ଟାଟା ଗ୍ରୁପ୍ ଚେୟାରମ୍ୟାନ୍ ଥିବା ରତନ ଟାଟା ନୈତିକତାର ଏକ ଜ୍ୱଳନ୍ତ ଉଦାହରଣ। ସେ ନିଜର ସେବା ମନବୃତ୍ତିକୁ ନେଇ ବେଶ୍ ଲୋକପ୍ରିୟ। ୧୯୯୧ରେ ଟାଟା ଗ୍ରୁପ୍ର କାର୍ଯ୍ୟଭାର ଗ୍ରହଣ କରିବା ପରେ ଦୀର୍ଘ ଅଢ଼େଇ ଦଶନ୍ଧି ଧରି ଉତ୍ସର୍ଗୀକୃତ ସେବା ପ୍ରଦାନ କରିଥିଲେ ସେ। ୨୦୧୨ରେ ୭୫ ବର୍ଷ ବୟସରେ ସେ ଅବସର ଗ୍ରହଣ କରିଥିଲେ। ହେଲେ ତାଙ୍କ ବିଷୟରେ ଯଦି କଥା କୁହାଯାଏ ତେବେ ସେ ଜଣେ ତାଲିମପ୍ରାପ୍ତ ପାଇଲଟ୍ କଥା ଉଠେ। ଏପରିକି ତାଙ୍କ ପାଖରେ ଲାଇସେନ୍ସ ମଧ୍ୟ ରହିଛି।
୨୦୦୭ରେ ବାଙ୍ଗାଲୋରରେ ଅନୁଷ୍ଠିତ ଏରୋ ଇଣ୍ଡିଆ ଶୋ’ରେ ପ୍ରଥମ ନାଗରିକ ଭାବେ ସେ ଏଫ୍-୧୬(ଫାଇଟିଂ ଫାଲକନ୍) ଉଡାଇଥିଲେ। ଆମେରିକା ବାୟୁସେନା ବ୍ଲକ-୫୦ର ଏକ ଯୁଦ୍ଧବିମାନରେ ୪୦ ମିନିଟ ଧରି ସହପାଇଲଟ୍ ଥିଲେ। ୬୯ ବର୍ଷ ବୟସରେ ଆମେରିକୀୟ ନିର୍ମିତ ବିମାନ ଉଡ଼ାଇବାରେ ସବୁଠୁ ବୟସ୍କ ବ୍ୟକ୍ତି ତାଲିକାରେ ସେ ନିଜ ନାମକୁ ସାମିଲ କରିଥିଲେ।
ତାଙ୍କର ଏବେ ନିଜସ୍ବ ଡାସଲ୍ଟ ଫାଲକନ୍-୨୦୦୦ ବିମାନ ରହିଛି। ଏହାର ମୂଲ୍ୟ ୨୨ ମିଲିୟନ୍ ଡଲାର ହେବ। କେବେ କେବେ ବୁଲି ଆସିବା ପାଇଁ ସେ ବିମାନ ବାହାର କରିବାକୁ ପସନ୍ଦ କରନ୍ତି।