ନୂଆଦିଲ୍ଲୀ,୧୪।୫: ଅନ୍ତର୍ଜାତୀୟ କ୍ରିକେଟ କାଉନ୍ସିଲ(ଆଇସିସି) ପକ୍ଷରୁ ସଦ୍ୟ ପ୍ରକାଶ ପାଇଥିବା ଟେଷ୍ଟ ଟିମ୍ ର଼୍ୟାଙ୍କିଙ୍ଗ୍ରେ ଶୀର୍ଷ ସ୍ଥାନ ବଜାୟ ରଖିଛି ଭାରତ। ଏହାକୁ ନେଇ ଖୁସି ପ୍ରକାଶ କରିଛନ୍ତି ମୁଖ୍ୟ କୋଚ୍ ରବି ଶାସ୍ତ୍ରୀ। ସେ କହିଛନ୍ତି, ଭାରତୀୟ ଟିମ୍ ସମସ୍ତ ବାଧାକୁ ସହଜରେ ପାର୍ କରିବା ପରେ ଟେଷ୍ଟ କ୍ରିକେଟରେ ଏକ ନମ୍ବର ସ୍ଥାନ ପାଇବାକୁ ଯୋଗ୍ୟ ଥିଲା। ଦଳ ଦୃଢ଼ ସଂକଳ୍ପ ଏବଂ ଏକାଗ୍ରତା ଯୋଗୁ ଉଲ୍ଲେଖନୀୟ ପ୍ରଦର୍ଶନ କରିଥିଲା। ଏହାକୁ ଖେଳାଳିମାନେ ନିଜସ୍ବ ଶୈଳୀରେ ହାସଲ କରିଛନ୍ତି। ମଝିରେ ନିୟମ ବଦଳିଯାଇଥିଲା, ହେଲେ ଭାରତୀୟ ଟିମ୍ ସବୁ ବାଧାକୁ ଏଡ଼ାଇ ଭଲ କ୍ରିକେଟ ଖେଳିଥିଲା। ସେ ଏହି ଶାନ୍ତ ଟିମ୍କୁ ନେଇ ଗର୍ବ କରନ୍ତି ବୋଲି କହିଛନ୍ତି।
ପ୍ରକାଶ ଯେ, ଆଇସିସି ପକ୍ଷରୁ ଜାରି କରାଯାଇଥିବା ବାର୍ଷିକ ଅପ୍ଡେଟ୍ ଅନୁଯାୟୀ, ଭାରତ ୧୨୧ ରେଟିଂ ପଏଣ୍ଟ ସହ ୧ ନମ୍ବର ସ୍ଥାନରେ ରହିଛି। ମୋଟ ୨୪ ମ୍ୟାଚ୍ରୁ ଦଳ ୨୯୧୪ ପଏଣ୍ଟ ହାସଲ କରିଛି। ସେହିଭଳି ନ୍ୟୁଜିଲାଣ୍ଡ ଦ୍ୱିତୀୟ, ଇଂଲଣ୍ଡ ତୃତୀୟ ଏବଂ ଅଷ୍ଟ୍ରେଲିଆ ଚତୁର୍ଥ ସ୍ଥାନରେ ରହିଛି।
