ଯାଜପୁର ରୋଡ୍,୧୭।୪(ଡି.ଏନ.ଏ.): ଯାଜପୁର ଜିଲା ସୁକିନ୍ଦା ଥାନା ଅନ୍ତର୍ଗତ ପାଟପୁର ଅଞ୍ଚଳର ଜଣେ ଯୁବତୀଙ୍କୁ ଗଣବଳାତ୍କାର ମାମଲାରେ ଯାଜପୁରରୋଡ୍ ଅତିରିକ୍ତ ଜିଲା ଦୌରାଜଜ୍ ମାନସ କୁମାର ପଣ୍ଡା ଶନିବାର ମୁଖ୍ୟ ଅଭିଯୁକ୍ତ ସବ୍ୟସାଚୀ ବେହେରାଙ୍କୁ ୨୦ ବର୍ଷ ଜେଲ ଦଣ୍ଡରେ ଦଣ୍ଡିତ କରିଛନ୍ତି। ବିଚାରପତି ୧୦ ଜଣଙ୍କ ସାକ୍ଷ୍ୟ ଓ ପ୍ରମାଣକୁ ଆଧାରକରି ଏହି ଦଣ୍ଡାଦେଶ ହେବା ସହ ପୀଡ଼ିତାଙ୍କୁ ୫୦ ହଜାର ଟଙ୍କା କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି। ୨୧ା୪ା୨୦୧୯ରେ ସବ୍ୟସାଚୀ ସୁକିନ୍ଦା ଥାନା ପାଟପୁର ଛକରେ ଏକ ବୋଲେରୋ ରଖି ରାସ୍ତାକଡ଼ ପାନଦୋକାନକୁ ଗୁଟ୍ଖା ଆଣିବାକୁ ଯାଇଥିଲେ। ହେଲେ ଦୋକାନରେ ମାଲିକ ନ ଥିବାବେଳେ ତାଙ୍କ ଝିଅ ବେପାର ସମ୍ଭାଳୁଥିଲେ। ଯୁବତୀ ଜଣକ ଗୁଟ୍ଖା ଦେବାକୁ ହାତ ବଢ଼ାଇବାବେଳେ ତାଙ୍କୁ ସବ୍ୟସାଚୀ ଘୋଷାରି ଆଣି ବୋଲେରୋରେ ଜବରଦସ୍ତ ବସାଇଥିଲେ। ବିଭିନ୍ନ ସ୍ଥାନ ବୁଲେଇ ବୁଲେଇ ଶେଷରେ ଯାଜପୁରରୋଡ୍ ଥାନା ଧବଳଗିରିସ୍ଥିତ ଏକ ଘରୋଇ ଆଇଟିଆଇ ସେଣ୍ଟରରେ ରଖି ସେ ଏବଂ ତାଙ୍କ ସହଯୋଗୀ ଗଣବଳାତ୍କାର କରିଥିଲେ। ଏନେଇ ଯୁବତୀଙ୍କ ବାପାଙ୍କ ଅଭିଯୋଗ ମୁତାବକ ସୁକିନ୍ଦା ଥାନାରେ ଆଇପିସି ଦଫା ୩୭୬ (ଡି), ୩୬୬ ଅନୁଯାୟୀ ୧୧୭/୨୦୧୯ ନମ୍ବରରେ ଏକ ମାମଲା ରୁଜୁ ହୋଇଥିଲା। ଅତିରିକ୍ତ ଏସ୍ପି ବିଜୟ କୁମାର ମଲ୍ଲିକ ଏହି ମାମଲାର ତଦନ୍ତ କରିଥିଲେ। ଉକ୍ତ ମାମଲାକୁ ଯାଜପୁର ରୋଡ୍ ଅଦାଲତର ସରକାରୀ ଓକିଲ ରଜତ କୁମାର ରାଉତ ପରିଚାଳନା କରିଥିଲେ।