ଭାରତୀୟ ରେଲଓ୍ବେ ଇତିହାସ ବହୁ ପୁରୁଣା। ରେଲଓ୍ବେ ବିଷୟରେ ଅନେକ ମଜାଦାର କାହାଣୀ ରହିଛି, ଯାହା ବିଷୟରେ ବହୁ କମ୍ ଲୋକଙ୍କୁ ଜଣା। ଆପଣ ଜାଣିଛନ୍ତି କି ଦେଶରେ ଏଭଳି ଏକ ରେଲଓ୍ବେ ଷ୍ଟେଶନ ରହିଛି, ଯାହା ୨ ରାଜ୍ୟରେ ଅବସ୍ଥିତ। ଶୁଣିଲେ ଆଶ୍ଚର୍ଯ୍ୟ ଲାଗୁଥିବ, ହେଲେ କଥାଟି ସତ। ପଶ୍ଚିମ ରେଲଓ୍ବେର ସୁରଟ-ଭୁସାବଲ ଲାଇନରେ ନଭାପୁର ନାମକ ଏକ ରେଲଓ୍ବେ ଷ୍ଟେଶନ ରହିଛି। ଯାହା ୨ ରାଜ୍ୟରେ ଅବସ୍ଥିତ। ନଭାପୁର ରେଲଓ୍ବେ ଷ୍ଟେଶନର ଅଧା ଅଂଶ ମହାରାଷ୍ଟ୍ରରେ ଓ ଅଧା ଗୁଜରାଟରେ ରହିଥିବା ଜଣାପଡ଼ିଛି। ରେଳମନ୍ତ୍ରୀ ପୀୟୁଷ ଗୋଏଲ ନିଜେ ଏହି ବିଷୟରେ ଟୁଇଟ କରି ସୂଚନା ଦେଇଛନ୍ତି। ସୂଚନାଯୋଗ୍ୟ, ଯେତେବେଳେ ନଭାପୁର ରେଲଓ୍ବେ ଷ୍ଟେଶନ ନିର୍ମାଣ ହୋଇଥିଲା ସେତେବେଳେ ମହାରାଷ୍ଟ୍ର ଓ ଗୁଜାରଟର ବିଭାଜନ ହୋଇ ନ ଥିଲା। ସେହି ସମୟରେ ନଭାପୁର ଷ୍ଟେଶନ ସଂଯୁକ୍ତ ମୁମ୍ବାଇ ପ୍ରଦେଶ ଅଧିନରେ ରହିଥିଲା। ଯେତେବେଳେ ମୁମ୍ବାଇ ପ୍ରଦେଶ ବିଭାଜିତ ହେଲା ସେତେବେଳେ ଏହି ଷ୍ଟେଶନକୁ ୨ରାଜ୍ୟ ମହାରାଷ୍ଟ୍ର ଓ ଗୁଜରାଟରେ ବିଭକ୍ତ କରାଯାଇଥିଲା। ସେବେଠାରୁ ଏହି ଷ୍ଟେଶନର ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଛି। ସବୁଠାରୁ ବିଶେଷ କଥା ହେଲା ଏହି ରେଲଓ୍ବେ ଷ୍ଟେଶନରେ ଯାତ୍ରୀମାନଙ୍କ ପାଇଁ ୪ଟି ଭିନ୍ନ ଭିନ୍ନ ଭାଷାରେ ସୂଚନା ଦିଆଯାଇଥାଏ। ଯେପରିକି ହିନ୍ଦୀ, ଇଂଲିଶ, ଗୁଜରାଟୀ ଓ ମରାଠି ଭାଷାରେ ଆନାଉନ୍ସମେଣ୍ଟ କରାଯାଇଥାଏ। ଯାହାଦ୍ୱାରା ମହାରାଷ୍ଟ୍ର ଓ ଗୁଜରାଟରୁ ଆସୁଥିବା ଯାତ୍ରୀମାନେ ସହଜରେ ବୁଝିପାରିବେ।
