ଭୁବନେଶ୍ୱର,୨୦।୪ (ବ୍ୟୁରୋ): ଧାର୍ ଟଙ୍କା ମାଗିବାରୁ ଜଣେ ମହିଳାଙ୍କୁ ବଳାତ୍କାର କରାଯାଇଛି। ପୁଣି ଏହାର ଭିଡିଓ ରେକର୍ଡ କରାଯିବା ସହ ଧମକ ଦିଆଯାଇ ମଞ୍ଚେଶ୍ୱର ଥାନା ଅଞ୍ଚଳରେ ଏଭଳି ଲଜ୍ଜାଜନକ ଘଟଣା ଘଟିଛି। ପୀଡିତା ଜଣକ ଭୟରେ ପାଟି ଚୁପ୍ କରି ରହିବା ସହ ଶେଷରେ ଥାନାରେ ଅଭିଯୋଗ କରିଛନ୍ତି। ପୋଲିସ ଏକ ମାମଲା (ନଂ.୧୬୭/୨୦୨୩) ରୁଜୁ କରି ତଦନ୍ତ ଆରମ୍ଭ କରିଛି। ଏଥିସହ ପୋଲିସ ଟିମ୍ ବୁଧବାର ପୀଡ଼ିତାଙ୍କୁ କ୍ୟାପିଟାଲ ହସ୍ପିଟାଲରେ ଡାକ୍ତରୀମାଇନା କରାଇବା ସହ ତାଙ୍କର ବୟାନ ରେକର୍ଡ କରିଛି। ଥାନାଧିକାରୀ ସୁଧୀର କୁମାର ସାହୁ କହିଛନ୍ତି, ଏହି ମାମଲାରେ ସତ୍ୟାସତ୍ୟ ଜାଣିବାକୁ ଅଧିକ ତଦନ୍ତ କରାଯାଉଛି। ଅଭିଯୁକ୍ତଙ୍କୁ ଧରିବାକୁ ପ୍ରୟାସ କରାଯାଉଥିବା ସେ କହିଛନ୍ତି। ଏହି ଘଟଣା ପଦାକୁ ଆସିବା ପରେ ଚାରିଆଡ଼େ ଚର୍ଚ୍ଚା ଜୋର ଧରିଛି।
ଅଭିଯୋଗ ଅନୁଯାୟୀ, ଗଜପତିନଗର ଅଞ୍ଚଳରେ ପୀଡ଼ିତାଙ୍କର ଏକ ତେଜରାତି ଦୋକାନ ରହିଛି। କେନ୍ଦ୍ରାପଡ଼ାର ମୃତ୍ୟୁଞ୍ଜୟ ପାତ୍ର ନାମକ ୩୬ ବର୍ଷୀୟ ଯୁବକ ପୀଡ଼ିତାଙ୍କ ଦୋକାନକୁ ଆସି ଅନେକ ସମୟରେ ସଉଦା ନିଅନ୍ତି। ଏପରିକି ଯୁବକ ଜଣକ ଅନେକ ସମୟରେ ବାକିରେ ମଧ୍ୟ ମହିଳାଙ୍କଠାରୁ ସଉଦା ନିଅନ୍ତି। ଚିହ୍ନା ପରିଚିତ ହୋଇଯିବାରୁ ମୃତ୍ୟୁଞ୍ଜୟ ତାଙ୍କ ବାପାଙ୍କ ଦେହ ଅସୁସ୍ଥ କହି ପୀଡ଼ିତାଙ୍କ ଠାରୁ ଚାରି ଥରରେ ୫୦ ହଜାର ଟଙ୍କା ଧାର ନେଇଥିଲେ। ମାସକ ଭିତରେ ଫେରସ୍ତ କରିଦେବାକୁ ପ୍ରତିଶ୍ରୁତି ଦେଇଥିଲେ। ହେଲେ ସେ ନିର୍ଦ୍ଧାରିତ ସମୟ ଭିତରେ ଟଙ୍କା ନ ଦେବାରୁ ପୀଡ଼ିତା ଜଣକ ତାଙ୍କୁ ମାଗିଥିଲେ। ମାର୍ଚ୍ଚ ୨୯ ସାରେ ଘରେ ଟଙ୍କା ଦେଇଦେବେ ବୋଲି ଯୁବକ ଜଣକ କହିଥିଲେ। ହେଲେ ଉକ୍ତ ଦିନ ପୀଡ଼ିତାଙ୍କ ସ୍ବାମୀ ଘରେ ନ ଥିବାବେଳେ ଟଙ୍କା ଫେରସ୍ତ ଆଳରେ ଯୁବକ ଜଣକ କବାଟ ବନ୍ଦ କରି ମହିଳାଙ୍କୁ ଜୋର୍ ଜବରଦସ୍ତ ବଳାତ୍କାର କରିଥିଲେ। ଏହାକୁ ବିରୋଧ କରିବାରୁ ପୀଡ଼ିତାଙ୍କୁ ସେ ହତ୍ୟା ଧମକ ଦେବା ସହ ଏ ବିଷୟରେ ପୋଲିସ କିମ୍ବା ତାଙ୍କ ସ୍ବାମୀଙ୍କୁ ନ ଜଣାଇଲେ ଭଲ
ହେବ ନାହିଁ ବୋଲି କହିଥିଲେ। ଏପରିକି ଯୁବକ ଜଣକ ତାଙ୍କ ମୋବାଇଲରେ ବଳାତ୍କାର ସମୟର ଭିଡିଓ ରେକର୍ଡ କରିଥିଲେ ବୋଲି ମଙ୍ଗଳବାର ଦିଆଯାଇଥିବା ଅଭିଯୋଗ ଫର୍ଦ୍ଦରେ ପୀଡ଼ିତା ଦର୍ଶାଇଛନ୍ତି। ଅନ୍ୟପକ୍ଷରେ ଘଟଣାକୁ ୨୦ ଦିନ ବିତିଯାଇଥିବା ବେଳେ ମହିଳାଙ୍କ ଅଭିଯୋଗ କରିବାକୁ ନେଇ ନାନା ପ୍ରଶ୍ନ ମଧ୍ୟ ଉଠିଛି। ଯଦି ଏହି ବଳାତ୍କାର ସତ ହୋଇଥାଏ ତେବେ ପୋଲିସକୁ ଏ ସଂକ୍ରାନ୍ତରେ ପ୍ରମାଣ ଯୋଗାଡ଼ କରିବା କଷ୍ଟସାଧ୍ୟ ହୋଇପାରେ ବୋଲି ମଧ୍ୟ କୁହାଯାଉଛି।