ପାଇକମାଳ,୧୬।୧୧(ବଡ଼ ଶତପଥୀ): ବରଗଡ ଜିଲା ପାଇକମାଳ ଥାନା ସୋଢା ଗ୍ରାମରେ ୪ ବର୍ଷର ଶିଶୁକନ୍ୟାଙ୍କୁ ବଳାତ୍କାର ପରେ ହତ୍ୟା ଘଟଣାରେ ପୋଲିସ ଅଭିଯୁକ୍ତ ପ୍ରଶାନ୍ତ ବରିହା (୨୧)ଙ୍କୁ ଶନିବାର ବରଗଡ ପୋକ୍ସୋ କୋର୍ଟକୁ ଚାଲାଣ କରିଛି।
ସୂଚନାଯୋଗ୍ୟ, ଶୁକ୍ରବାର ଅପରାହ୍ନରେ ପ୍ରଶାନ୍ତ ସୋଢା ଗ୍ରାମର ୪ବର୍ଷର ଜଣେ ଶିଶୁକନ୍ୟାଙ୍କୁ ମାଛ ମାରିଯିବା ବାହାନାରେ ଡାକି ନେଇ ନିକଟସ୍ଥ ପଠାରୀ ଡୁଙ୍ଗୁରୀ ଜଙ୍ଗଲରେ ବଳାତ୍କାର କରିଥିଲେ। ପରେ ସେ ଶିଶୁକନ୍ୟାଙ୍କ ମୁଣ୍ତକୁ ପଥରରେ ଛେଚି ହତ୍ୟା କରି ମୃତଦେହକୁ ଫିଙ୍ଗି ଦେଇଥିଲେ। ପରିବାର ଲୋକେ ଖୋଜାଖୋଜି କରି ଝିଅକୁ ନ ପାଇବାରୁ ସନ୍ଦେହରେ ପ୍ରଶାନ୍ତଙ୍କୁ ପଚରାଉଚରା କରିବାରୁ ସେ ଉକ୍ତ ଶିଶୁକନ୍ୟାଙ୍କୁ ବଳାତ୍କାର ପରେ ହତ୍ୟା କରିଥିବା ସ୍ବୀକାର କରିଥିଲେ। ସୂଚନା ଯୋଗ୍ୟ, ବୁକୁରାମୁଣ୍ଡ ପଞ୍ଚାୟତ ମହୁଲପାଲି ଗାଁ ଅଭିଯୁକ୍ତ ପ୍ରଶାନ୍ତ କିଛିଦିନ ହେଲା ନାବାଳିକାଙ୍କ ଘରକୁ ଆସି ରହୁଥିବା ଥିବା ବେଳେ ଏଭଳି ଜଘନ୍ୟକାଣ୍ଡ ଘଟାଇଥିବା ଜଣାପଡିଛି। ଅନ୍ୟପକ୍ଷେ ପ୍ରଶାନ୍ତ ସମ୍ପର୍କୀୟ ବୋଲି ଜଣାପଡିଛି।
ଅଭିଯୋଗ ପରେ ପାଇକମାଳ ପୋଲିସ ଓ ସାଇଣ୍ଟିଫିକ୍ ଟିମ୍ ଘଟଣାସ୍ଥଳକୁ ଯାଇ ତଦନ୍ତ କରି ପ୍ରଶାନ୍ତଙ୍କୁ ଗିରଫ କରିଥିଲେ। ପାଇକମାଳ ପୋଲିସ ଏ ନେଇ ଏକ ମାମଲା (ନଂ.୨୮୮/୨୪) ରୁଜୁ କରିବା ସହ ଶନିବାର ଅଭିଯୁକ୍ତଙ୍କୁ ବରଗଡ ପସ୍କୋ କୋର୍ଟକୁ ଚାଲାଣ କରିଛି। ଅନ୍ୟପକ୍ଷେ ମୃତଦେହକୁ ପଦ୍ମପୁରରେ ବ୍ୟବଚ୍ଛେଦ କରାଯିବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।
