ସୋନପୁର,୧୮।୧: ସୁବର୍ଣ୍ଣପୁର ଦକ୍ଷତା ବୃଦ୍ଧି ତାଲିମ କେନ୍ଦ୍ର କ୍ୟାମ୍ପସ୍ରେ ଜଣେ ଯୁବତୀଙ୍କୁ ସୋମବାର ଗଣବଳାତ୍କାର କରାଯାଇଛି। ପୂର୍ବାହ୍ନରେ ଏହି ଘଟଣା ଘଟିଛି। ସ୍ପଷ୍ଟ ଦିବାଲୋକରେ ୨ଜଣ ଏହି କାଣ୍ଡ ଭିଆଇବା ଚର୍ଚ୍ଚାର ବିଷୟ ହୋଇଛି। ତେବେ ଦକ୍ଷତା ବୃଦ୍ଧି ତାଲିମ କେନ୍ଦ୍ରର ସିସିଟିଭି ଫୁଟେଜ୍ରୁ ପୋଲିସକୁ ବଳାତ୍କାରୀଙ୍କ ସମ୍ପର୍କରେ ସୁରାକ୍ ମିଳିଛି। ପୋଲିସ ସାଇଣ୍ଟିଫିକ୍ ଟିମ୍ ଦ୍ୱାରା ତଦନ୍ତ କରିବା ସହ ତନାଘନା ଜାରି ରଖିଛି।
ପୀଡିତାଙ୍କ ଘର ବଲାଙ୍ଗୀର ଅଞ୍ଚଳରେ । ସେ ତାଙ୍କ ମା’ଙ୍କ ସହିତ ସୋନପୁର ସହରକୁ ଆସି ଭଡା ଘରେ ରହୁଥିଲେ। ଯୁବତୀ ଓ ତାଙ୍କ ମା’ ଲୋକଙ୍କ ଘରେ କାମ ଧନ୍ଦା କରି ଚଳୁଥିଲେ। ପୀଡିତାଙ୍କ କହିବା ଅନୁଯାୟୀ ପୂର୍ବାହ୍ନରେ ୨ଜଣ ଯୁବକ ତାଙ୍କ ଘରକୁ ଆସିଥିଲେ। ସର୍କିଟ୍ ହାଉସ୍ ନିକଟସ୍ଥ ଅଫିସରେ ଭୋଜିଭାତ ହେଉଛି, ତେଣୁ ସଫେଇ କରିବାକୁ କହି ତାଙ୍କୁ ଡାକି ନେଇଥିଲେ। ଅବ୍ୟବହୃତ ହୋଇ ପଡିଥିବା ତାଲିମ କେନ୍ଦ୍ରର ପଛ ପଟ ଦେଇ ତାଙ୍କୁ ଭିତରକୁ ନେଇ ଯାଇଥିଲେ। ସେଠାରେ ଦୁହେଁ ବଳାତ୍କାର କରିଥିବା ପୀଡିତା ସୋନପୁର ଥାନାରେ ଅଭିଯୋଗ କରିଛନ୍ତି। ପୋଲିସ ପୀଡିତାଙ୍କ ଡାକ୍ତରୀମାଇନା କରିଛି । ଏନେଇ ଥାନାରେ ଏକ ମାମଲା ରୁଜୁ ହୋଇଛି। ସୂଚନା ପାଇ ଅତିରିକ୍ତ ଏସ୍ପି ରମେଶ ଚନ୍ଦ୍ର ପାଣିଗ୍ରାହୀ, ଉତ୍କଳ କେଶରୀ ଦାସ, ଡିଏସ୍ପି ଆନନ୍ଦ ବର୍ଦ୍ଧନ ଗୁରୁ, ହେମସାଗର ନନ୍ଦ, ଆଇଆଇସି ପୁଷ୍ପେନ୍ଦୁ ସାଗର ଘଟଣାସ୍ଥଳକୁ ଯାଇ ତଦନ୍ତ କରିଛନ୍ତି। ସର୍କିଟ୍ ହାଉସ ନିକଟସ୍ଥ ତାଲିମ କେନ୍ଦ୍ରକୁ ପ୍ରଥମ ଏଜୁକେଶନ ଫାଉଣ୍ଡେସନ ନାମକ ସଂସ୍ଥା ଭଡାରେ ନେଇ ବେକାରି ଯୁବତୀ ଯୁବକଙ୍କୁ ପାଇପ୍ ମିସ୍ତ୍ରୀ ତାଲିମ ଦେଉଥିଲେ। କୋଭିଡ୍ ୧୯ ମହାମାରୀ ପାଇଁ ଗତ ୧୦ମାସ ଧରି ଏଠାରେ ତାଲିମ କାର୍ଯ୍ୟ ବନ୍ଦ ରହିଛି।
