ଭୁବନେଶ୍ୱର ,୧୪।୭ (ଅଭୟ ଦାଶ): ରାଜ୍ୟର ପ୍ରମୁଖ ଘରୋଇ ଚିକିତ୍ସାଳୟ ତଥା ଭୁବନେଶ୍ୱରର ଚନ୍ଦ୍ରଶେଖରପୁରସ୍ଥିତ କେୟାର ହସ୍ପିଟାଲ ଚିକିତ୍ସା କ୍ଷେତ୍ରରେ ଆଉ ଏକ ନୂଆ ମାଇଲ୍ଷ୍ଟୋନ୍ ଅତିକ୍ରମ କରିଛି। ଏପରିକି କେୟାର ହସ୍ପିଟାଲ ଭୁବନେଶ୍ୱରରେ ଏକ ବିରଳ ଅସ୍ତ୍ରୋପ୍ରଚାର ସଫଳତା ସହ ସମ୍ପୂର୍ଣ୍ଣ କରାଯାଇଛି। ଉଲ୍ଲେଖଯୋଗ୍ୟ, କେୟାର ହସ୍ପିଟାଲ ଭୁବନେଶ୍ୱରର ବରିଷ୍ଠ ନ୍ୟୁରୋସର୍ଜନ ଡା.ଆତ୍ମାରଞ୍ଜନ ଦାଶ ଓ ତାଙ୍କ ଟିମ୍ ଆପେଲ୍ ଭିଜନ୍ ପ୍ରୋ ବ୍ୟବହାର କରି ବିଶ୍ୱର ସବୁଠାରୁ ଅତ୍ୟାଧୁନିକ ମିକ୍ସ୍ ଭର୍ଚୁଆଲ୍ ରିଅଲିଟି ଟେକ୍ନୋଲୋଜି ସାହାଯ୍ୟରେ ଦେଶର ପ୍ରଥମ ନ୍ୟୁରୋ ସର୍ଜରି(ଏଣ୍ଡୋସ୍କୋପିକ୍ ବ୍ରେନ୍ ଓ ମେରୁଦଣ୍ଡ ସର୍ଜରି) ସଫଳତାର ସହିତ କରିଛନ୍ତି। ଏପରିକି ଆପଲ୍ ଭିଜନ୍ ପ୍ରୋ ଭର୍ଚୁଆଲ ରିଏଲିଟି ସିଷ୍ଟମ୍ ଦ୍ୱାରା ପରିଚାଳିତ ଏହି ନ୍ୟୁରୋ ସର୍ଜରି ଅପରେଶନ୍ରେ ସଠିକତା ଏବଂ ସଫଳତା ବେଶ୍ ଅଧିକ ରହିଥାଏ।
ଏହି ପରିପ୍ରେକ୍ଷୀରେ କେୟାର ହସ୍ପିଟାଲ ଭୁବନେଶ୍ୱର ପକ୍ଷରୁ ଶନିବାର ଏକ ଖବରଦାତା ସମ୍ମିଳନୀ ଭୁବନେଶ୍ୱରର ଏକ ୫ତାରକା ହୋଟେଲ ଠାରେ ଆୟୋଜନ କରାଯାଇଥିଲା। ଏହି ଅବସରରେ କେୟାର ହସ୍ପିଟାଲ୍ ଭୁବନେଶ୍ୱରର ଡା.ଆତ୍ମାରଞ୍ଜନ ଦାଶ, ଡା.ଲୋକନାଥ ଦାସ, ଡା.ବିମଳ ସାହୁ, ଡା.ମନ୍ଦାର ପତି, ଦିପ୍ତୀମାନ ବଳିୟାରସିଂହ ଏବଂ ଡା ବିବେକାନନ୍ଦ ସାହୁ ପ୍ରମୁଖ ଯୋଗ ଦେଇ ସମ୍ମିଳନୀର ଆଭିମୂଖ୍ୟ ଓ ମିକ୍ସ୍ ଭର୍ଚୁଆଲ୍ ରିଏଲିଟି ବ୍ରେନ୍ ସର୍ଜରୀ ସମ୍ପର୍କରେ ବିସ୍ତୃତ ଆଲୋକପାତ କରିଥିଲେ।
ସୂଚନାଯୋଗ୍ୟ, ୨୦୨୪ ଜୁଲାଇ ୮ରେ ପ୍ରଥମ ଥର ପାଇଁ ଆପଲ୍ ଭିଜନ୍ ପ୍ରୋ ଭର୍ଚୁଆଲ ରିଏଲିଟି ସିଷ୍ଟମ୍ ବ୍ୟବହାର କରି ଜଣେ ୬୫ ବର୍ଷୀୟା ମହିଳାଙ୍କ ବ୍ରେନ୍ରେ ପିଟୁଟାରୀ ଗ୍ଲାଣ୍ଡରେ ଥିବା ଟ୍ୟୁମର ଏବଂ ପରେ ବାଇ ପୋର୍ଟାଲ ଏଣ୍ଡୋସ୍କୋପିକ୍ ପଦ୍ଧତିରେ ସ୍ପାଇନ୍ ସର୍ଜରି କରାଯାଇଥିଲା। ବିଶେଷ କରି ଏହା କେବଳ ଓଡ଼ିଶାରେ ନୁହେଁ ସମଗ୍ର ଦେଶରେ ମଧ୍ୟ ପ୍ରଥମ ଅପରେଶନ୍ ବୋଲି ହସ୍ପିଟାଲ ପକ୍ଷରୁ ବିସ୍ତୃତ ଭାବେ ସୂଚନା ଦିଆଯାଇଥିଲା। ଏ ସମ୍ପର୍କରେ କେୟାର ହସ୍ପିଟାଲର ଏଚ୍ସିଓଓ କିସଲେ ଆନନ୍ଦ ଏହି ସଫଳତା ପାଇଁ ଡା.ଆତ୍ମାରଞ୍ଜନ ଦାଶ ଓ ତାଙ୍କ ପୂରା ଟିମ୍କୁ ଅଭିନନ୍ଦନ ଜଣାଇବା ସହିତ ଭର୍ଚୁଆଲ ରିଏଲିଟି ସିଷ୍ଟମ୍ ସାହାଯ୍ୟରେ ସଫଳତାର ସହ ବ୍ରେନ୍ ଓ ମେରୁଦଣ୍ଡ ସର୍ଜରି କରିବା କେବଳ ଓଡ଼ିଶାରେ ନୁହେଁ ସମଗ୍ର ଭାରତ ପାଇଁ ଏକ ଗୌରବର କଥା ବୋଲି ସେ ବିସ୍ତୃତ ଭାବେ ମତବ୍ୟକ୍ତ କରିଛନ୍ତି।