ନୂଆଦିଲ୍ଲୀ,୨୧।୮ : ସୋମବାର ସୁପ୍ରିମକୋର୍ଟ ୨୭ ସପ୍ତାହରୁ ଅଧିକ ସମୟ ଭ୍ରୁଣର ଗର୍ଭପାତ କରାଇବାକୁ ଜଣେ ବଳାତ୍କାର ପୀଡିତାଙ୍କୁ ଅନୁମତି ଦେଇଛନ୍ତି। କୋର୍ଟ କହିଛନ୍ତି ବିବାହ ପୂର୍ବରୁ ଗର୍ଭବତୀ ହେବା ଶାରୀରିକ ଏବଂ ମାନସିକ ସ୍ବାସ୍ଥ୍ୟ ଉପରେ ଖରାପ ପ୍ରଭାବ ପକାଇଥାଏ।
ପୀଡିତାଙ୍କ ଡାକ୍ତରୀ ରିପୋର୍ଟକୁ ଧ୍ୟାନରେ ରଖି ଜଷ୍ଟିସ ବି.ଭି ନାଗରତ୍ନା ଏବଂ ଉଜଲ ଭୁୟାଁଙ୍କୁ ନେଇ ଗଠିତ ଏକ ବେଞ୍ଚ କହିଛନ୍ତି ଗୁଜରାଟ ହାଇକୋର୍ଟ ପୀଡିତାଙ୍କୁ ଗର୍ଭପାତ ନ କରିବା ଲାଗି ଆଦେଶ ଦେବା ଠିକ ନୁହେଁ।
ସର୍ବୋଚ୍ଚ ଅଦାଲତ ସୂଚାଇ ଦେଇଛନ୍ତି ଭାରତୀୟ ସମାଜରେ ବିବାହ ପରେ ଗର୍ଭଧାରଣ କେବଳ ଦମ୍ପତିଙ୍କ ପାଇଁ ନୁହେଁ ପରିବାର ଏବଂ ବନ୍ଧୁମାନଙ୍କ ପାଇଁ ମଧ୍ୟ ଆନନ୍ଦ ଏବଂ ଉତ୍ସବର କାରଣ ହୋଇଥାଏ।
ଅପରପକ୍ଷେ, ବିବାହ ପୂର୍ବରୁ ଗର୍ଭଧାରଣ କ୍ଷତିକାରକ, ବିଶେଷତଃ ଯୌନ ଉତ୍ପୀଡ଼ନ କିମ୍ବା ନିର୍ଯାତନା ମାମଲାରେ ଗର୍ଭବତୀ ହୋଇଥିବା ମହିଳାଙ୍କ ଶାରୀରିକ ଏବଂ ମାନସିକ ସ୍ବାସ୍ଥ୍ୟ ଉପରେ ପ୍ରଭାବ ପକାଉଥିବା ଚାପ ଏବଂ ଆଘାତର କାରଣ ଅଟେ।
ଜଣେ ମହିଳାଙ୍କୁ ଯୌନ ଉତ୍ପୀଡ଼ନ ଏକ ଚିନ୍ତାଜନକ ସ୍ଥିତି। ଏହା ଦ୍ୱାରା ଗର୍ଭବତୀ ହେବା ଚିନ୍ତାର ମୁଖ୍ୟ କାରଣ ହୋଇଥାଏ । ବେଞ୍ଚ କହିଛନ୍ତି ଡାକ୍ତରୀ ରିପୋର୍ଟକୁ ଦୃଷ୍ଟିରେ ରଖି ଆମେ ପୀଡିତାଙ୍କୁ ଗର୍ଭଧାରଣ ବନ୍ଦ କରିବାକୁ ଅନୁମତି ଦେଉଛୁ। ଯଦି ଗର୍ଭସ୍ଥ ଶିଶୁ ଜୀବନ୍ତ ବୋଲି ଜଣାପଡେ, ତେବେ ଡାକ୍ତରଖାନା ଗର୍ଭସ୍ଥ ଶିଶୁର ବଞ୍ଚିବା ପାଇଁ ସମସ୍ତ ଆବଶ୍ୟକୀୟ ସହାୟତା ପ୍ରଦାନ କରିବ। ଯଦି ଏହା ବଞ୍ଚିଥାଏ, ତେବେ ଶିଶୁଟି ପୋଷ୍ୟ ସନ୍ତାନ ଭାବରେ ରଖାଯିବା ପାଇଁ ରାଜ୍ୟ ପଦକ୍ଷେପ ଗ୍ରହଣ କରିବ।
ଗର୍ଭଧାରଣର ମେଡିକାଲ ଟର୍ମିନେଶନ ଅଧିନିୟମ ଅନୁଯାୟୀ, ଗର୍ଭପାତର ସର୍ବୋଚ୍ଚ ସୀମା ହେଉଛି ୨୪ ସପ୍ତାହ। ଏହା ବିବାହିତ ମହିଳା,ବଳାତ୍କାର ହୋଇଥିବା ତଥା ଅନ୍ୟାନ୍ୟ ଦୁର୍ବଳ ମହିଳା ଯେପରିକି ଭିନ୍ନକ୍ଷମ ଏବଂ ନାବାଳିକା ପାଇଁ ଲାଗୁ ହୋଇଥାଏ ।
ଏହାପୂର୍ବରୁ ବଳାତ୍କାର ପୀଡିତାଙ୍କ ସହ ଜଡିତ ଏକ ମାମଲାରେ ସୁପ୍ରିମକୋର୍ଟ ଗୁଜରାଟ ହାଇକୋର୍ଟଙ୍କୁ ତାଗିଦ କରିଥିଲେ। ସୁପ୍ରିମକୋର୍ଟ କହିଛନ୍ତି ଯେ କୌଣସି ଅଦାଲତ ଏକ ସର୍ବୋଚ୍ଚ ଅଦାଲତର ନିଷ୍ପତ୍ତି ବିରୋଧରେ ଆଦେଶ ଦେବା ସମ୍ବିଧାନର ବିରୋଧୀ।