ଗଞ୍ଜାମ,୩୧ା୧୦(ଡି.ଏନ୍.ଏ.): ଅଭାବ ଅନଟନ ହେଲେ ସାଧାରଣତଃ ଲୋକେ ସୁନା ରୁପା ବନ୍ଧକ ରଖି ଟଙ୍କା ଧାର ଆଣିଥାନ୍ତି l କିନ୍ତୁ ପରିବାର ବୋଝ ପାଇଁ ସରକାର ପ୍ରଦାନ କରିଥିବା ରାଶନକାର୍ଡ ମାତ୍ର ୧୦ ହଜାର ଟଙ୍କାରେ ବନ୍ଧା ପକାଇବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। କଥାଟା ଆଶ୍ଚର୍ଯ୍ୟ ହେଲେ ବି ନିରାଟ ସତ୍ୟ l
ଏଭଳି ଏକ ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲା ରମ୍ଭା ଲକ୍ଷ୍ମୀପୁର ଅଞ୍ଚଳରେ l ଉକ୍ତ ଗ୍ରାମର ରଘୁନାଥ ବେହେରା ତାଙ୍କ ସ୍ତ୍ରୀ, ତିନି ଝିଅ ଓ ଗୋଟିଏ ପୁଅ l ଅତ୍ୟନ୍ତ ଗରିବ ପରିବାର l ଏଠାରେ ରୋଜଗାର ନ ମିଳିବାରୁ ଦୁଇବଡ଼ ଝିଅ ପାଞ୍ଚବର୍ଷ ତଳେ ଦିଲ୍ଲୀର ଏକ ସୂତାକଳରେ କାମ କରିବାକୁ ଯାଇଥଲେ। ସେଠାରେ କାମ କରୁଥିବା ଅବସ୍ଥାରେ ଉପରୁ ତଳେ ପଡ଼ି ଆହତ ହୋଇଯାଇଥିଲେ ବଡ଼ ଝିଅ ସନ୍ଧ୍ୟା ରାଣୀ ବେହେରା(୨୭)। ଉକ୍ତ ସୂତାକଳ ମାଲିକ ମାତ୍ର ୧୦୦୦ ଟଙ୍କା ଦେଇ ଚୁପ୍ ବସିଯାଇଥିଲା l ଏନେଇ ସନ୍ଧ୍ୟାଙ୍କ ପରିବାର ଲୋକଙ୍କୁ ଖବର ଦେବା ପରେ ବାପା ଯାଇ ଝିଅକୁ ଆଣି ବ୍ରହ୍ମପୁର ଡାକ୍ତରଖାନାରେ ଦେଖାଇଥିଲେ। ତାଙ୍କର ହାଡ଼ ଭାଙ୍ଗି ଯାଇଥିବାରୁ ସେହି ଦିନ ଠାରୁ ଆଜିକୁ ପାଞ୍ଚ ବର୍ଷ ହେବ ସନ୍ଧ୍ୟା ଚାଲି ପାରୁନାହାନ୍ତି। ଏଭଳି ପରିସ୍ଥିତି ରେ ମା’ ବୈଦେହୀ ଝିଅର ଚିକିତ୍ସା ପାଇଁ ଗ୍ରାମର ଅଧିକାଂଶ ଲୋକଙ୍କଠାରୁ ଟଙ୍କା ଧାର ଆଣିବା ପରେ ଆଉ କେହି ଟଙ୍କା ଦେବାକୁ ମନା କରି ଦେଇଥିଲେ l ଫଳରେ ସାଙ୍କ ପରିବାର ଲୋକେ କୌଣସି ଉପାୟ ନ ପାଇ ସେହି ଗ୍ରାମର ଜଣେ ଲୋକଙ୍କ ଠାରୁ ୧୦ ହଜାର ଟଙ୍କା ଆଣି ନିଜର ରାଶନକାର୍ଡକୁ ବନ୍ଧା ପକାଇ ଦେଇଥିଲେ l କୌଣସି ମତେ ଗଞ୍ଜାମ ସହରର ଯୁବ ସ୍ବେଚ୍ଛାସେବୀ ତଥା ପୂର୍ବତନ ଏମ୍ପି ପ୍ରତିନିଧି ସୁଧୀର କୁମାର ପାଢ଼ୀ, ବିଜେଡି ଯୁବ ନେତା ରାକେଶ ରଞ୍ଜନ ଦାଶ ଓ ଜୟଶ୍ରୀ ଛକ ଅଞ୍ଚଳର ବିଜୟ କୁମାର ସାହୁ ପ୍ରମୁଖ ଉକ୍ତ ଗ୍ରାମଞ୍କୁ ଯାଇ ଉକ୍ତ ପରିବାରକୁ ୧୦ ହଜାର ଟଙ୍କା ଦେଇ ବନ୍ଧା ପଡ଼ିଥିବା ରାଶନକାର୍ଡ ମୁକୁଳାଇ ଥିଲେ l ସରକାରଙ୍କ ଆବସ ଯୋଜନାରେ ଘରଟିଏ ପାଇଁ ରମ୍ଭା ଏନଏସି କାର୍ଯ୍ୟ ନିର୍ବାହୀ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଛନ୍ତି ବୋଲି ଏମ୍ପି ପ୍ରତିନିଧି ସୂଚନା ଦେଇଛନ୍ତି।
