ବାରାଣସୀ,୧୫।୧୦(ପି.ଟି.): ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କୁ ବିରୋଧ କରି ସର୍ବସାଧାରଣରେ ବିକ୍ଷୋଭ ପ୍ରଦର୍ଶନ କରାଯାଇଛି। ଚାଇନାର ‘ଜିରୋ କୋଭିଡ୍’ ନୀତିକୁ ସମାଲୋଚନା କରାଯାଇ ରାଜଧାନୀ ବେଜିଂର ବିଭିନ୍ନ ବ୍ୟସ୍ତବହୁଳ ଛକ ସ୍ଥାନରେ ବ୍ୟାନର ଲଗାଯାଇଛି। ଗୁରୁବାର ଲାଗିଥିବା ଏହି ବ୍ୟାନରଗୁଡ଼ିକରେ ରାଷ୍ଟ୍ରପତି ଜିନ୍ପିଙ୍ଗକୁ ସିଧାସଳଖ ସମାଲୋଚନା କରାଯାଇଛି। ଚାଇନା ଶାସକଙ୍କ ବିରୋଧରେ ସର୍ବସାଧାରଣରେ ବିକ୍ଷୋଭ ଏକ ବିରଳ ଘଟଣା। ଜିନ୍ପିଙ୍ଗ ରାଷ୍ଟ୍ରପତି ହେବା ଦିନରୁ ଏଭଳି ବିରୋଧ କେବେ ଦେଖାଯାଇ ନ ଥିଲା। ତେବେ ଉକ୍ତ ବ୍ୟାନର କିଏ ଲଗାଇଛି ତାହା ସ୍ପଷ୍ଟ ଜଣାପଡ଼ି ନାହିଁ। ପୋଲିସ ବିଭିନ୍ନ ଲୋକଙ୍କୁ ଅଟକ ରଖି ପଚରାଉଚରା କରୁଛି।
ବ୍ୟାନରରେ ଜିନ୍ପିଙ୍ଗଙ୍କୁ ଏକଚ୍ଛତ୍ରବାଦୀ ଏବଂ ଉତ୍ପୀଡ଼କ ବୋଲି ଦର୍ଶାଯାଇ ତାଙ୍କର ବହିଷ୍କାର ଦାବି କରାଯାଇଛି। ଜିରୋ କୋଭିଡ୍ ନୀତିର କଟକଣା କୋହଳ କରିବା ଲାଗି ଏଥିରେ ଆହ୍ବାନ ଦିଆଯାଇଛି। ଜନସାଧାରଣଙ୍କର ଅଧିକାର ରହିବା ଆବଶ୍ୟକ, ସେମାନଙ୍କୁ କ୍ରୀତଦାସ ଭଳି ବ୍ୟବହାର କରାଯିବା ଉଚିତ ନୁହେଁ ବୋଲି ବ୍ୟାନରରେ ଲେଖାଯାଇଛି। ଚାଇନା କମ୍ୟୁନିଷ୍ଟ ପାର୍ଟି (ସିପିସି)ର ୨୦ତମ ଜାତୀୟ କଂଗ୍ରେସ ରବିବାର ଡକାଯାଇଛି। ଏହି ବୈଠକରେ ଜିନ୍ପିଙ୍ଗଙ୍କୁ ପୁନର୍ବାର ନେତା ନିର୍ବାଚନ କରାଯିବ ବୋଲି କୁହାଯାଉଥିଲା। ସେ ତୃତୀୟ ଥର ଲାଗି ଚାଇନା ରାଷ୍ଟ୍ରପତି ରହିବେ ବୋଲି ଆଶା କରାଯାଉଥିଲାବେଳେ ତାଙ୍କ ବିରୋଧରେ ଦେଶରେ ବିକ୍ଷୋଭ ଦେଖାଦେଇଛି। ଏହା ସତ୍ତ୍ୱେ ଚାଇନା ତାହାର ଜିରୋ କୋଭିଡ୍ ନୀତି ବଦଳାଇବା ନେଇ କୌଣସି ସୂଚନା ମିଳିନାହିଁ। ଚାଇନାରେ ରାଜନୈତିକ ବିକ୍ଷୋଭ ଅତି ବିରଳ ଘଟଣା ହୋଇଥିବାରୁ ବ୍ୟାନର ଜରିଆରେ ସାଙ୍କେତିକ ବିକ୍ଷୋଭକୁ ଅତ୍ୟନ୍ତ ଗୁରୁତର ସହ ନିଆଯାଇଛି।