ନୟାଗଡ଼ ଅଫିସ,୧୭।୪: ବାଲେଶ୍ୱର ଜିଲା ଜଳେଶ୍ୱର ଥାନା ଅଧୀନ ଖୁଲୁଡା ବଜାରରୁ ଜଣେ ବିବାହିତା ମହିଳାଙ୍କୁ ଅପହରଣ କରାଯାଇ ଏକ ଟ୍ରକ୍ କଣ୍ଟେନରରେ ୨୧ ଦିନ ଧରି ରଖାଯାଇଥିଲା। ଏହି ସମୟ ମଧ୍ୟରେ ତାଙ୍କୁ ୪ ଥର ବଳାତ୍କାର କରାଯାଇଥିବା ନୟାଗଡ଼ ଜିଲା ଫତେଗଡ଼ ଥାନାରେ ଅଭିଯୋଗ ହୋଇଛି। ପୀଡ଼ିତା ଅପହରଣକାରୀଙ୍କଠାରୁ କୌଶଳ କ୍ରମେ ଖସି ଆସିବା ପରେ ଏହି ଘଟଣା ସାମ୍ନାକୁ ଆସିଛି। ଏନେଇ ଫତେଗଡ଼ ଥାନାରେ ଆଇପିସି ଦଫା ୩୬୩, ୩୬୫, ୩୭୬(୨), ୫୦୬, ୩୪ ଅନୁଯାୟୀ ଏକ ମାମଲା(ନଂ.୭୨/୨୧) ରୁଜୁ ହୋଇଛି।
ପୋଲିସ ସୂଚନା ଅନୁସାରେ ପୀଡ଼ିତାଙ୍କ ଘର ବାଲେଶ୍ୱର ଜିଲା ବାଲିଆପାଳ ଥାନା ଅଞ୍ଚଳରେ। ସେ ଖୁଲୁଡ଼ା ବଜାରରେ ରହୁଥିଲେ। ଗତ ମାର୍ଚ୍ଚ ୨୪ରେ ସେ ଖୁଲୁଡ଼ା ବଜାରକୁ କିଛି କାଗଜପତ୍ର ଜେରକ୍ସ କରିବାକୁ ଯାଉଥିଲେ। ଏହି ସମୟରେ ଏକ ବୋଲେରୋରୁ ଜଣେ ବ୍ୟକ୍ତି କୁଲାଡ଼ ରାସ୍ତା କେଉଁଆଡ଼େ ପଚାରିଥିଲେ। ସେ ରାସ୍ତା କହିବା ପରେ ତାଙ୍କୁ ଅପହରଣ କରି ନେଇଥିଲେ। ଚେତା ଫେରିବା ପରେ ସେ ଜାଣିବାକୁ ପାଇଲେ ତାଙ୍କୁ ବଳାତ୍କାର କରାଯାଇଛି। ସେ ଏକ ବନ୍ଦ କଣ୍ଟେନର ଭିତରେ ଅଛନ୍ତି। ତାଙ୍କ ଦେହରେ ବସ୍ତ୍ର ନାହିଁ। କେବଳ ଓଡ଼ଣି ଘୋଡ଼ାଯାଇଛି। ହେଲେ ସେ ଖସି ପାରୁ ନ ଥିଲେ। ଗତ ୧୩ ତାରିଖ ରାତିରେ ବୋଲଗଡ଼ ଷ୍ଟେଶନ ନିକଟରେ କଣ୍ଟେନର ଥିବାବେଳେ କବାଟ ଖୋଲାଥିଲା। ପୀଡ଼ିତା ରାତିରେ ଖସି ଆସି ଫତେଗଡ଼ ଥାନା ଅଧୀନ ଜଗନ୍ନାଥପ୍ରସାଦ ଗଁାରେ ପହଞ୍ଚିଥିଲେ । ସେଠାରେ ଲକ୍ଷ୍ମୀପ୍ରିୟା ବେହେରାଙ୍କ ସହଯୋଗରେ ଜଗନ୍ନାଥପ୍ରସାଦ ଫାଣ୍ଡିରେ ଅଭିଯୋଗ କରିଥିଲେ। ସିଆରପିସି ଦଫା ୧୬୧ରେ ପୀଡ଼ିତାଙ୍କ ବୟାନ ରେକର୍ଡ ପରେ ପରିବାର ଲୋକ ତାଙ୍କୁ ନେଇଯାଇଛନ୍ତି। ଏନେଇ ତଦନ୍ତକାରୀ ଅଧିକାରୀ ଫତେଗଡ଼ ଥାନା ଆଇଆଇସି ଗିରିଜାନନ୍ଦନ ପଟ୍ଟନାୟକ କୁହନ୍ତି, ପୀଡ଼ିତାଙ୍କୁ ୩ରୁ ୪ଥର ବଳାତ୍କାର କରାଯାଇଛି। ଜଣେ ବ୍ୟକ୍ତି ଏପରି କରିଥିବା ପୀଡ଼ିତା ଅଭିଯୋଗ କରିଛନ୍ତି। ପୋଲିସ ତଦନ୍ତ ଜାରି ରଖିଛି ।