ଦୁବାଇ,୯।୧୧: ଭାରତର ମୁଖ୍ୟ ପ୍ରଶିକ୍ଷକ ଭାବେ କାର୍ଯ୍ୟକାଳ ଶେଷ ହେବା ପରେ ରବି ଶାସ୍ତ୍ରୀ ସେ ପୁଣି କ୍ରିକେଟ କମେଣ୍ଟ୍ରିକୁ ଫେରିପାରନ୍ତି। ୫୯ ବର୍ଷୀୟ ଶାସ୍ତ୍ରୀ ମୁଖ୍ୟ ପ୍ରଶିକ୍ଷକ ହେବା ପୂର୍ବରୁ ଜଣେ ସମୀକ୍ଷକ ଭାବରେ ନିଜର ସ୍ବତନ୍ତ୍ର ସ୍ଥାନ ନିରୂପଣ କରିଥିଲେ। ସୋମବାର ନାମିବିଆ ବିପକ୍ଷରେ ଭାରତର ବିଜୟ ପରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ଶାସ୍ତ୍ରୀ ତାଙ୍କ ଭବିଷ୍ୟତ ଯୋଜନା ବିଷୟରେ ମଧ୍ୟ ସଙ୍କେତ ଦେଇଛନ୍ତି।
ଶାସ୍ତ୍ରୀ କହିଛନ୍ତି, ‘ମୋର କାର୍ଯ୍ୟକାଳ ସମୟରେ ବିଶେଷ ଉପଲବ୍ଧି ବିଷୟରେ କଥା ହେଲେ ଅଷ୍ଟ୍ରେଲିଆକୁ (ସେମାନଙ୍କ ମାଟିରେ) ପରାସ୍ତ କରିବା ଗୋଟିଏ। ଇଂଲଣ୍ଡରେ ଆମେ ସିରିଜରେ ଆଗରେ ଥିଲୁ। ଏହି ସିରିଜ ଆସନ୍ତା ବର୍ଷ ଶେଷ ହେବ। ବୋଧହୁଏ ମୁଁ ସେହି ମ୍ୟାଚ୍ରେ କମେଣ୍ଟ୍ରି କରିବି।’ ଏହାଛଡ଼ା ଶାସ୍ତ୍ରୀ ଆଇପିଏଲରେ କୋଚ ଭୂମିକା ଗ୍ରହଣ କରିପାରନ୍ତି ବୋଲି ଚର୍ଚ୍ଚା ହେଉଛି।
ଭାରତର ପରାଜୟ ପରେ ଅନେକ ସମୟରେ କରାଯାଉଥିବା ସମାଲୋଚନା ଉପରେ ଶାସ୍ତ୍ରୀ କହିଛନ୍ତି, ସମାଲୋଚନା କାର୍ଯ୍ୟଦକ୍ଷତା ଉପରେ ନିର୍ଭର କରେ। ଯଦି ତୁମେ ଭଲ କର ତେବେ ତୁମର ପ୍ରଶଂସା ହେବ। ଯଦି ତୁମେ ଭଲ ପ୍ରଦର୍ଶନ ନ କର ତେବେ ତୁମର ସମାଲୋଚନା କରାଯିବ।
