ବାଲିଗୁଡ଼ା,୨୨ା୧୦(ଡି.ଏନ୍.ଏ): କନ୍ଧମାଳ ଜିଲା ବାଲିଗୁଡ଼ା ଉପଖଣ୍ଡ ଅନ୍ତର୍ଗତ କୋଟଗଡ଼ ଥାନା ଅଞ୍ଚଳରେ ଜଣେ ମହିଳାଙ୍କୁ ବଳାତ୍କାର ଓ ପରେ ହତ୍ୟା ଧମକ ଦେଇଥିବା ନେଇ ପୀଡ଼ିତାଙ୍କ ପକ୍ଷରୁ ଥାନାରେ ଅଭିଯୋଗ ହୋଇଛି। ରାତିରେ ବାହାରକୁ ମହିଳା ଜଣକ ଶୌଚ ହେବାକୁ ଯାଇଥିବା ବେଳେ ଛୁରି ଦେଖାଇ ବଳାତ୍କାର କରିଥିବା ବେଳେ ଏହି ବିଷୟ ଥାନାରେ କିମ୍ବା ଅନ୍ୟ କାହାରିକୁ ଜଣାଇଲେ ଜୀବନରେ ମାରିଦେବା ନେଇ ବଳାତ୍କାରୀଙ୍କ ୩ ସହଯୋଗୀ ଧମକ ଦେଇଥିଲେ। ଅଭିଯୋଗ ଅନୁଯାୟୀ, କୋଟଗଡ଼ ଥାନା କେସ୍ ନଂ.୧୦୯/୨୨ରେ ଏକ ମାମଲା ରୁଜୁ କରି ସମ୍ପୃକ୍ତ ବଳାତ୍କାରୀଙ୍କୁ ଗିରଫ ସହ ତଦନ୍ତ ଆରମ୍ଭ କରିଛି ପୋଲିସ।
ସୂଚନାନୁଯାୟୀ, ମହିଳା ଜଣଙ୍କ ବାପଘର କୋଟଗଡ଼ ଥାନା ଓରା ପଞ୍ଚାୟତ ଅଞ୍ଚଳକୁ କିଛିଦିନ ହେବ ଆସିଥିଲେ। ଗତ ୧୯ ତାରିଖ ରାତିରେ ମହିଳା ଜଣକ ବାହାରକୁ ଶୌଚ ହେବାକୁ ଯାଇଥିବା ବେଳେ ସେହି ଅଞ୍ଚଳର ଦାମୋଦର ନାୟକ ନାମକ ଜଣେ ବ୍ୟକ୍ତି ସମ୍ପୃକ୍ତା ମହିଳାଙ୍କୁ ଛୁରି ଦେଖାଇ ଭୟଭୀତ କରାଇ ବଳାତ୍କାର କରିଥିବା କୋଟଗଡ଼ ଥାନାରେ ଅଭିଯୋଗ ହୋଇଛି। ଅଭିଯୋଗ ପ୍ରକାରେ କୋଟଗଡ଼ ଥାନାଧିକାରୀ ଧୀରଜ କୁମାର ଲେଙ୍କା ତଦନ୍ତ ଆରମ୍ଭ କରି ସମ୍ପୃକ୍ତ ବ୍ୟକ୍ତିଙ୍କୁ ଗିରଫ କରିଥିବା ବେଳେ ଏତଲାରେ ଧମକ ଦେଇଥିବା ୩ ବ୍ୟକ୍ତିଙ୍କୁ ପୋଲିସ ଅଟକ ରଖି ପଚରାଉଚରା ଜାରି ରଖିଛି। ମହିଳା ଜଣକ ରାୟଗଡ଼ା ଜିଲାର ଚନ୍ଦ୍ରପୁର ଅଞ୍ଚଳରେ ବିବାହ କରିଥିବା ବେଳେ କିଛିଦିନ ହେବ ନିଜ ବାପଘର କୋଟଗଡ଼ ଥାନା ଓରା ଅଞ୍ଚଳକୁ ଆସିଥିବା ବେଳେ ଏଭଳି ଘଟଣା ଘଟିଥିବା ପୋଲିସ ପକ୍ଷରୁ ସୂଚନା ମିଳିଛି। ସେପଟେ ଘଟଣାର ଅଧିକ ତଦନ୍ତ ଜାରି ରଖିଛି କୋଟଗଡ଼ ପୋଲିସ।
