ଭୋଗରାଇ,୧୪।୧୧(ଡି.ଏନ.ଏ.): ବାଲେଶ୍ୱର ଜିଲା ଭୋଗରାଇ ବ୍ଲକ ସୀମାନ୍ତ ପଶ୍ଚିମବଙ୍ଗର ଦୀଘା ମୁହାଣ ମାଛ ମାର୍କେଟ୍କୁ ରବିବାର ଏକ ବିରଳ ପ୍ରଜାତିର ମାଛ ନିଲାମ ପାଇଁ ଆସିଥିଲା। ଏହି ମାଛଟି ଓଡ଼ିଶାର ପାରାଦୀପ ଅଞ୍ଚଳ ଗଭୀର ସମୁଦ୍ରରୁ ମତ୍ସ୍ୟଜୀବୀମାନେ ଧରି ଟ୍ରଲର ଯୋଗେ ଦୀଘା ମାଛ ମାର୍କେଟ୍କୁ ଆଣିଥିଲେ। ମାଛଟିର ଲମ୍ବ ୧୨ ଫୁଟ୍ ରହିଥିବା ବେଳେ ଏହାର ଓଜନ ସାଢ଼େ ୫ କୁଇଣ୍ଟାଲ। ଏହା ମଗର ମାଛ ଭଳି ଚେପ୍ଟା, ମୁହଁ ଲମ୍ବା ଦୁଇ ଧାରରେ ଶକ୍ତ ମୁନିଆ କଣ୍ଟା ରହିଛି। ମାଛକୁ ବଙ୍ଗଳା ଭାଷାରେ ଚିରୁଣୀଫାଳ ଏବଂ ଓଡ଼ିଆରେ ପାନିଆ ଫାଳ ବୋଲି ମତ୍ସ୍ୟଜୀବୀମାନେ କହିଛନ୍ତି। ମାଛଟି ଜୀବନ ରକ୍ଷାକାରୀ ଔଷଧୀୟ କାର୍ଯ୍ୟରେ ବ୍ୟବହୃତ ହେଉଥିବାରୁ କୋଲକାତାର ଏକ କମ୍ପାନୀ ୩୦ହଜାର ଟଙ୍କାରେ କିଣି ନେଇଥିବା ସୂଚନା ମିଳିଛି।
