ଷ୍ଟିଲ୍ସିଟିରେ ପୁଣି ଗଣବଳାତ୍କାର: ୧୭ବର୍ଷୀୟା ଯୁବତୀଙ୍କୁ ୫ ଯୁବକ କଲେ ଗଣବଳାତ୍କାର
07 ରାଉରକେଲା,୨୬।୯(ସଙ୍ଗୀତା ଜେନା):ପ୍ଲାଣ୍ଟସାଇଟ୍ ଥାନା ଅଞ୍ଚଳରେ ରହୁଥିବା ୧୭ ବର୍ଷୀୟା ପୀଡ଼ିତା ଜଣକ ଏକ ପ୍ରତିଷ୍ଠିତ କଲେଜର ଛାତ୍ରୀ। ଗତ ରବିବାର ରାତିରେ ପୀଡ଼ିତା ନିଜର ୨ ଜଣ ସାଙ୍ଗଙ୍କ ସହ ସିଭିଲଟାଉନଶିପ୍ ଅଞ୍ଚଳର ଏକ ହୋଟେଲ ଆଣ୍ଡ ବାର୍କୁ ଯାଇଥିଲେ। ସେଠାରୁ ୩ ଜଣ ଯୁବକ ତାଙ୍କୁ ଡାକିଆଣି ଟ୍ରାଫିକ୍ ଛକରେ ଥିବା ଏକ ପାର୍କରେ ଗଣବଳାତ୍କାର କରିଥିଲେ। ଏହି ଘଟଣାରେ କୁଆଡ଼େ ଆଉ ୨ଜଣ ଅର୍ଥାତ୍ ମୋଟ ୫ ଜଣ ସମ୍ପୃକ୍ତ ଥିବା ଏତଲାରେ ଉଲ୍ଲେଖ ରହିଛି। ଘଟଣାର ୨ ଦିନ ପରେ ମଙ୍ଗଳବାର ସନ୍ଧ୍ୟାରେ କେତେଜଣ ସମାଜସେବୀଙ୍କ ସହାୟତାରେ ପୀଡ଼ିତାଙ୍କ ବାପା ଥାନାରେ ଲିଖିତ ଅଭିଯୋଗ କରିଛନ୍ତି। ଉକ୍ତ ଅଭିଯୋଗକୁ ଭିତ୍ତିକରି ପୋଲିସ ସନ୍ଦେହରେ କିଛି ଯୁବକଙ୍କୁ ପଚରାଉଚୁରା କରୁଛି ବୋଲି ଏସ୍ଡିପିଓ ଉପାସନା ପାଢ଼ୀ କହିଛନ୍ତି। ଏ ସଂକ୍ରାନ୍ତରେ ରାଉରକେଲା ଡିଆଇଜି ବ୍ରିଜେଶ ରାୟ କହିଛନ୍ତି, ଏହି ଘଟଣା ୨୨ ତାରିଖର। ଥାନାରେ ଅଭିଯୋଗ ହେବା ପରେ ଅଭିଯୁକ୍ତମାନଙ୍କୁ ଧରିବା ପାଇଁ ତୁରନ୍ତ ଅତିରିକ୍ତ ଏସ୍ପି ପି. ଏସ୍. ନାୟକଙ୍କ ନେତୃତ୍ୱରେ ୪ଟି ସ୍ବତନ୍ତ୍ର ଟିମ୍ ଗଠନ କରାଯାଇଛି। ପୀଡ଼ିତାଙ୍କ ଡାକ୍ତରୀ ମାଇନା ସହ ବୟାନ ରେକର୍ଡ କରାଯାଇଛି। ଘଟଣାସ୍ଥଳରେ ପୋଲିସ ଟିମ୍, ଡଗ୍ ସ୍କ୍ବାଡ୍, ସାଇଣ୍ଟିଫିକ୍ ଟିମ୍ ପହଞ୍ଚତ୍ ତଦନ୍ତ କରିଛନ୍ତି। କ୍ରମାଗତ ଏପରି ଘଟଣାକୁ ନିୟନ୍ତ୍ରଣ କରିବା ପାଇଁ ପୋଲିସ ପ୍ରସ୍ତୁତ ରହିଛି। ପୀଡ଼ିତାଙ୍କୁ ନ୍ୟାୟଦେବା ସୁନିଶ୍ଚିତ କରାଯାଉଛି। ଅନେକ ତଥ୍ୟ ତଦନ୍ତ ପ୍ରକ୍ରିୟା ଯୋଗୁ ପ୍ରକାଶ କରିବା ସମ୍ଭବ ହେଉନାହିଁ। ତେବେ ତଦନ୍ତ ପରେ ସାର୍ବଜନୀନ କରାଯିବ ବୋଲି ଡିଆଇଜି ରାୟ କହିଛନ୍ତି। ଅପରପକ୍ଷେ ଏସ୍ଡିପିଓ ପାଢ଼ୀଙ୍କ ନେତୃତ୍ୱରେ ଉକ୍ତ ହୋଟେଲର ସିସିଟିଭି ଯାଞ୍ଚ କରାଯାଇଛି। ପୀଡ଼ିତା, ତାଙ୍କ ସାଙ୍ଗ ଓ ଅନ୍ୟମାନଙ୍କ କାର୍ଯ୍ୟକଳାପ ଆଦିର ସିସିଟିଭି ଫୁଟେଜ୍ ସଂଗ୍ରହ କରାଯାଇଛି।
ଉଲ୍ଲେଖଯୋଗ୍ୟ, ନାବାଳିକା ପୀଡ଼ିତା ଜଣକ ରବିବାର ଦକ୍ଷିଣ ରାଉରକେଲା ଏବଂ ପ୍ଲାଣ୍ଟସାଇଟ୍ ଅଞ୍ଚଳର ୨ଜଣ ସାଙ୍ଗଙ୍କ ସହ ହୋଟେଲକୁ ଯାଇଥିଲେ। ସେଠାରେ ସାଙ୍ଗମାନଙ୍କ ପୁରୁଷବନ୍ଧୁମାନେ ଉପସ୍ଥିତ ଥିଲେ। କିଛି ସମୟପରେ ଉକ୍ତ ନାବାଳିକାଙ୍କ ୨ଜଣ ସାଙ୍ଗ ହୋଟେଲରୁ ପଳାଇ ଯାଇଥିବାବେଳେ ପୀଡ଼ିତା ଏକୁଟିଆ ହୋଇଯାଇଥିଲେ। ବିଳମ୍ବିତ ରାତିରେ ପୀଡ଼ିତା ଘରକୁ ନ ଫେରିବାରୁ ତାଙ୍କ ବାପା ଖୋଜାଖୋଜି କରିଥିଲେ ଏବଂ ଉକ୍ତ ହୋଟେଲ ପରିସରରେ ତାଙ୍କୁ ଦେଖିଥିଲେ। ଥାନାରେ ଅଭିଯୋଗ ହେବା ପରେ ପୋଲିସ କେତେଜଣ ଯୁବକ ଏବଂ ତାଙ୍କ ପରିବାର ଲୋକଙ୍କୁ ଥାନାରେ ଅଟକ ରଖିଥିବା ଚର୍ଚ୍ଚା ହେଉଛି।
ଥାନାକୁ ନେଇ ଦ୍ୱନ୍ଦ୍ୱ, ପୀଡ଼ିତାଙ୍କ ପରିବାର ହଟହଟା ନାବାଳିକା ଗଣବଳାତ୍କାର ମାମଲାରେ ମଙ୍ଗଳବାର ପୀଡ଼ିତାଙ୍କ ପରିବାର ଲୋକେ ଥାନାରେ ଏତଲା ଦେବା ସମୟରେ ଅପ୍ରୀତିକର ପରିସ୍ଥିତି ଉପୁଜିଥିଲା। ଘଟଣାଟି କେଉଁ ଥାନା ଅଧୀନରେ ଯାଉଛି ବୋଲି ଦ୍ୱନ୍ଦ୍ୱ ସୃଷ୍ଟି ହୋଇଥିଲା। ଫଳରେ ପୀଡ଼ିତାଙ୍କ ପରିବାର ସମସ୍ୟାର ସମ୍ମୁଖୀନ ହୋଇଥିଲେ। ଶେଷରେ ପୀଡ଼ିତା ଯାଇଥିବା ହୋଟେଲ ରଘୁନାଥପାଲୀ ଥାନା ଅଞ୍ଚଳରେ ଆସୁଥିବାରୁ ସେଠାରେ ଏତଲା ଦିଆଯାଇଥିଲା।