ବର୍ମିଂହାମ,୩।୭: ଇଂଲଣ୍ଡ ବିପକ୍ଷ ଏଜବାଷ୍ଟନ ଟେଷ୍ଟରେ ଭାରତୀୟ ଟିମ୍ର ନେତୃତ୍ୱ ସମ୍ଭାଳୁଛନ୍ତି ଜସପ୍ରିତ ବୁମ୍ରା। ଶନିବାର ଟେଷ୍ଟର ଦ୍ୱିତୀୟ ଦିନରେ ଇଂଲଣ୍ଡ ଦ୍ରୁତ ବୋଲର୍ ଷ୍ଟୁଆର୍ଟ ବ୍ରଡ୍ଙ୍କ ଓଭରରେ ବିସ୍ଫୋରକ ବ୍ୟାଟିଂ କରି ଚର୍ଚ୍ଚାରେ ରହିଛନ୍ତି ସେ। ଏହି କ୍ରମରେ ଟିମ୍ ଇଣ୍ଡିଆର ପୂର୍ବତନ କୋଚ୍ ରବି ଶାସ୍ତ୍ରୀ ବୁମ୍ରାଙ୍କ ପ୍ରଶଂସାରେ ଶତମୁଖ ହୋଇଛନ୍ତି।
ବୁମ୍ରାଙ୍କ ଉପଲବ୍ଧିକୁ ଶାସ୍ତ୍ରୀ ଅନନ୍ୟ ବୋଲି ବର୍ଣ୍ଣନା କରି କହିଛନ୍ତି, ଆଜି ଯାହା ଦେଖିଛି ତାହା ଅସାମାନ୍ୟ ଥିଲା। ଏହାର କଳ୍ପନା କେହି କରି ନ ଥିବେ। ପ୍ରଥମ ଥର ଭାରତୀୟ ଅଧିନାୟକ ଭାବେ ୧୦ମ ସ୍ଥାନରେ ବ୍ୟାଟିଂ କରି ବିଶ୍ୱ ରେକର୍ଡ କରିଛନ୍ତି ସେ। ଏପରିକି ଲାରା, ଜର୍ଜ ବେଲି, କେଶବ ମହାରାଜଙ୍କୁ ପଛରେ ପକାଇଛନ୍ତି। ଗୋଟିଏ ଓଭରରେ ୨୯ ରନ୍। ଯୁବରାଜ ଯେଉଁ ବୋଲରଙ୍କ ବଲରେ ୬ ଛକା ମାରିଥିଲେ, ସେହି ବୋଲରଙ୍କ ବଲ୍ରେ ବୁମ୍ରା ଏହି ରନ୍ କରିଛନ୍ତି। ଯେତେବେଳେ ଲାଗେ କି କ୍ରିକେଟରେ ସବୁକିଛି ଦେଖିସାରିଛ, ସେତେବେଳେ ଖେଳରେ ଏବେ ବି ଛାତ୍ର ଥିବା ଅନୁଭବ କରିବ। କାରଣ କିଛି ବି ଆଶ୍ଚର୍ଯ୍ୟଜନକ ଘଟଣା କେବେ ବି ଘଟିପାରେ। ଆଜି ଯାହା ଦେଖିଲି ତାହା ଅଦ୍ଭୁତ ଥିଲା। ବୁମ୍ରା ବ୍ୟାଟ୍ରୁ ୨୯ ଏବଂ ଏକ ଓଭରରେ ୩୫ ରନ୍ କରି ବିଶ୍ୱ ରେକର୍ଡ କରିବା ମନେରହିବ ବୋଲି ଶାସ୍ତ୍ରୀ କହିଛନ୍ତି।
ପ୍ରକାଶ ଯେ, ଇନିଂସର ୮୪ତମ ଓଭରରେ ୩୫ ରନ୍ ଆସିଥିଲା। ବୁମ୍ରା ୪ ଚୌକା ଏବଂ ୨ ଛକା ସହାୟତାରେ ୨୯ ରନ୍ କରିଥିବା ବେଳେ ଅତିରିକ୍ତ ଭାବେ ୬ ରନ୍ ମିଳିଥିଲା। ଷ୍ଟୁଆଟଙ୍କ ଏହି ଓଭର ଟେଷ୍ଟ ଇତିହାସର ସବୁଠାରୁ ମହଙ୍ଗା ଓଭରର ରେକର୍ଡ କରିଛି। ସେହିଭଳି ବୁମ୍ରା ମଧ୍ୟ ସର୍ବାଧିକ ରନ୍ର ବିଶ୍ୱ ରେକର୍ଡ କରିଛନ୍ତି।