ବରେଲି, ୬।୭- ଭାରତରେ ଦୀର୍ଘ ୧୧୮ ବର୍ଷର ବ୍ୟବଧାନ ପରେ ବିରଳ ପ୍ରଜାତିର ଅର୍କିଡ ଫୁଲର ସନ୍ଧାନ ମିଳିଛି। ଉତ୍ତର ପ୍ରଦେଶର ଦୁଧ୍ଓ୍ବା ଜାତୀୟ ଉଦ୍ୟାନରେ ଏହି ‘ବିଲୁପ୍ତପ୍ରାୟ ପ୍ରଜାତି’ ଶ୍ରେଣୀଭୁକ୍ତ ଅର୍କିଡ ଫୁଲର ସନ୍ଧାନ ବନଅଧିକାରୀ ଓ ତଥା ବନ୍ୟଜନ୍ତୁ ବିଶେଜ୍ଞମାନେ ଯାଞ୍ଚ ସମୟରେ ପାଇଥିଲେ। ଏହି ଫୁଲର ବେଜ୍ଞାନିକ ନାମ ‘ଇଉଲୋଫିଆ ଓବଟସା’। କିନ୍ତୁ ଏହା ଗ୍ରାଉଣ୍ଡ ଅର୍କିଡ ଭାବେରେ ବେଶ୍ ପରିଚିତ। ଅନ୍ତର୍ଜାତୀୟ ପ୍ରକୃତି ସଂରକ୍ଷଣ ସଂଘ (ଆଇୟୁସିଏନ୍)ର ରେଡ୍ ତାଲିକାଭୁକ୍ତ ଏହି ବିଲୁପ୍ତ ଉଦ୍ଭିଦ ଶେଷଥର ପାଇଁ ୧୯୦୨ ମସିହାରେ ଉତ୍ତର ପ୍ରଦେଶର ପିଲିଭିତ୍ ସହରରେ ଦେଖିବାକୁ ମିଳିଥିଲା। ଇଂଲଣ୍ଡର କ୍ୟୁ ହର୍ବାରିୟମ ଦଲିଲ୍ରେ ଏହି ତଥ୍ୟ ରେକର୍ଡ ହୋଇଛି। ଏହି ବିରଳ ପ୍ରଜାତିର ଅର୍କିଡ ଫୁଲ ଆବିଷ୍କାର କରିଥିବା ଦଳର ସଦସ୍ୟ ତଥା ଦୁଧ୍ଓ୍ବା ଫିଲ୍ଡ ଡିରେକ୍ଟର ସଞ୍ଜୟ ପାଠକ କହିଛନ୍ତି, ‘ଆମେ ଏହି ଫୁଲକୁ ୩୦ ଜୁନରେ ଦେଖିଥିଲୁ। ଏହାର ଚିତ୍ର ଉତ୍ତୋଳନ କରି ବାଂଲାଦେଶର ଉଦ୍ଭିଦ ବିଜ୍ଞାନୀ ମହମ୍ମଦ ସରିଫ ହୁସେନଙ୍କ ନିକଟକୁ ପଠାଇଥିଲୁ। ବର୍ତ୍ତମାନ ଜର୍ମାନୀରେ ଅନୁସନ୍ଧାନ ଜାରି ରଖିଥିବା ହୁସେନ ଏହା ଅର୍କିଡ ଉଦ୍ଭିଦ ବୋଲି ନିଶ୍ଚିତ କରିଛନ୍ତି। ଦୁଧ୍ଓ୍ବା ଜଙ୍ଗଲ ପରିସରରେ ୨ଟି ସ୍ଥାନରେ ଏହି ଉଦ୍ଭିଦର ସନ୍ଧାନ ମିଳିଛି। ଏହାର ଏକ ସବିଶେଷ ଯାଞ୍ଚ କରାଯିବ।’
