ପୁରୀ ଅଫିସ,୨୫ା୬: ଘୋଷଯାତ୍ରାରେ ବାହାରିଥିବା ଦାରୁଦିଅଁ ଏବେ ଆଡ଼ପ ମଣ୍ଡପରେ। ଏପଟେ ଶ୍ରୀମନ୍ଦିର ଖଁା ଖଁା। ଏମିତି ବି ୩ ମାସରୁ ଊର୍ଦ୍ଧ୍ୱ ହେଲାଣି କରୋନା ପାଇଁ ଭକ୍ତଙ୍କ ଦର୍ଶନ ବନ୍ଦ ରହିଛି। ରନ୍ଧାଯାଉନି ଷାଠିଏ ପଉଟି। ଫାଙ୍କା ପଡ଼ିିଛି ଶ୍ରୀମନ୍ଦିର ଆନନ୍ଦ ବଜାର। ବଡ଼ଭାଇ ବଳଭଦ୍ର, ଭଉଣୀ ସୁଭଦ୍ରା ଏବଂ ଶ୍ରୀସୁଦର୍ଶନଙ୍କୁ ସାଥିରେ ଧରି କାଳିଆ ଠାକୁର ଏବେ ଜନ୍ମବେଦିରେ ଲୀଳା କରୁଛନ୍ତି। ଜଗତର କଲ୍ୟାଣ କଥା ଚିନ୍ତା କରୁଥିବା କୋଟିପ୍ରାଣର ଦେବତା କିନ୍ତୁ ତାଙ୍କ ପରିଜନଙ୍କ ଦାୟିତ୍ୱ ଭୁଲି ଯାଇନାହାନ୍ତି। ସବୁବେଳେ ଘର କଥା ବୁଝୁଥିବା ମହାପ୍ରଭୁ ଶ୍ରୀଜଗନ୍ନାଥ ଘର ଛାଡ଼ିବା ବେଳେ ଅର୍ଦ୍ଧାଙ୍ଗିନୀ କିପରି ଚଳିବେ ସେ ବ୍ୟବସ୍ଥା କରିଛନ୍ତି। ଶ୍ରୀଦେବୀଙ୍କ ଚଳିବା ପାଇଁ ଚାଙ୍ଗୁଡ଼ାରେ ଦେଇ ଆସିଛନ୍ତି କଳମ ଶାଗ, ନଡ଼ିଆ ଓ କିଛି ଚାଉଳ। ଏଥିରେ ୯ ଦିନ ଚଳିବେ ଶ୍ରୀଦେବୀ। ରଥଯାତ୍ରା ସହ ଯୋଡ଼ି ହୋଇ ରହିଛି ଏଭଳି ଏକ ନିଆରା ପରମ୍ପରା। ଦାରୁବିଗ୍ରହ ରଥଯାତ୍ରାରେ ଯିବା ପରେ ଶ୍ରୀମନ୍ଦିର ଜଗମୋହନରେ ଶ୍ରୀଦେବୀ, ଭୂଦେବୀ ଓ ମାଧବ ପୂଜା ପାଇଥାନ୍ତି। ଏବେ ଶ୍ରୀଦେବୀଙ୍କ ପାଖରେ ରହିଛି କଳମ ଶାଗ, ନଡ଼ିଆ ଓ ଚାଉଳ। ରୋଷଘର ସମ୍ପୂର୍ଣ୍ଣ ଶୂନ୍ଶାନ୍।
ଏ ସମ୍ପର୍କରେ ଐତିହ୍ୟ ବିଶାରଦ ଡ. ସୁରେନ୍ଦ୍ର କୁମାର ମିଶ୍ର କୁହନ୍ତି, କଥିତ ଅଛି ମହାପ୍ରଭୁ ୯ ଦିନ ପାଇଁ ଘୋଷଯାତ୍ରାରେ ଯିବା ପୂର୍ବରୁ ଶ୍ରୀଦେବୀ କିପରି ଚଳିବେ ସେ ନେଇ ବ୍ୟବସ୍ଥା କରିଥାନ୍ତି। ତେଣୁ ଆଡ଼ପ ମଣ୍ଡପକୁ ଯାତ୍ରା ପୂର୍ବରୁ ଅର୍ଦ୍ଧାଙ୍ଗିନୀଙ୍କୁ କଳମ ଶାଗ, ନଡ଼ିଆ ଓ ଚାଉଳ ଦେଇଯାଇଛନ୍ତି। କିନ୍ତୁ ମହାପ୍ରଭୁଙ୍କୁ ପାଖରେ ନ ପାଇ ଶ୍ରୀଦେବୀ ବିରହ ବେଦନାରେ ରହିଛନ୍ତି। ଶ୍ରୀଦେବୀ ରୁକ୍ମିଣୀ ଭାବେ ମହାପ୍ରଭୁଙ୍କୁ ବିବାହ କରିଥିଲେ ମଧ୍ୟ ଏ ପର୍ଯ୍ୟନ୍ତ ଗଇଣ୍ଠାଳ ଫିଟିନାହିଁ କି ଚତୁର୍ଥୀ କର୍ମ ଓ ବନ୍ଦାପନା ହୋଇନାହିଁ। ବିରହିଣୀ ଶ୍ରୀଦେବୀ ବିଳାସ ବ୍ୟସନରେ ନ ରହି ସାଧାରଣ ଜୀବନଯାପନ କରୁଛନ୍ତି। ମହାପ୍ରଭୁଙ୍କ ପାଇଁ ଷାଠିଏ ପଉଟି ରାନ୍ଧୁଥିବା ମା’ ବର୍ତ୍ତମାନ ନିଜ ପାଇଁ ଗଣ୍ଡେ ରୋଷେଇ କରୁନାହାନ୍ତି। ସ୍ବାଦିଷ୍ଟ ବ୍ୟଞ୍ଜନ ପରିତ୍ୟାଗ କରି କଳମ ଶାଗ, ନଡ଼ିଆ ଓ ଚାଉଳରେ ଚଳାଇ ଦେଉଛନ୍ତି।
