଯିବା ଯଥାର୍ଥ ବୋଲି ସେ କହିଛନ୍ତି। ଏହା ଦ୍ୱାରା ଭବିଷ୍ୟତ ପାଇଁ କୋର୍ ରିଜର୍ଭ ଗ୍ରୁପ୍ ଅଧିକ ଶକ୍ତିଶାଳୀ ହୋଇପାରିବ। ଟୋକିଓ ଗେମ୍ସରେ ଆମେ ବଡ଼ ସଫଳତା ହାସଲ କରିବା ଲାଗି ଲକ୍ଷ୍ୟ ରଖିଛୁ। ତେଣୁ ଏହି ୩ଜଣଙ୍କ ଭୂମିକା ଓ ଅଭିଜ୍ଞତା ଦଳ ପାଇଁ ଗୁରୁତ୍ୱପୂର୍ଣ୍ଣ ବୋଲି ସେ କହିଛନ୍ତି।
