ବାଲିଚନ୍ଦ୍ରପୁର,୩।୧୧(ସ୍ବ.ପ୍ର.): ବାଲିଚନ୍ଦ୍ରପୁର ଥାନା ଅଞ୍ଚଳର ଜଣେ ଆଦିବାସୀ ନାବାଳିକାଙ୍କୁ ବଳାତ୍କାର ହୋଇଥିବା ସୋମବାର ଥାନାରେ ଅଭିଯୋଗ ହୋଇଛି। ଅଭିଯୋଗରୁ ଜଣାପଡ଼ିଛି ଯେ, ନାନପୁର ବିରୂପା ନଦୀ ପୋଲ ନିକଟରେ ଆଦିବାସୀ ସମ୍ପ୍ରଦାୟର ଜଣେ ଲୋକ ପରିବାର ସହ ରହିଆସୁଛନ୍ତି। ସେ ଅତ୍ୟନ୍ତ ଗରିବ ହୋଇଥିବାରୁ ଏହାର ସୁଯୋଗରେ କୁସୁପୁର ଗ୍ରାମର ଜଣେ ବ୍ୟକ୍ତି ପ୍ରଲୋଭନ ଦେଖାଇ ତାଙ୍କ ନାବାଳିକା ଝିଅକୁ ଭୁବନେଶ୍ୱରଠାରେ ଜଣେ ସରକାରୀ ବାବୁଙ୍କ ବାସଗୃହରେ କାର୍ଯ୍ୟ କରିବା ପାଇଁ ଛାଡ଼ିଥିଲେ। ୨/୩ ବର୍ଷ ହେବ ନାବାଳିକା ସେହି ବାବୁଙ୍କ ଘରେ ରହି କାମ କରି ପାରିଶ୍ରମିକ ବାବଦକୁ ମାସିକ ୩ ହଜାର ଟଙ୍କା ପାଆନ୍ତି। ତେବେ ଉକ୍ତ ବାବୁଙ୍କ ବାସଭବନରେ ତାଙ୍କର ୮୦ ବର୍ଷର ବୃଦ୍ଧ ଶ୍ୱଶୁର ନାବାଳିକାଙ୍କୁ ବଳାତ୍କାର କରିଥିବା ପୀଡ଼ିତାଙ୍କ ମା’ ବାଲିଚନ୍ଦ୍ରପୁର ଥାନାରେ ଅଭିଯୋଗ କରିଛନ୍ତି। ୫ ମାସ ପୂର୍ବରୁ ଏହି ଘଟଣା ଘଟିଥିଲା। ଗତ ଦୁର୍ଗାପୂଜା ପୂର୍ବରୁ ନାବାଳିକା ଗ୍ରାମକୁ ବୁଲିବା ପାଇଁ ଆସିଥିଲେ। ତାଙ୍କ ମା’ ସନ୍ଦେହ କରି ଘଟଣା ସମ୍ପର୍କରେ ଝିଅଠାରୁ ସବୁକଥା ପଚାରି ବୁଝିଥିଲେ। ଏବେ ଘଟଣାଟି ପ୍ରଘଟ ହେବା ପରେ ୨ଦିନ ହେବ ଏକ ‘ଅଡି’ କାର୍ ପୀଡ଼ିତାଙ୍କ ଘର ଚାରିକଡ଼େ ଚକ୍କର କାଟୁଥିବା ସ୍ଥାନୀୟ ଲୋକେ କହିଛନ୍ତି। ତେବେ ବାବୁ ଜଣକ ବଡ଼ ଅଫିସର ହୋଇଥିବାରୁ ସେ ଲୋକ ପଠାଇ ସେମାନଙ୍କୁ ଧମକଚମକ ଦେଉଥିବା ନାବାଳିକାଙ୍କ ମା’ ଥାନାରେ ଅଭିଯୋଗ କରିଛନ୍ତି। ଏ ସମ୍ପର୍କରେ ବାଲିଚନ୍ଦ୍ରପୁର ଥାନାଧିକାରୀ ସୁକାନ୍ତ କୁମାର ପାତ୍ର କହନ୍ତି, ନାବାଳିକା ମା’ଙ୍କ ଅଭିଯୋଗ ଅନୁଯାୟୀ ଆଇପିସି ଦଫା ୩୭୬, ୩୧ ଆର, ୩୨ ବି, ପୋକ୍ସୋ ଆକ୍ଟ ୬ ରେ ମାମଲା (ନଂ. ୩୦୬/୨୦) ରୁଜୁ କରାଯାଇଛି। ଉପରିସ୍ଥ ଅଧିକାରୀଙ୍କ ପରାମର୍ଶ ନିଆଯାଇ ପରବର୍ତ୍ତୀ ପଦକ୍ଷେପ ନିଆଯିବ।