ପୁରୀ ଅଫିସ,୧୧।୭: ବିଶ୍ୱପ୍ରସିଦ୍ଧ ରଥଯାତ୍ରା ୩ ରଥର ଦକ୍ଷିଣମୋଡ଼ କରି ସିଂହଦ୍ୱାରକୁ ନିଆଯାଇଛି। ସେବାୟତମାନେ ରଥଟାଣି ସିଂହଦ୍ୱାରରେ ପହଞ୍ଚାଇଛନ୍ତି। ଘଣ୍ଟଘଣ୍ଟା, ଛତା ଓ ତୁରୀ ମଧ୍ୟରେ ମହାପ୍ରଭୁଙ୍କଠାରୁ ଆଜ୍ଞା ମାଳ ଆସିବା ପରେ ରଥର ଦକ୍ଷିଣ ମୋଡ଼ କାର୍ଯ୍ୟକ୍ରମ ଆରମ୍ଭ ହୋଇଥିଲା। ପୂଜାପଣ୍ଡା ସାମନ୍ତ ପର୍ଯ୍ୟାୟ କ୍ରମେ ୩ ରଥରେ ଆଜ୍ଞା ମାଳ ମହାରଣା ସେବାୟତଙ୍କୁ ପ୍ରଦାନ କରିଛନ୍ତି। ମହାପ୍ରଭୁଙ୍କ ମଙ୍ଗଳଆଳତି, ଅବକାଶ, ବେଶ ଭଳି ନୀତିକାନ୍ତି ସମ୍ପାଦନ ପରେ ସକାଳଧୂପ ଅନୁଷ୍ଠିତ ହୋଇଥିଲା। ପରେ ଆଜ୍ଞାମାଳ ବାହାରି ନେଇ ପ୍ରକ୍ରିୟା ଆରମ୍ଭ ହୋଇଥିଲା। ମହାପ୍ରଭୁଙ୍କ ଅଧରମାଳକୁ ଆଜ୍ଞାମାଳ ଭାବେ ପ୍ରଦାନ କରାଯାଇଥାଏ। ଆଜ୍ଞାମାଳ ଦେବାର ଉଦ୍ଦେଶ୍ୟ ହେଉଛି ଘୋଷଯାତ୍ରା ପାଇଁ ମହାପ୍ରଭୁଙ୍କ ବିଦ୍ଧିବଦ୍ଧ ଅନୁମତି। ଶ୍ରୀମନ୍ଦିର ମୁଖ୍ୟ ପ୍ରଶାସକ କ୍ରିଷ୍ଣନ୍ କୁମାରଙ୍କ ଉପସ୍ଥିତିରେ ଆଜ୍ଞାମାଳ ପ୍ରଦାନ କରାଯାଇଥିବା ବେଳେ ମୁଖ୍ୟ ପ୍ରଶାସକ ସମର୍ପିତ ମନୋଭାବରେ ଆଜ୍ଞାମାଳକୁ ପ୍ରଣାମ କରି ଶୃଙ୍ଖଳିତ ଓ ବିନା ବାଦାବିଘ୍ନରେ ରଥଯାତ୍ରା ପାଇଁ ପ୍ରାର୍ଥନା କରିଛନ୍ତି। ପ୍ରଥମେ ନନ୍ଦିଘୋଷ, ପରେ ଦେବଦଳନ ଓ ଶେଷରେ ତାଳଧ୍ୱଜ ରଥକୁ ଟଣା ଯାଇଥିଲା। ରଥ ଉପରେ ଟାହିଆ ହଲେଇ ଡ଼ାହୁକ ରଥକୁ ଆଗେଇ ନେବା ପାଇଁ ସେବାୟତଙ୍କୁ ପ୍ରୋତ୍ସାହିତ କରିଥିବା ବେଳେ ଘଣ୍ଟୁଆମାନଙ୍କ ଘଣ୍ଟନାଦରେ ସିଂହଦ୍ୱାର ସମ୍ମୁଖ ପ୍ରକମ୍ପିତ ହୋଇଛନ୍ତି। ଜୟ ଜଗନ୍ନାଥ ଧ୍ୱନିରେ ସିଂହଦ୍ୱାର ସମ୍ମୁଖ ଭକ୍ତିମୟ ହୋଇଯାଇଥିଲା। କୋଭିଡ୍ କଟକଣା ମଧ୍ୟରେ ରଥର ଦକ୍ଷିଣମୋଡ଼ କାର୍ଯ୍ୟକ୍ରମ ସମ୍ପାଦିତ ହୋଇଛି।