ପାରଳାଖେମୁଣ୍ଡି,୩ା୪(ଡି.ଏନ୍.ଏ): କେନ୍ଦ୍ର ଓ ରାଜ୍ୟ ସରକାର ଗରିବ ଲୋକମାନଙ୍କ ପାଇଁ ଖାଦ୍ୟ ସୁରକ୍ଷା ଯୋଜନାରେ ଚାଉଳ ଓ ଗହମ ଯୋଗାଇ ଦେଉଛନ୍ତି। ହେଲେ ଅନେକ ସ୍ଥାନରେ ଏହି ଯୋଜନାରେ ଅଯୋଗ୍ୟ ହିତାଧିକାରୀମାନେ ଫାଇଦା ପାଉଥିବା ବେଳେ ପ୍ରକୃତ ହିତାଧିକାରୀଙ୍କ ପାଖରେ ପହଞ୍ଚୁ ନଥିବା ଦେଖିବାକୁ ମିଳୁଛି। ଏପରି ଏକ ଘଟଣା ଦେଖିବାକୁ ମିଳିଛି ଗଜପତି ଜିଲା ମୋହନା ବ୍ଲକରେ। କେତେକ ଗରିବ ପରିବାର ରାସନ କାର୍ଡ (ଖାଉଟି କାର୍ଡ)ଟିଏ ପାଇଁ ବାରମ୍ବାର ପ୍ରଶାସନ ଠାରେ ଗୁହାରି କରୁଥିଲେ ମଧ୍ୟ ତାଙ୍କୁ ଏହି କାର୍ଡ ମିଳିପାରୁନାହିଁ। ଫଳରେ ସେମାନେ ସରକାରଙ୍କ ଏହି ଯୋଜନାରେ ଚାଉଳ କି ଗହମ ପାଇପାରୁନାହାନ୍ତି।
ମୋହନା ବ୍ଲକ ଚନ୍ଦ୍ରଗିରି ପଞ୍ଚାୟତ ଯୁବଗାଁର ପୂର୍ଣ୍ଣିମା ନାୟକ, ମଞ୍ଜୁଳା ନାୟକ ଓ ଅନ୍ୟ ଜଣେ ମଞ୍ଜୁଳା ନାୟକ ଏପରି ଅଭିଯୋଗ କରିଛନ୍ତି। ଏମାନଙ୍କ ପାଖରେ ରହିବା ପାଇଁ ଭଲ ଘରଟିଏ ମଧ୍ୟ ନାହିଁ। ସମସ୍ତେ ଝୁମ୍ପୁଡି ଘରେ ବସବାସ କରନ୍ତି। ପୂର୍ଣ୍ଣିମା ନାୟକ ମୂଲ ଲାଗୁଥିବା ବେଳେ ତାଙ୍କର ଦୁଇଟି ଛୋଟ ପୁଅ ଅଛନ୍ତି। ସ୍ବାମୀ ନବିନା ଦାଦନ ଶ୍ରମିକ ଖଟିବା ପାଇଁ ମହାରାଷ୍ଟ୍ର ଯାଇଛନ୍ତି। ସେ ଯାହା ରୋଜଗାର କରି ଦେଉଛନ୍ତି ସେଥିରେ ପରିବାର ଚଳି ପାରୁନଥିବାରୁ ନିଜେ ମଧ୍ୟ ମୂଲ ଲାଗି ପରିବାର ପୋଷୁଥିବା କହିଛନ୍ତି। ସେହିଭଳି ମଞ୍ଜୁଳା ନାୟକଙ୍କ ଦୁଇଟି ଶିଶୁ ଥିବା ବେଳେ ଉଭୟ ସ୍ବାମୀ ସ୍ତ୍ରୀ ମୂଲ ଲାଗି ଚଳନ୍ତି। ଅନ୍ୟଜଣେ ମଞ୍ଜୁଳାଙ୍କ ୪ ଟି ସନ୍ତାନ ଥିବାବେଳେ ଉଭୟ ସ୍ବାମୀ ସ୍ତ୍ରୀ ମଧ୍ୟ ମୂଲ ଲାଗି ଚଳନ୍ତି। କିନ୍ତୁ ଏମାନଙ୍କୁ ଖାଦ୍ୟ ସୁରକ୍ଷା ଯୋଜନାରେ ସାମିଲ କରାଯାଇନାହିଁ। ରାସନ କାର୍ଡ ପାଇବା ପାଇଁ ପଞ୍ଚାୟତଠାରୁ ଆରମ୍ଭ କରି ବ୍ଲକ ପ୍ରଶାସନ ପର୍ଯ୍ୟନ୍ତ ବାରମ୍ବାର ଗୁହାରି କରିଥିଲେ ମଧ୍ୟ ଆଜି ଯାଏଁ ରାସନ କାର୍ଡ ପାଇନଥିବା ଅଭିଯୋଗ କରିଛନ୍ତି। ଏହିପରି ଅନେକ ଅନେକ ଗରିବ ହିତାଧିକାରୀ ଅଛନ୍ତି, ଯେଉଁମାନେ ଏହି ଯୋଜନାର ସୁଫଳ ପାଇପାରୁନାହାନ୍ତି।
ଅପରପକ୍ଷରେ ଚନ୍ଦ୍ରଗିରି, ଲବାରସିଂ ଓ ଜିରାଙ୍ଗ ପଞ୍ଚାୟତରେ ବସବାସ କରୁଥିବା ତୀବତୀୟମାନଙ୍କୁ ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ଖାଦ୍ୟ ସୁରକ୍ଷା ଯୋଜନାରେ ସାମିଲ କରାଯାଇ ବିଡିଓ, ଯୋଗାଣ ଅଧିକାରୀ ଓ ସରପଞ୍ଚମାନଙ୍କ ଉପସ୍ଥିତିରେ ସେମାନଙ୍କୁ ରାସନ କାର୍ଡ ବଣ୍ଟନ କରାଯାଇଛି। ବର୍ତ୍ତମାନ ସୁଦ୍ଧା ଏହି ତିନୋଟି ପଞ୍ଚାୟତରେ ୨୩୭ ପରିବାରକୁ ଏହି ଯୋଜନାରେ ସାମିଲ କରାଯାଇ ରାସନ କାର୍ଡ ବଣ୍ଟନ କରାଯାଇଛି। ସେମାନେ ବିଳାସପୂର୍ଣ୍ଣ ଜୀବନ ବିତାଉଥିବା ବେଳେ ସେମାନଙ୍କୁ ରାସନ କାର୍ଡ ବଣ୍ଟନ କରାଯାଉଥିବା ଅଭିଯୋଗ କରିଛନ୍ତି ଗରିବ ହିତାଧିକାରୀ। ତେବେ ଏ ନେଇ ଯୋଗାଣ ଅଧିକାରୀ ଶୁଭେନ୍ଦୁ ପାଣିଗ୍ରାହୀ କହିଛନ୍ତି, ବର୍ତ୍ତମାନ ରାଜ୍ୟ ସରକାର ନୂତନ ହିତାଧିକାରୀଙ୍କୁ ସାମିଲ କରିବା ନେଇ କୌଣସି ଯୋଜନା ହୋଇନାହିଁ। ଯେତେବେଳେ ଏହି ପ୍ରକ୍ରିୟା ଆରମ୍ଭ ହେବ ସେମାନଙ୍କୁ ନିଶ୍ଚିତ ଏହି ଯୋଜନାରେ ସାମିଲ କରାଯାଇ ରାସନ କାର୍ଡ ଯୋଗାଇ ଦିଆଯିବ।