ନୂଆଦିଲ୍ଲୀ,୫।୭: ଏଜବାଷ୍ଟନଠାରେ ଭାରତ ଏବଂ ଇଂଲଣ୍ଡ ମଧ୍ୟରେ ଖେଳାଯାଇଥିବା ପଞ୍ଚମ ତଥା ଅନ୍ତିମ ଟେଷ୍ଟର ଚତୁର୍ଥ ଦିନରେ ନିରାଶାଜନକ ପ୍ରଦର୍ଶନ କରିଥିଲା ଟିମ୍ ଇଣ୍ଡିଆ। ଏଥିଯୋଗୁ ଇଂଲଣ୍ଡର ବ୍ୟାଟ୍ସମ୍ୟାନ୍ମାନେ ଜବରଦସ୍ତ ବ୍ୟାଟିଂ କରି ମ୍ୟାଚ୍କୁ ଜିତି ସିରିଜ ଡ୍ର କରିବାରେ ସଫଳ ହୋଇଛନ୍ତି। ଦଳର ଏଭଳି ପ୍ରଦର୍ଶନକୁ ନେଇ ଭାରତର ପୂର୍ବତନ କୋଚ୍ ରବି ଶାସ୍ତ୍ରୀ ଖପ୍ପା ହୋଇଛନ୍ତି। ଏପରିକି ଖୋଲାଖୋଲି ଭାବେ ଏହାକୁ ସମାଲୋଚନା କରିଛନ୍ତି।
ଶାସ୍ତ୍ରୀ କହିଛନ୍ତି, ପଞ୍ଚମ ଟେଷ୍ଟର ଚତୁର୍ଥ ଦିନ ଦ୍ୱିତୀୟ ଇନିଂସରେ ବ୍ୟାଟିଂ ସମୟରେ ଭାରତର ‘ଭୟ’ ଏବଂ ଖେଳରେ ‘ପ୍ରତିରକ୍ଷା’ ମନୋଭାବ ଯୋଗୁ ଇଂଲଣ୍ଡକୁ ପ୍ରତ୍ୟାବର୍ତ୍ତନ କରିବାର ସୁଯୋଗ ମିଳିଗଲା। ଏହା ବେଶ ନିରାଶାଜନକ। କାରଣ ଭାରତୀୟ ଦଳ ଭଲ ବ୍ୟାଟିଂ କରି ଘରୋଇ ଦଳ ହାତରୁ ମ୍ୟାଚ୍ ଛଡ଼ାଇ ନେଇ ପାରିଥାନ୍ତେ। ସେମାନଙ୍କୁ ଦୁଇଟି ଅଧିବେଶନ ପାଇଁ ବ୍ୟାଟିଂ କରିବାର ଥିଲା। ହେଲେ ସେମାନେ ମଧ୍ୟାହ୍ନ ଭୋଜନ ବିରତି ପରେ ଡରି ଡରି ଖେଳୁଥିଲେ। ଉଇକେଟ ହରାଇଥିଲେ ମଧ୍ୟ ସେମାନେ ରିସ୍କ ନେଇଥାନ୍ତେ। କାରଣ ସେହି ସମୟରେ ରନ୍ର ଆବଶ୍ୟକତା ଥିଲା। ହେଲେ ସେମାନେ ତାହା ନ କରି ଶୀଘ୍ର ଉଇକେଟ ହରାଇଥିଲେ। ଫଳରେ ଇଂଲଣ୍ଡକୁ ବ୍ୟାଟିଂ କରିବାକୁ ଯଥେଷ୍ଟ ସମୟ ମିଳିଗଲା।
ଅପରପକ୍ଷେ ଇଂଲଣ୍ଡର ପୂର୍ବତନ ଅଧିନାୟକ କେଭିନ ପିଟରସେନ ଭାରତ ଅଧିନାୟକ ଜସପ୍ରିତ ବୁମ୍ରାଙ୍କ ରଣନୀତିକୁ ନେଇ ପ୍ରଶ୍ନ ଉଠାଇଛନ୍ତି। ମଙ୍ଗଳବାର ଖେଳର ଚତୁର୍ଥ ଦିନରେ ତାଙ୍କ ରଣନୀତି ଠିକ୍ ନ ଥିଲା। ସେ ଖେଳାଳିମାନଙ୍କୁ ଭୁଲ୍ ଢ଼ଙ୍ଗରେ ସଜାଇ ଥିବାରୁ ଷ୍ଟାଇକ୍ ରୋଟେଟ୍ କରିବା ସହଜ କରିଦେଇଥିବା ସେ କହିଛନ୍ତି।