ଯାଜପୁର ଟାଉନ,୨୩ା୩(ଡି.ଏନ.ଏ.): ଜଣେ ୪ର୍ଥ ଶ୍ରେଣୀ ନାବାଳିକା ଛାତ୍ରୀଙ୍କୁ ସ୍କୁଲ୍ ରାସ୍ତାରୁ ଅପହରଣ କରି ନେଇ ବଳାତ୍କାର କରିଥିବା ମାମଲାରେ ସମ୍ପୃକ୍ତ ଅଭିଯୁକ୍ତଙ୍କୁ ୨୦ଜେଲ ଦଣ୍ଡାଦେଶ ସହ ୧୫ ହଜାର ଟଙ୍କା ଜରିମାନା ଆଦାୟ ନିର୍ଦ୍ଦେଶ ହୋଇଛି। ମାମଲାରେ ମୋଟ୍ ୨୦ଜଣ ସାକ୍ଷୀଙ୍କ ସାକ୍ଷ ଓ ବୟାନକୁ ଆଧାର କରି ଯାଜପୁର ଜିଲା ଅତିରିକ୍ତ ଦୌରା ଜଜ୍ ତଥା ସ୍ବତନ୍ତ୍ର ପୋକ୍ସୋ ଜଜ୍ ଜାନକୀ ବିଶ୍ୱାଳ ଏହି ରାୟ ଶୁଣାଇଛନ୍ତି।
୨୦୧୯ ଅକ୍ଟୋବର ୩୧ରେ ପାଣିକୋଇଲି ଥାନା ଅଞ୍ଚଳର ଜଣେ ୪ର୍ଥ ଶ୍ରେଣୀ ଛାତ୍ରୀ (୯ବର୍ଷ) ଖେଳଛୁଟିରେ ଘରକୁ ଆସି ମଧ୍ୟାହ୍ନଭୋଜନ ସାରି ସ୍କୁଲକୁ ଫେରୁଥିଲେ। ଏହି ସମୟରେ ଅଭିଯୁକ୍ତ ପୂର୍ଣ୍ଣଚନ୍ଦ୍ର ମଲିକ (୪୦) ଛାତ୍ରୀ ଜଣକୁ ରାସ୍ତାରୁ ଉଠାଇ ନେଇ ନିଜ ଘରେ ବଳାତ୍କାର କରିଥିଲେ। ଏ ସମ୍ପର୍କରେ କାହାରିକୁ ଜଣାଇଲେ ଜୀବନରୁ ମାରିଦେବାକୁ ଧମକ ଦେଇଥିଲେ। ଏଣୁ ଭୟରେ ପୀଡ଼ିତା ଏ ଘଟଣାକୁ କେଉଁଠି ପ୍ରକାଶ କରି ନ ଥିଲେ। ତେବେ ଘଟଣାର ପରଦିନ ଅର୍ଥାତ୍ ୧ା୧୧ା୧୯ରେ ପୀଡ଼ିତାଙ୍କ ଶରୀରରେ ଯନ୍ତ୍ରଣା ହେବାରୁ ବାଧ୍ୟ ହୋଇ ସମସ୍ତ ଘଟଣା ବିଷୟରେ ଘର ଲୋକଙ୍କୁ ଜଣାଇଥିଲା। ଏହି ଘଟଣାକୁ ନେଇ ପୀଡ଼ିତାଙ୍କ ବାପା ପାଣିକୋଇଲି ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଥିଲା। ପୀଡ଼ିତାଙ୍କ ପକ୍ଷରୁ ସରକାରୀ ଓକିଲ ରାଜୀବ ମହାନ୍ତି ମାମଲା ପରିଚାଳନା କରିଥିଲେ।
