ନୂଆଦିଲ୍ଲୀ,୧୧।୩: ଭାରତୀୟ ଶିଳ୍ପପତି ତଥା ଟାଟା ସନ୍ସର ପୂର୍ବତନ ଚେୟାରମ୍ୟାନ୍ ରତନ ଟାଟାଙ୍କ ଲୋକପ୍ରିୟତା କାହିଁରେ କେତେ। ତାଙ୍କଠାରୁ ସମସ୍ତେ କିଛି ନା କିଛି ଶିଖିବାକୁ ଚାହାନ୍ତି। ସାଧାରଣତଃ ସେ ସୋସିଆଲ ମିଡିଆରେ ସେତେଟୋ ସକ୍ରିୟ ନ ହେଲେ ବି ମଝିରେ ମଝିରେ କିଛି ପୋଷ୍ଟ କରିଥାନ୍ତି। ତେବେ ଇନଷ୍ଟାଗ୍ରାମ ଦେଖିଲେ ରତନ ଟାଟା କେବଳ ଗୋଟିଏ ଆକାଉଣ୍ଟକୁ ଫଲୋ(ଅନୁସରଣ) କରୁଥିବା ଦେଖାଯାଇଛି।
ଇନଷ୍ଟାଗ୍ରାମରେ ୮.୫ ମିଲିୟନ ଲୋକ ରତନ ଟାଟାଙ୍କୁ ଫଲୋ କରନ୍ତି। ସେଥିରେ ଅନେକ ବ୍ୟବସାୟୀଙ୍କ ସମେତ ସାଧାରଣ ଲୋକ ଅଛନ୍ତି। ହେଲେ ନିଜେ ସେ କେବଳ ଗୋଟିଏ ଆକାଉଣ୍ଟକୁ ଫଲୋ କରନ୍ତି, ଯାହା ସହ ଟାଟାର ସମ୍ପର୍କ ରହିଛି।
ରତନ ଟାଟା ଚାରିଟେବୁଲ୍ ସଂସ୍ଥା ‘ଟାଟା ଟ୍ରଷ୍ଟ’କୁ ଫଲୋ କରନ୍ତି। ଏହା ତାଙ୍କର ନିଜସ୍ବ ସଂସ୍ଥା। ୧୯୧୯ରେ ଏହା ପ୍ରତିଷ୍ଠା ହୋଇଥିଲା। ଆଜିର ସମୟରେ ଏହା ଭାରତର ସର୍ବ ପୁରାତନ ଫାଉଣ୍ଡେଶନ ମଧ୍ୟରୁ ଅନ୍ୟତମ। ଏକ ଶତାଦ୍ଦୀ ଧରି ଏହା ଶିକ୍ଷା, ସ୍ବାସ୍ଥ୍ୟ, ଜଳ, ପରିମଳ, ଜୀବିକା, ସାମାଜିକ ନ୍ୟାୟ, ଦକ୍ଷତା, ସହରୀକରଣ, ପରିବେଶ, ଡିଜିଟାଲ ସାକ୍ଷରତା, ଖେଳ, କଳା, ହସ୍ତଶିଳ୍ପ ଆଦି କ୍ଷେତ୍ରରେ କାର୍ଯ୍ୟ କରୁଛି। ଏହି ଟ୍ରଷ୍ଟର ଅନୁଦାନରୁ ପ୍ରତିବର୍ଷ ଲକ୍ଷ ଲକ୍ଷ ଲୋକ ଉପକୃତ ହୁଅନ୍ତି। ଏହା ଶହ ଶହ ଛାତ୍ରଙ୍କ ଭବିଷ୍ୟତ ଗଢ଼ି ଆସୁଛି।